Тӱҥ32
1Иаков шке корныж дене умбаке каен. [Тудо вуйжым нӧлталын да ужын: ваштарешыже Юмын сарзе тӱшкаже толеш.] Тудым Юмын Суксыж-влак вашлийыныт.2Нуным ужын, Иаков каласен: «Тиде Юмын сарзыже-влак улыт». Тудо ты верым Маханаим манын лӱмден.3Вара Иаков шкеж деч ончыч Сеир мландыш, Едом кундемыш Исав изаж деке уверзе-влакым колтен.4Нунылан кӱштен ойлен: «Мыйын Исав озамлан тыге каласыза: ”Тыйын Иаков тарзет теве мом ойла: мый Лаван дене иленам да тымарте тушто лийынам.5Мыйын ӱшкыж ден осёл-влак, тыгыде вольык, тыгак пӧръеҥ ден ӱдырамаш кул-влак улыт. Мый декем, [шке тарзет дек,] поро кумылет лекше манын, тидын нерген [Исав] озамлан увертараш колтенам”».6Уверзе-влак, Иаков деке пӧртылмекышт, маныныт: «Ме тыйын Исав изат дене лийынна. Тудо тыйын ваштарешет толеш, пеленже нылшӱдӧ еҥ».7Иаков пеш чот лӱдын да тургыжланен колтен. Тудо пеленже улшо еҥ-влакым, тыгыде да шолдыра вольыкшым, верблюд-влакшым кок тӱшкалан шелын.8Да каласен: «Исав ик тӱшкаже ӱмбак керылтеш да кырен шалата гын, весыже утлен кодын кертеш».9Вара Иаков тыге каласен: «Авраам ачамын Юмыжо, Исаак ачамын Юмыжо, ”шке мландышкет, шке тукымет дек пӧртыл, Мый тылат суапым ышташ тӱҥалам” манын мыланем каласыше Господь [Юмем]!10Мый, Тыйын тарзет, Тыйын ыштыме порылыкетым, суапетым ом шого. Вет мый кидыштем улшо ик пондо дене гына тиде Иорданым вонченам. Теве ынде шуко тарзем ден вольыкем уло, нуным кок тӱшкаланат шелаш лиеш.11Утаре мыйым изамын кидше деч, Исавын кидше деч. Тудо толешат, мыйым, икшывем-влакым да аваштым пуштын кода манын лӱдам.12Тый ойленат ыле: ”Мый тылат суапым ышташ тӱҥалам да тыйын тукыметым теҥыз ошма пырче наре шотлен пытарыдымым ыштем”».13Ты йӱдым Иаков туштак эртарен. Уло погыж гыч тудо Исав изажлан пӧлек шотеш14кокшӱдӧ казам, коло казатагам, кокшӱдӧ шорыкым, коло тагам,15кумло ава верблюдым чомаштге, нылле ушкалым, лу ӱшкыжым, коло ава ден лу узо осёлым ойырен налын [да колтен].16Кӱтӱ-влакым тарзыж-влаклан пайлен пуэн да тыге кӱштен: «Те мый дечем ончыч ошкылза, ик кӱтӱм весе деч икмыняр кокла ойырен шогыжо».17Эн ончыч кайыше тарзыжлан тыге шӱден каласен: «Кунам мыйын Исав изамым вашлият да тудо ”Тый кӧ улат? Кушко кает? Тиде кӧн кӱтӱжӧ?” манын йодеш гын,18каласе: ”Тыйын Иаков тарзетын. Тиде тудын Исав озажлан колтымо пӧлекше. Теве тудо шкежат мемнан почеш толеш”».19Тидымак тудо кокымшыжланат, кумшыжланат, кӱтӱм поктышо моло-влаклан чылаштлан шӱден каласен: «Исавым вашлиймекыда тыге манза.20Эше каласыза: ”Теве тыйын Иаков тарзет мемнан почешак толеш”». А шке семынже шонен: «Изамын кумылжым ончыч колтымо пӧлек дене савырем, вара мый шкежат миен шуам. Тунам мыйым ала сайын вашлиеш».21Тыге пӧлек-влак тудын деч ончыч каеныт, а шкеже ты йӱдым шогалме верыштыжак эртарен.22Йӱдым Иаков кынелынат, кок ватыжым, кок тарзе ӱдырамашыжым да латик эргыжым налын, Иавок изэҥерым келын вончен.23Нуным йогын гоч вончыктарен, тыгак чыла мо улыжымат вончыктарен.24Иаков шкетын кодын. Эр ӱжара кояш тӱҥалмеш тудын дене Ала-Кӧ кучедалын.25Тудыжо сеҥен кертдымыжым шижынат, Иаковын эрдыжым перен да кучедалме годым тудын эрде йыжыҥжым сусыртен.26А вара йодын: «Колто Мыйым – ӱжара нӧлталтеш». Иаковшо манын: «Мыйым суапландарымешкет Тыйым ом колто».27Тудо Иаков деч йодын: «Кузе тыйын лӱмет?» Тудыжо вашештен: «Иаков».28Вара тиде Ала-Кӧ каласен: «Ынде тыйын лӱмет Иаков огыл, а Израиль лиеш. Тый Юмо дене кучедалынат да айдеме-влакым сеҥаш тӱҥалат».29Иаковат йодын: «Тыят шке лӱметым каласе». А Тудыжо вашештен: «Молан тый Мыйын лӱмем йодат? [Тудо кӱдыратле.]» Вара Иаковым суапландарен.30Ты верлан Иаков Пенуэл лӱмым пуэн. Тышан, манын тудо, мый Юмын чурийжым ужынам да чонем илыше кодын.31Иаковын Пенуэлым эртен кайымыж годым кечат лектын улмаш. Эрдыже эмганымылан кӧра тудо окшаклен ошкылын.32Сандене кызытат Израильын шочшыжо-влак эрде йыжыҥысе шӧным кочмашышт уке, вет Иаковын эрде йыжыҥжым Кучедалше перен.
Institute for Bible Translation, Finland