Тӱҥ24
1Авраам шоҥго лийын, кугу ийготым поген. Господь тудым чыла шотыштат суапландарен.2Авраам пӱтынь озанлыкым виктарен шогышо эн кугу тарзыжлан каласен: «Кидет дене мыйын эрдышкем тӱкнӧ 3да Господь дене, кава ден мландын Юмыж дене, мылам товатле: мыйын кызыт пырля илыме хананей калык кокла гыч [Исаак] эргымлан ӱдырым от нал.4Тый мыйын шочмо-кушмо кундемышкем, [шке тукымем деке,] кай да Исаак эргымлан ӱдырым тушеч кондо».5Тарзе Авраам деч йодын: «А ӱдырын мый денем пырля тиде мландышке толмыжо ок шу гын? Тунам мый тыйын лектын кайыме мландышкет эргычым наҥгайышаш улам мо?»6Авраам тудлан каласен: «Тидым ышташ ок кӱл! Эргым тушко ит наҥгай!7Господь, кава [ден мландын] Юмыжо, мыйым ачамын суртшо гыч, шочмо-кушмо мландем гыч тышке конден. [Тылат да] тыйын тукыметлан тиде мландым пуэм манын, Тудо мыланем товатлен ойлен. Тудо тыйын ончычет шке Суксыжым колта, да тый эргымлан тушеч ӱдырым кондет.8А ӱдырын тый денет пырля тышке толмыжо ок шу гын, товатлыме мутет деч эрыкан лият. Но мыйын эргым тушко ит наҥгай».9Тарзе шке кидше дене Авраам озажын эрдышкыже тӱкнен да тыгак ышташ товатлен.10Вара тудо озажын кӱтӱж гыч лу верблюдым налын да корныш тарванен. Пеленже тыгак озажын пуымо тӱрлӧ шергакан ӱзгарым налын. Тыге тудо Месопотамийыш, Нахор олашке, лектын каен.11Тушко тудо кас велеш, ӱдырамаш-влакын вӱдлан лекмышт жапыште, миен шуын да верблюдшо-влакым ола воктенысе таве дене шогалтен.12Тарзе каласен: «Господь, Авраам озамын Юмыжо! Таче мылам йӧным ыште, Авраам озамлан шке порылыкетым ончыкто.13Теве мый таве воктене шогем, да тышке олаште илыше-влакын ӱдырышт вӱдлан лектыт.14Мый ик ӱдырлан ”кувшинетым таялте, вӱдетым подылам” манын каласем. Тудыжо ”йӱ, верблюд-влакетымат [теммешкышт] йӱктем” манын вашешта гын, тугеже Тый лач тиде ӱдырым Исаак тарзетлан пӱренат. [Авраам] озамлан шке порылыкетым Тый тыге ончыктет манын, мый тышеч пален налам».15Тарзе [шке семынже] каласенат пытарен огыл, вачӱмбакыже кувшиным шынден, вӱдлан Вафуилын Ревекка ӱдыржӧ толын лектын. Вафуил Авраамын Нахор шольыжын да тудын Милка ватыжын эргыже лийын.16Ревекка пеш мотор, пӧръеҥ палыдыме ӱдыр лийын. Таве деке волен, тудо кувшинжым темен да мӧҥгеш кӱзаш тӱҥалын.17Тиде жапыште ваштарешыже Авраамын тарзыже куржын миен да каласен: «Кувшинет гыч изишак вӱдетым подылто».18Тудыжо манын: «Подыл, пагалымем». Тунамак кувшинжым кидышкыже волтен да тудлан йӱктен.19Йӱктымекше пелештен: «Мый тыйын верблюд-влакетланат вӱдым кошталам да теммешкышт йӱктем».20Ревекка тунамак кувшинже гыч вӱдым волышко опталын, таве деке угыч куржын, вӱдым коштал конден да чыла верблюдшым йӱктен.21Толшо еҥ, умылаш шонен, ӱдырым шыпак ончен шоген: Господь тудын корныжым суапландарен але уке?22Верблюд-влакын йӱын чарнымекышт, тудо нерыш пижыктыме пел сикль нелытан шӧртньӧ кӧржым, лу