Езд1
1Персий кугыжа Кирын икымше ий вуйлатымыж годым Иеремий гоч каласыме Господьын шомакше шукталтын. Господь Персий кугыжа Кирын шӱм-чонышкыжо кумылым пыштен, да тудыжо пӱтынь кугыжаныш мучко тыгай кӱштымашым увертараш да возен шындаш кӱштен:2«Тыге Кир, Персий кугыжа, ойла: Господь, кавасе Юмо, мылам мландымбалысе чыла кугыжанышым пуэн да Шкаланже пӧртым Иерусалимыште, Иуда мландыште, чоҥаш кӱштен.3Кӧ тендан коклаште Тудын калыкше гыч – тудын пелен тек Юмыжо лиеш, – тек Иуда мландысе Иерусалимыш кая да Израильын Господь Юмыжын, Иерусалимыште улшо Юмын, пӧртшым чоҥа.4Тиде калык гыч утаралт кодшо еҥ-влаклан, нуно кызыт кеч-кушто илат гынат, ты кундемлаште илыше-влак Иерусалимыште улшо Юмын пӧртым чоҥашлан тек ший ден шӧртньым, пого ден вольыкым да пӧлекым шке кумылын пуат».5Тунам Иуда ден Вениамин тукымын урлыквуйышт, иерей ден левит-влак – чыланат, кӧлан Юмо Иерусалимыште улшо Господьын пӧртшым чоҥаш каяш кумылым пуэн – корнылан ямдылалташ тӱҥалыныт.6Чыла пошкудышт нунылан ший ате ден шӧртньым, пого ден вольыкым, шергакан арверым да моло пӧлекым шке кумылын пуэныт.7Кир кугыжа Иерусалим гыч, Господьын пӧртшӧ гыч, Навуходоносорын налме да шке юмыжын пӧртышкыжӧ пыштыме ате-ӱзгарым кондаш кӱштен.8Персий кугыжа Кир нуным казначей Мифредатлан кучыктен, а тудыжо Шешбацарлан, Иуда тукымын вуйлатышыжлан, шотлен пуэн.9Нунын чотышт тыгай лийын: шӧртньӧ кӱмыж – кумло, ший кӱмыж – тӱжем, кӱзӧ – коло индеше,10шӧртньӧ чаше – кумло, икгай ший чаше – нылшӱдӧ лу да моло ате – тӱжем.11Шӧртньӧ да ший ате-ӱзгар чылаже вич тӱжемат нылшӱдӧ лийын. Кунам Иерусалим гыч Вавилоныш илаш наҥгайыме еҥ-влак корныш лектыныт, Шешбацар чыла тидым пеленже налын улмаш.
Institute for Bible Translation, Finland