Ос1
1Теве Господьын шомакше – тудо Осийлан, Беэрий эргылан, лийын. Тиде Иуда кугыжа-влак Озийын, Иофамын, Ахазын, Езекийын вуйлатымышт годым да Израиль кугыжа Иеровоамын, Иоас эргын, вуйлатымыж годым лийын.2Господь Осий гоч ойлаш тӱҥалын, Тудо тыге каласен: «Кай, ватылан яжар ӱдырамашым нал, яжарланымаште шочшаш йочаже-влакымат вара шкендыным ыште. Вет тиде мланде Господь деч кораҥын да чот яжарлана».3Осий каен да Гомерьым, Дивлаим ӱдырым, марлан налын. Ватыже мӱшкыраҥын да тудлан эргым ыштен.4Господь Осийлан каласен: «Тудлан Изреель лӱмым пу, вет икмыняр жап эртымеке, Мый Ииуй тукымым Изреельыште вӱрым йоктарымыжлан мут кучаш шогалтем да Израиль калыкын кугыжанышыжлан мучашым пыштем.5Тудо кечын Мый Израильын йоҥежшым Изреель лапверыште шалатем».6Вара Осийын ватыже угыч мӱшкыраҥын да ӱдырым ыштен. Господь Осийлан каласен: «Тудлан Лорухама лӱмым пу, вет Мый Израиль тукымым тетла ом чамане, сулыкшым ом кудалте.7А Иуда калыкым чаманен налам. Мый, Господь Юмышт, нуным утарем, но тидым йоҥеж, керде, сар, имне да имнешке-влак полшымо дене огыл ыштем».8Лорухамам чызе деч ойырымеке, Осийын ватыже угыч мӱшкыраҥын да эргым ыштен.9Тунам Господь каласен: «Тудлан Лоамми лӱмым пу, вет те Мыйын калыкем огыдал, Мыят тендан Юмыда омыл.10Но израиль эрге-влакын чотышт садак теҥыз ошма пырче наре лиеш, тудым висашат, шотлен лукташат ок лий. Кушто нунылан ”Те Мыйын калыкем огыдал” манын ойленыт, тушто нунылан каласат: ”Те илыше Юмын эргыже улыда”.11Иуда ден Израиль эрге-влак пырля погынат, шкаланышт ик оным шогалтат да шке мландыштышт нӧлталтыт. Изреельыште сеҥалтмаш кече пеш кугу».
Institute for Bible Translation, Finland