сикль нелытан кок шӧртньӧ кидшолым налын23да йодын: «Тый кӧн ӱдыржӧ улат? Каласе, ачатын суртыштыжо мыланна йӱдым мален лекташ вер уло мо?»24Ӱдыр вашештен: «Мый Вафуилын ӱдыржӧ улам, тудо Милка ден Нахорын эргышт».25Да эше ешарен: «Мемнан олым да курго шуко уло. Йӱдым мален лекташат вер сита».26Толшо еҥ сукалтен шинчын, Господьлан вуйжым савен27да каласен: «Господь, Авраам озамын Юмыжо, моктымо лийже. Тудо озам деке поро кумылан да ӱшанле улмыжым ончыктен, мыйым вик озамын шольыжын суртышкыжо конден».28Ӱдыр мӧҥгышкыжӧ аваж деке куржын да мо лиймым каласен.29Ревеккан Лаван лӱман изаже улмаш. Ревеккалан пӧлеклыме кидшол ден кӧржым ужмеке да шӱжаржын «тиде айдеме мый денем тыге кутырен» манмыжым колмеке, Лаван таве деке куржын лектын да толшо еҥ деке миен. Тудыжо тунам таве лишне верблюдшо-влак воктене шоген.31Лаван каласен: «Юмын суапландарыме айдемыже, молан тый тӱнӧ шогет? Пуро мемнан деке. Мый тыланет пӧртем да верблюдет-влаклан верым ямдыленам».32Толшо еҥ пӧртыш пурен. Верблюд-влак ӱмбач ӱзгарым волтеныт, олымым шареныт да пукшеныт, а толшо еҥлан да пеленже лийше-влаклан йол мушкашышт вӱдым конденыт.33Уна ончык кочкышым шынденыт, но тудыжо каласен: «Пашам нерген ойлыде, кочкаш ом шич». Лаван вашештен: «Ойло».34Тудо тыге каласен: «Мый Авраамын тарзыже улам.35Господь мыйын озамым пеш суапландарен. Тудо кугу еҥ лийын. Юмо тудлан шуко тыгыде да шолдыра вольыкым, ший ден шӧртньым, пӧръеҥ ден ӱдырамаш тарзе-влакым, верблюд ден осёл-влакым пуэн.36Озамын ватыже, Сарра, шоҥгеммекыже тудлан [ик] эргым ыштен. Озам уло погыжым эргыжлан пуэн.37Озам мый дечем товатлыме мутым налын, тыге каласен: ”Кызыт мый хананей-влакын мландыштышт илем, но тый эргымлан ӱдырым тиде калык гыч ит нал.38Кай ачамын сурт-печышкыже, мыйын родо-тукымем-влак деке, эргымлан ӱдырым тушеч кондо”.39Мый озамлан манынам: ”Ӱдыр мый денем тышке огеш тол гын?”40Но тудо мыланем каласен: ”Господь [Юмо], Кудым мый колыштын илем, тый денет пырля шке Суксыжым колта да корнетым виктараш тӱҥалеш. Эргымлан тый ватым мыйын родо-тукымем кокла гыч, ачамын суртшо гыч кондет.41Родо-тукымем-влак деке миен толмекет, тый товатлыме мутет деч эрыкан лият. Ӱдырыштым огыт пу гынат, товатлыме мутет деч эрыкан лият”.42Теве таче мый таве деке толын шуымат, каласышым: ”Господь, Авраам озамын Юмыжо! Мыйын толмо корнемын мучашыжым суапландарет гын, тек тыге лиеш:43мый таве воктен шогалам [да олаште илыше-влакын ӱдырышт вӱдым кошталаш толыт]. Вӱдлан лекше ӱдырлан каласем: ’Кувшинет гыч вӱдым изишак подылаш пу’.44Кӧ мылам ’шкежат йӱ, верблюдет-влакымат йӱктем’ манын ойла, тудо Господьын [шке Исаак тарзыжлан,] озамын эргыжлан, ончыктымо марлан налшаш ӱдыр лиеш. [Тышечын мый пален налам: Авраам озамлан Тый шке порылыкет ончыктет.]”45Семынем тыге пелештенат шым шукто – Ревекка