Езд4
1Иуда ден Вениамин тукым-влакын тушманышт колыныт: плен гыч пӧртылшӧ-шамыч Господьлан, Израильын Юмыжлан, храмым чоҥат.2Нуно Зоровавель ден урлык вуйлатыше-влак деке толыныт да каласеныт: «Меат тендан дене пырля чоҥаш тӱҥалына, вет меат тендан семынак Господь Юмыланда вуйнам савена. Ме Тудлан надырым Ассирий кугыжа Асарданын вуйлатыме жап гычак пуэн шогена, тудак мемнам тышке илаш конден».3Но Зоровавель, Иисус да Израильын моло урлыквуйжо нунылан вашештеныт: «Мемнан дене пырля те мемнан Юмыланна пӧртым чоҥен огыда керт. Израильын Господь Юмыжлан пӧртым ме гына чоҥаш тӱҥалына, тыге мыланна Персий кугыжа Кир кӱштен».4Тунам тиде мландыште илыше калык-влак, чоҥымо пашам шогалташ шонен, Иуда калыкын кумылжым волташ, тудым лӱдыктылаш тӱҥалыныт.5Шонен пыштымышт ынже шукталт манын, нуно ваштарешышт тӧра-влакым тарленыт. Тиде Персий кугыжа Кирын вуйлатыме жапыште тӱҥалын да Персий кугыжа Дарийын вуйлатымыж годымат шуйнен.6А Ахашверошын кугыжаланаш тӱҥалмекше, нуно Иуда ден Иерусалимыште илыше-влак ӱмбак чоген возеныт.7Артаксеркс вуйлатыме годымат Бишлам, Мифредат, Табеел да нунын йолташышт Персий кугыжа Артаксеркслан возеныт. Серыш арамей йылме да буква дене возымо лийын.8Кугыжан тӧра Рехум ден возкалыше Шимшай Иерусалим ваштареш Артаксеркс кугыжалан тыгай серышым возеныт:9«Кугыжан тӧра Рехум, возкалыше Шимшай да нунын йолташышт – судья, кылъеҥ, кундемвуй, перс-влак, тыгак Урукышто, Вавилонышто илыше-шамыч, Сусаште илыше-шамыч – вес семынже еламит-влак,10да моло калык гыч лекше-шамыч, кудыштым кугун пагалыме Аснафар [Сеннахирим] Самарийысе олалаште да эҥер вес велне илаш вераҥден».11Умбакыже серышыштышт теве мом возымо улмаш: «Артаксеркс кугыжалан, эҥер вес велне илыше тарзет-влак дечын.12Тек кугыжа пала: тый дечет лекше иудей-влак мемнан дек Иерусалимыш толыныт, нуно тиде пуламыр да осал олам угыч чоҥат – пырдыжым нӧлтат, негызым пеҥгыдемдат.13Тек кугыжа пала: тиде олам чоҥат да пырдыжым пеҥгыдемдат гын, нуно налогымат, йозакымат, лӱмоксамат тӱлаш огыт тӱҥал – тыге кугыжан казналан эҥгек лиеш.14Ме кугыжан ӱшанле тарзыже улына да тудлан ышташ шонымо зияным ончен огына керт. Сандене кугыжалан теве мом темлена:15тек ача-кочат-влакын курымсерыш книгаштым шергал лектыт. Тушеч тый пален налат: тиде ола – пуламыр ола, тудо кугыжа ден кундем-влаклан зияным кондедылын, ожнысекак тушто пудыранчыкым нӧлтедат, вет садланак тудо шалатыме лийын.16Ме кугыжалан увертарена: тиде олам чоҥат да пырдыжшым нӧлталыт гын, тидын деч вара тый эҥер вес велне улшо мландым йомдарет».17Кугыжа тыгай вашмутым колтен: «Кугыжан тӧра Рехумлан, возкалыше Шимшайлан, Самарийыште да эҥер вес вел кундемлаште илыше моло йолташыштлан. Тыныс тыланда!18Тендан колтымо серышдам кусареныт да мылам лудын пуэныт.19Мыйын кӱштымем почеш курымсерыш книгам шергал лектыныт, да пале лийын: тиде ола ожнысек кугыжа-влак ваштареш шоген, тушто пудыранчык да пуламыр лиеденыт.20Иерусалимыште виян кугыжа-влак лийыныт, нуно эҥер вес велысе уло кундемым вуйлатеныт, нунылан налогым, йозакым, лӱмоксам тӱленыт.21Кӱштымашым пуыза – тек нине еҥ-влак пашам ыштымыштым чарнат, тек мыйын кӱштымешкем олам огыт чоҥо!22Ончыза, тидым шуктыде ида кодо, уке гын кугу зиян лиеш. Кугыжанышлан кугу йомдарымаш кӱлеш мо?»23Кунам Артаксеркс кугыжан тиде серышыжым Рехумлан, возкалыше Шимшайлан да нунын йолташыштлан лудыныт, нуно тунамак иудей-влак деке Иерусалимыш каеныт да, вийым кучылтын, пашаштым чареныт.24Тыге Иерусалимысе Юмын пӧртым чоҥымо паша шогалын. Персий кугыжа Дарийын кокымшо ий кугыжаланымыж марте тыге лийын.
Institute for Bible Translation, Finland