Тӱҥ6
1Мландымбалне еҥ-влак шукемаш тӱҥалыныт, нунын ӱдыр-влакышт шочыныт.2Юмын эргыже-влак айдеме ӱдыр-влакын мотор улмыштым ужыныт, сандене нуно, кӧ могайым ойырен, шкаланышт ватылыкеш налыныт.3Господь [Юмо] каласен: «Мыйын илыш шӱлышем айдеме кӧргыштӧ курымеш лийшаш огыл. Нуно колышашлык кап улыт, тек нунын ӱмырышт эн шукыжым шӱдӧ коло ий лиеш».4Тудо жапыште да тылеч варат, кунам Юмын эргышт айдеме ӱдыр-влак деке коштыныт, да нунышт азам ыштеныт, – мландымбалне кугу капан еҥ-влак иленыт. Нуно ожно жапысе патыр да чапланыше еҥ-влак лийыныт.5Господь [Юмо] ужын: мландымбалне еҥ-влак моткоч осалештыныт, нунын шонымышт да шӱм ӱжмышт эре осал гына лийыныт.6Сандене Господь мландымбалне айдемым ыштымыжлан ӧкынен, Тудын чонжо корштен.7Господь каласен: «Ыштыме айдеме тукымем пытарем, мландымбалне чылаштым пытарем – айдеме гыч тӱҥалын, вольык, чыла тыгыде чонан, кавасе кайык марте, вет нуным ыштымемлан Мый ӧкынем».8А Ной Господь [Юмылан] келшыше лийын.9Нойын илыш курымжо тыгай лийын. Ной тудо жапыште илыше-влак коклаште чын ыштыше да шылталаш амалдыме, Юмылан пеш чот ӱшаныше лийын.10Ной деч кум эрге шочын: Сим, Хам да Иафет.11Но мланде Юмын ончылно пужлен, осаллык дене темын.12[Господь] Юмо мландымбаке ончалынат, ужын: мланде пужлен, еҥ-влак мландымбалне илыш корныштым локтыл пытареныт.13[Господь] Юмо Нойлан каласен: «Мландымбалне чыла илышым Мый пытараш шонен пыштенам. Еҥ-влаклан кӧра осаллык уло мландым темен. Мый нунымат, мландымат пытарем.14Шканет гофер пушеҥге дене ковчегым ыште, тушто кыдежлам йӧнештаре да тӱжвачат, кӧргӧ гычат мланде кишым йыген шынде.15Ковчегым тыгайым ыште: кутышыжо – кумшӱдӧ, лопкытшо – витле, а кӱкшытшӧ кумло кынергут лийже.16Ковчеглан леведышым ыште, кӱкшытшӧ ик кынергут лийже, ковчегын ик могырышкыжо – омсам. Ковчегыште ӱлыл, кокымшо да кумшо кугу пӧлем-влакым келыштаре.17Кава йымалне илыше чыла чонаным пытараш манын, Мый мланде ӱмбаке вӱд ташлымашым колтем. Мландымбалне мо уло, чыла пыта.18Но тый денет Мый ойпидышым ыштем: тый ковчегыш пурышаш, пеленет эргыч-влакым, ватетым, эргыч-влакын ватыштым налшаш улат.19Тый денет пырля илыше кодышт манын, ковчегышке [чыла вольык гыч, чыла тыгыде чонан гыч] – чыла илыше чонан-влак кокла гыч – узо ден авам ик мужыр дене нал.20Кажне кайык урлык гыч, вольык урлык гыч, мланде ӱмбалысе тыгыде чонан урлык гыч – чылашт гычат, [тый денет пырля] илен кодышт манын, ик мужыр дене [узо ден ава] тый декет толышт.21Тыйже чыла тӱрлӧ кочкышым ямдыле да пеленет нал. Тиде шкаланетат, нуныланат кочкыш лиеш».22Кузе [Господь] Юмо кӱштен, Ной чылажымат тугак ыштен.
Institute for Bible Translation, Finland