вӱдлан лекте, вачӱмбакыже кувшиным шынден, таве деке волыш, вӱдым коштале. Мый тудлан каласышым: ”Вӱдетым йӱктӧ”.46Тудо тунамак кувшинжым кидышкыже волтыш да каласыш: ”Йӱ, верблюдет-влакымат йӱктем”. Мый йӱым, тудо верблюд-влакемат йӱктыш.47Мый тудын деч йодым: ”Тый кӧн ӱдыржӧ улат? [Каласе мыланем.]” Тудо каласыш: ”Мый Вафуилын ӱдыржӧ улам, тудо Милка ден Нахорын эргышт”. Мый тудлан нерышкыже кӧржым да кидышкыже кидшолым пижыктышым.48Вара, сукалтен шинчын, Господьлан, Авраам озамын Юмыжлан, вуем савышым да тауштышым, вет Тудо озамын эргыжлан ӱдырым шке тукымжо гыч налаш мыйым тура корно дене конден.49Ынде те мыланем каласыза: мыйын озамлан поро кумылым да чынлыкым ончыктынеда але уке? Умбакшым мыланем мом ышташ палаш манын, вашмутдам каласыза».50Лаван ден Вафуил вашештеныт: «Тиде паша – Юмо деч. Тидын шотышто ме нимомат каласен огына керт.51Теве Ревекка тыйын ончылнет – нал да наҥгае. Тек тудо, Господьын каласыме семынак, озатын эргыжын ватыже лиеш».52Тыгай мутым колмекше, Авраамын тарзыже Господьлан мланде марте вуйжым савалтен.53Ший да шӧртньӧ ӱзгар-влакым, вургемым луктын, Ревеккалан пуэн, изаж ден аважланат шергакан пӧлекым ыштен.54Толшо еҥ да тудын пелен улшо-влак кочкын-йӱыныт, йӱдлан малаш кодыныт. Эрдене кынелмекышт, тудо каласен: «Ынде мыйым озам деке колтыза, [мый каем]».55Но Ревеккан изаже ден аваже каласеныт: «Тек ӱдыр мемнан дене иктаж лу кечым ила, вара кает».56Авраамын еҥже нунылан каласен: «Мыйым ида кучо, мыйын корнем Господь суапландарен шоген. Мыйым колтыза, шке озам деке каем».57Нунышт маныныт: «Ӱдырым ӱжын кондена да йодына – мом тудо каласа».58Вара Ревеккам ӱжын конденыт да туддеч йодыныт: «Тиде еҥ дене кает мо?» Тудыжо манын: «Каем».59Тыге нуно Ревекка шӱжарыштым, тудым изинекак ончен куштышо ӱдырамашым, Авраамын тарзыжым да тудын еҥже-влакым ужатен колтеныт.60Ревеккам суапландарен, тыге каласеныт: «Мемнан шӱжарна! Тек тый дечет тӱжем-тӱжемле калык шочеш, тек тыйын тукымет тушманын олаштым сеҥен налаш тӱҥалеш!»61Ревекка ден тарзе ӱдырамашыже-влак верблюдым кушкыж шинчыныт да толшо еҥ почеш корныш тарваненыт. Тыге Авраамын тарзыже Ревеккам наҥгаен.62Тиде жапыште Исаак Беэр-лахай-рои гыч пӧртылын, тунам тудо Кечывалвел мландыште илен улмаш.63Кас велеш Исаак нурыш лектын да шонкален коштын. Тудо вуйжым нӧлталын да ужын: умбалне верблюд-влак толыт.64Ревеккат ончалын да Исаакым ужын, верблюд ӱмбач волен.65Тудо Авраамын тарзыж деч йодын: «Мемнан ваштареш нур дене толшо айдеме кӧ тыгай?» Тарзе вашештен: «Тиде мыйын озам». Ревекка шовычым налын да шӱргыжым петырен.66Тарзе мом ыштымыж нерген Исааклан чыла каласкален.67Исаак Ревеккам Сарра аважын омашышкыже пуртен, Ревекка тудын ватыже лийын. Исаак тудым йӧратен, да аваж деч посна кодмо ойганымашыже лушкен.
Institute for Bible Translation, Finland