Иез45
1Кунам те шерева почеш мландым пайлаш тӱҥалыда, Господьлан святой мланде ужашым ойырыза. Тудын кужытшо коло вич тӱжем кынергут, лопкытшо коло тӱжем кынергут лийже. Тиде мланде пӱтынек святой лиеш.2Тушто святой верлан ныл могырым вичшӱдӧ кынергут кужытан мланде ужаш ойырымо лийшаш. Тудын йыр эше витле кынергут лопкытан яра мланде кодшаш.3Святой мланде ужашыште коло вич тӱжем кынергут кужытан, лу тӱжем кынергут лопкытан мланде ужашым ойырыза. Тыште святой вер, святой деч святой вер, лиеш.4Тиде святой мланде ужаш святой верыште служитлыше иерей-влакын мландышт лиеш. Господьлан служитлаш манын, нуно Тудын ончыко толыт. Тыште нунын пӧртышт да тыштак святой вер лийыт.5А коло вич тӱжем кынергут кужытан да лу тӱжем кынергут лопкытан вес мланде ужаш храмыште служитлыше левит-влаклан лиеш. Тиде нунын мландышт, илыме верышт лиеш.6Святой мланде ужаш воктене вич тӱжем кынергут лопкытан да коло вич тӱжем кынергут кужытан мланде ужашым олалан пуыза. Тиде мланде уло Израиль калыкын лиеш.7Эл вуйлатышылан мланде ужашым кок могырым пуыза: святой мланде ужаш воктене да олалан ойырымо мланде ужаш воктене. Тудо касвел могырым касвелкыла, эрвел могырым эрвелкыла шуйнаш тӱҥалеш. Кужытшо Израильын ик тукымысо мланде ужашыж дене икгай лиеш, элын касвел чекше деч эрвел чекше марте шуйнаш тӱҥалеш.8Тиде мланде Израильыште тудын лиеш. Тек Мыйын вуйлатышем-влак Мыйын калыкем тетла огыт шыгыремдыл, тек Израиль калыкын тукымжо-влаклан шке мланде ужашыштышт озаланаш эрыкым пуат.9Господь Юмо тыге ойла: сита, Израиль вуйлатыше-влак! Шыгыремдыме ден пызырымыдам чарныза, чын паша ден чынлыкым ыштыза! Мыйын калыкемым шке мландыж гыч поктымым чарныза, – ойла Господь Юмо. –10Тек тендан чын виса, чын ефа да чын бат лийыт.11Ефа ден бат икгай йоҥгытан лийшаш улыт. Ик батыш хомерын ик луымшо ужашыже, ефаш хомерын ик луымшо ужашыже пурыжо. Ефанат, батынат йоҥгытыштым хомер дене висышаш улыт.12Ик сикльыште – коло гера. Коло сикль, коло вич сикль да латвич сикль пырляже ик мине лиеш.13Теве могай пӧлекым те кондышаш улыда: кажне хомер шыдаҥ гыч – ефан кудымшо ужашыжым, кажне хомер шож гыч – ефан кудымшо ужашыжым.14Олив ӱйым тынар пуаш палемдыме: кажне кор гыч батын луымшо ужашыжым. Ик корышто, хомер семынак, лу бат.15А Израильын кӱтымӧ верлаж гыч – кажне кокшӱдӧ вуй шорык деч иктым. Калыкым эрныкташ манын, чыла тидым кинде надырлан, йӱлалтен пуымо надырлан да татулык надырлан кондыман, – ойла Господь Юмо. –16Уло калык тиде пӧлек-влакым Израиль вуйлатышын кидышкыже пуышаш.17А пайрем, у тылзе да шуматкече-влак годым – Израиль калыкын чыла пайремже годым – йӱлалтен пуымо надырым, кинде надырым да йошкар арака надырым эл вуйлатыше конден шогышаш. Израиль калыкым эрныкташ манын, тудо сулык верч надырым, кинде надырым, йӱлалтен пуымо надырым, татулык надырым конден шогышаш.18Господь Юмо тыге ойла: икымше тылзын икымше кечынже кӱтӱ гыч экшыкдыме самырык ӱшкыжым нал да святой верым эрныкте.19Тек иерей тиде сулык верч надырын вӱржым налеш да храмыш пурымо омсан янакше-влакым, жертвенникын кӱшыл кумдыкшын ныл лукшым, кӧргӧ кудывечысе капка меҥге-шамычым шӱралта.20Тыгак кӧмыт лӱмын огыл але палыде сулыкыш пуреныт – тыгай еҥ-влак верч тиде тылзын шымше кечынже тидымак ыштыза. Тыге те храмым эрныктеда.21Икымше тылзын латнылымше кечынже Кугече пайрем тӱҥалшаш. Тудым шым кече пайремлыза, шергиндым кочса.22Тек пайремын икымше кечынже эл вуйлатыше шкенжын верч да элысе уло калык верч самырык ӱшкыжым сулык верч надырлан конда.23Тиде шым кече жапыште тудо Господьлан йӱлалтен пуымо надыр шотеш кажне кечын экшыкдыме шым самырык ӱшкыж ден шым тагам, тыгак сулык верч надырлан кажне кечын ик казатагам кондышаш.24Кинде надыр тыгай лийшаш: кажне ӱшкыжлан – ик ефа ложаш, кажне тагалан – ик ефа ложаш, а кажне ефа ложашлан – ик гин олив ӱй.25Шымше тылзын латвизымше кечынже тӱҥалше пайрем годымат эл вуйлатыше тиде надыр-влакымак шым кече кондышаш: сулык верч тыгаяк надырым, тыгаяк йӱлалтен пуымо надырым, тыгаяк кинде надырым, тынарак олив ӱйым.
Institute for Bible Translation, Finland