Тӱҥ3
1Господь Юмын ыштыме чыла янлык гыч эн чояже кишке лийын. Кишке ӱдырамашлан каласен: «Рай садыште улшо ик пушеҥге гычат ида коч манын, Юмо чынак каласен мо?»2Ӱдырамаш кишкылан вашештен: «Пушеҥгыла гыч мыланна саскам кочкаш лиеш.3Тыланда колаш огыл манын, лач сад покшелне шогышо пушеҥге гыч гына саскам ида коч, тудын деке ида тӱкнӧ манын Юмо каласен».4Кишке ӱдырамашлан каласен: «Уке, те огыда коло.5Но Юмо пала: кунам те тиде пушеҥге гыч саскам кочкыда, тудо кечын тендан шинчада почылтеш, да те поро ден осалым ойырен мошташ тӱҥалыда, юмо гаяк лийыда».6Ӱдырамаш ужын: тиде пушеҥгын саскаже кочкашлан сайын коеш, пушеҥге шинчам куандара, уш-акылым пуэн кертмыжлан кӧра кумылым савыра. Ӱдырамаш саскам кӱрлын налын да кочкын. Воктеныже улшо марийжыланат пуэн, тудат кочкын.7Тунам когыньыштынат шинчашт почылтын, чараматын улмыштым умыленыт. Смоква пушеҥге лышташ-влакым ваш пидын, кыдалешышт сакалтеныт.8Нуно Господь Юмын кас юалге годым рай садыште коштмыжым колыныт. Юмо деч шылаш манын, Адам ден ватыже пушеҥге лоҥгаш пуреныт.9Господь Юмо пӧръеҥым ӱжын: «[Адам,] кушто тый улат?»10Тудо вашештен: «Тыйын рай садыште коштметым кольымат, лӱдым – мый вет чараматын улам, сандене шыльым».11Юмо манын: «Чараматын улметым кӧ тыланет ойлен? Мыйын кочкаш чарыме пушеҥгын саскажымак кочкын отыл дыр?»12Адам каласен: «Тый мыланем ӱдырамашым пуэнат, тудыжо пушеҥге гыч саскам кӱрлын пуэн, да мый кочкынам».13Господь Юмо ӱдырамашлан каласен: «Мом тый ыштенат?» Ӱдырамаш вашештен: «Мыйым кишке ондален, да мый кочкынам».14Господь Юмо кишкылан каласен: «Тыге ыштыметлан чыла вольык ден янлык коклаште тый каргыме улат, ӱмырет мучко тый мӱшкырет дене нушкын кошташ да мланде пуракым кочкаш тӱҥалат.15Мый тыйым ӱдырамашын тушманжым ыштем, а ӱдырамаш тыйын тушманет лиеш, тыйын тукымет ден тудын тукымжо коклашке келшыдымашым колтем. Ӱдырамашын тукымжо тыйым вует гыч пытара, а тый тудым йолтаганже гыч чӱҥгалат».16Ӱдырамашлан Господь Юмо каласен: «Тыйын мӱшкыран улмет годым йӧсланымашым шукемдем. Азам тый орланен ышташ тӱҥалат, но кумылет мариет деке шупшаш тӱҥалеш, да тудо тый денет озаланаш тӱҥалеш».17Адамлан каласен: «Тиде пушеҥге гыч ит коч манын кӱштенам ыле вет. Ватетын ойжым колыштметлан да саде пушеҥге гыч кочметлан тыланет верчын мланде каргыме лиеш. Ӱмырет мучко тый, неле мланде пашам ыштен, кочкышым ыштен налаш тӱҥалат.18Мланде тыланет пелчан ден коршаҥгым шочыкташ тӱҥалеш, тый пасу кушкылым кочкын илаш тӱҥалат.19Тый мланде гыч налме улат, да мӧҥгеш мландыш савырнымешкет, пӱжвӱдым йоктарен, киндым кочкаш тӱҥалат. Вет тый мланде пурак улат да пуракышкак савырнет».20Адам ватыжлан Ева лӱмым пуэн, вет тудо чыла еҥын аваже лийын.21Господь Юмо Адамлан да тудын ватыжлан коваште дене вургемым ыштен да нуным чиктен.22Господь Юмо каласен: «Ынде айдеме поро ден осалым пален налмыж дене Мемнан кокла гыч иктыж гай лийын. Тудо адакат кидшым ынже шуялте да, илыш пушеҥге гыч саскам налын кочкын, курым-курымеш илаш ынже тӱҥал».23Мланде пурак гыч налме айдеме мланде пашамак ыштыже манын, Господь Юмо тудым Эдем сад гыч поктен колтен.24Юмо айдемым поктен колтен, а илыш пушеҥге деке корным оролаш манын, эрвелне, Эдем сад воктене, Херувимым да пӧрдын шогышо тулан кердым вераҥден.
Institute for Bible Translation, Finland