Тӱҥ26
1Тиде мландыш шужымаш толын, тыгаяк шужымаш Авраамын илыме жапыште лийын улмаш. Исаак Герарышке филистим кугыжа Авимелех деке каен.2Тудлан Господь кончен да каласен: «Египетыш ит кошт. Мый тылат илышаш верым ончыктем.3Тый тиде мландыште икмыняр жап ӧрдыжъеҥ семын иле, Мый пеленет лиям да тыйым суапландарем. Тиде мландым пӱтынек Мый тыланет да тыйын тукыметлан пуэм, тыге тыйын Авраам ачатлан пуымо товатлыме мутем шуктем.4Мый тыйын тукыметым кавасе шӱдыр наре шукемдем, тысе чыла мландым тыйын тукыметлан пуэм. Тыйын тукымет гоч мландымбалысе чыла калык суапландаралтеш.5Мый тидым Авраам [ачатлан] кӧра ыштем. Тудо Мыйын мутем колыштын: мом кӱштенам – чыла ыштен. Мыйын шӱдымаш, устав да закон-влакемым тудо чыла шуктен шоген».6Исаак Герарыште илаш тӱҥалын.7Ты кундемысе пӧръеҥ-влак тудын деч [Ревекка] ватыже нерген йодышташ тӱҥалыныт. Исаак «ватем» манаш лӱдын, да «тиде мыйын шӱжарем» манын. Ревекка верч мыйым пуштынат кертыт, шонен, вет ватыже пеш мотор лийын.8Исаакын ятыр жап тыште илымекыже, филистим кугыжа Авимелех икана окнаш ончалынат, Исаакын Ревекка ватыж дене йӧратен модмыжым ужын.9Авимелех Исаакым ӱжыктен да каласен: «Ревекка тыйын ватет улмаш. Молан шӱжарем манын ойленат?» Исаак тудлан вашештен: «Ватемлан верч мыйым ынышт пушт манын шоненам».10«Мом тый мемнан дене ыштенат? Мемнан кокла гыч иктаж-кӧ ватет дене мала ыле гын, тый мемнам сулыкыш пуртет ыле», – манын Авимелех.11Да уло калыклан кӱштен каласен: «Тиде еҥым да тудын ватыжым кӧ тӱка гын, тыгай еҥым пуштман».12Исаак тиде мландыште шурным ӱден. Тудо ийын лектышым шӱдӧ пачаш утларак налын – Господь тудым тыге чот суапландарен.13Исаак поянрак да поянрак лийын, тудын чылажат пеш шуко лийын.14Тудын тыгыде да шолдыра вольыкшо, курал-ӱдымӧ мландыже шуко лийын. Садлан филистим-влак тудлан кӧранаш тӱҥалыныт.15Нуно эше Авраам ачажын илымыж годымак тудын тарзыж-шамычын кӱнчымӧ чыла тавыжым уреныт да рок дене петыреныт.16Авимелех Исааклан каласен: «Тый ынде мемнан деч ятырлан виянрак лийынат, сандене тышечын кае».17Исаак тушеч каен, Герар лапвереш омаш-влакым шынден да тушто илаш тӱҥалын.18Авраам ачаж годымак кӱнчымӧ да тудын колымыж деч вара филистим-влакын урен кодымо тавыштым Исаак уэш почын. Таве-влаклан Авраамын пуымо лӱмыштымак коден.19Исаакын тарзыже-влак [Герар] лапверыште тавым кӱнченыт да тушто памаш вӱдым муыныт.20Но Герарысе кӱтӱчӧ-влак Исаакын кӱтӱчыж-влак дене ӱчашаш тӱҥалыныт. Тиде мемнан вӱд маныныт. Ӱчашымылан кӧра Исаак тавылан Есек лӱмым пуэн.21[Исаакын вес верыш кайымекше,] тудын тарзыже-влак вес тавым кӱнченыт, тудын шотыштат тавалымаш лектын. Саде тавылан Исаак Ситна лӱмым пуэн.22Тудо тышечат каен да эше ик тавым кӱнчен. Тудым ынде тавален огытыл. Тавылан Реховоф лӱмым пуэн да каласен: «Господь ынде мыланна кумда верым пуэн, ме тиде мланде мучко шарлен шукемына».23Тушечын тудо Вирсавийыш куснен.24Тудо йӱдымак Исааклан Господь кончен да каласен: «Мый Авраам ачатын Юмыжо улам. Ит лӱд, Мый пеленет улам. Авраам тарзем верч Мый тыйым суапландарем да тукыметым шукемдем».25Исаак тушан жертвенникым ыштен да Господьын лӱмжым ӱжын кумалын. Тушан Исаак омашыжым шогалтен, тарзыже-влак тушто, [Герар лапверыште,] тавым кӱнченыт.26Исаак деке Герар гыч Авимелех толын. Тудын пелен Ахузаф полышкалышыже да сарзывуй Фихол лийыныт.27«Молан те мый декем толында? – йодын нунын деч Исаак. – Мый вет тыланда ужмышудымо улам, мыйым те шкендан деч поктен колтенда».28Нуныжо вашештеныт: «Ынде ме раш ужына: Господь тыйын пеленет. Сандене шкенан коклаште ойлышна: ме тый денет товатлен пеҥгыдемдыме ойпидышым ыштынена.29Ме тыйым тӱкен огынал, тыланет сайым гына ыштенна да тыйым тыныс дене колтенна. Тыят мыланна осалым ыштышаш отыл. Тый Господьын суапландарыме еҥже улат».30Исаак нунылан сийым поген. Нуно кочкыныт, йӱыныт.31Эрдене эр кынелмеке, икте-весыштлан товатлен ойленыт. Толшо-влакым Исаак колтен, да нуно тыныс дене каеныт.32Тудо кечынак тарзе-влак Исаак деке толыныт да кӱнчымӧ таве нерген «Ме тушто вӱдым муынна» манын увертареныт.33Тиде тавылан тудо Шива лӱмым пуэн. Тидлан кӧра саде ола тачысе кече мартеат Беэр-Шива [Вирсавий] маналтеш. 34Исав нылле ияш улмыж годым хеттей Беэрын Иегудифа ӱдыржым да хеттей Елонын Васемафа ӱдыржым марлан налын.35Нине ӱдырамаш-влак Исаак ден Ревеккан кочо кумылыштын амалышт лийыныт.
Institute for Bible Translation, Finland