Иез40
1Мемнам пленыш наҥгайыме деч вара коло визымше ийын, талук тӱҥалтыште, тудо тылзын луымшо кечынже – тидыже олам шалатыме деч вара латнылымше ий лийын – лач тиде кечын мыйын ӱмбалнем Господьын кидше лийын, да Тудо мыйым наҥгаен.2Юмын кончымашыште Тудо мыйым Израиль мландыш конден да пеш кӱкшӧ курык ӱмбаке шогалтен. Тиде курыкын кечывалвел тайылыштыже оласе полат гай койшо оралте-влак лийыныт.3Тудо мыйым тушко конден, да мый йолгыжшо той сынан пӧръеҥым ужынам. Кидыштыже йытын кандыра ден висыме пондо лийыныт, шкеже капкаште шоген.4Тиде пӧръеҥ мыланем каласен: «Айдеме эрге, шинчат дене тӱткын ончо да пылышет дене сайын колышт. Мом мый тылат ончыктем, чылажымат ушышкет пыште, вет тидым ончыкташ манын, тыйым тышке кондымо. Чыла, мом ужат, Израиль калыклан увертаре».5Мый ужынам: храмым чыла могырым пырдыж авырен. Саде айдемын кидыштыже улшо висыме пондо куд кужу кынергут – тидыже тыглай кынергут деч ик сово лопкытлан кугурак – кутышан лийын. Тудо пырдыжым висен. Тудын кӱжгытшӧ ик висыме пондо да кӱкшытшӧ ик висыме пондо лийыныт.6Вара тудо эрвел могырыш ончышо капка дек каен. Тудо тошкалтыш дене кӱзен да капка лондем-влакым висен: иктыжын лопкытшо ик висыме пондо да весыжын лопкытшо ик висыме пондо лийыныт.7Капка оралтыште ӧрдыжысӧ пӧлем-влак лийыныт. Кажне пӧлемын кужытшо ден лопкытшо ик висыме пондо лийыныт, а пӧлем-влакым вич кынергут кӱжгытан пырдыж ойырен шоген. Кӧргӧ кудывече могырым улшо ончыл кыдеж воктенысе капка лондемынат лопкытшо ик висыме пондо лийын.8Вара тудо тиде кыдежым висен: тудын кужытшо ик висыме пондо лийын,9лопкытшо кандаш кынергут, а тушто улшо меҥге-влакын кӱжгытышт кок кынергут лийыныт.10Эрвел капка оралтыште ӧрдыжысӧ пӧлем-влак кок велымат кумыт дене лийыныт. Нуно чыланат ик кугытан лийыныт, кок велне улшо меҥге-влакынат кӱжгытышт икгай лийын.11Вара тудо капкаш пурымо верым висен: лопкытшо лу кынергут, кужытшо латкум кынергут.12Пӧлем-влак ончылно ик кынергут кӱкшытан изи пырдыж, тыгак вес велым ик кынергут кӱкшытан изи пырдыж лийыныт. А пӧлем-влакын кужыт ден лопкытышт куд кынергут лийын.13Тидын деч вара тудо капка оралте кӧргыштӧ улшо ик пӧлемын шеҥгел пырдыжше гыч ваштареш улшо пӧлемын шеҥгел пырдыжше марте висен – нунын коклаште коло вич кынергут лийын. Нине пӧлемышке пурымо вер-влак икте-весышт ваштареш лийыныт.14Вара тудо меҥге-влакым висен – кудло кынергут лектын. Нунын йыр кудывече лийын. 15Капкаш пурымо вер гыч кӧргӧ кудывечыш лекме вер марте витле кынергут лийын.16Капка оралтысе пӧлем-влакын пырдыжлаштышт да нунын кокласе пырдыжлаште йырым-йыр решоткан окна-влак лийыныт. Нуно кӧргӧ кудывече могырым улшо ончыл кыдежыштат лийыныт, а меҥге вуйлаште – пальмыла койшо сӧрастарыш-влак.17Тудо мыйым тӱжвал кудывечыш конден. Туштыжо пӧлем-влак лийыныт, а кудывечым тӱрыснек кӱм шарыман кӱвар авырен. Чылаже кумло пӧлем лийын, нуно кӱвар велке онченыт.18Тиде кӱвар капка-влакын пырдыжышт воктене шуйналтын, лопкытшо капка лопкыт дене икгай лийын. Тиде кӱвар кӧргӧ кудывече деч ӱлнырак верланен.19Вара пӧръеҥ ӱлыл капка ден кӧргӧ кудывечыш пурымо вер коклам висен – эрвелышкат, йӱдвелышкат шӱдӧ кынергут лийын.20Тудо тыгак тӱжвал кудывечыш пуртышо йӱдвел капка оралтын кужыт ден лопкытшым висен.21Тушто улшо ӧрдыжысӧ пӧлем-влак, кок велымат кумыт дене, нунын кокласе меҥге ден изи пырдыж-влак – чылажат икымше капкасе гаяк лийын. Капка оралтын кужытшо витле кынергут лийын, а лопкытшо – коло визыт.22Тудын окнаже, изи пырдыжше, пальме сӱретше-влак эрвелыш ончышо капкасе гаяк лийыныт. Капкашке шым лондеман тошкалтыш дене кӱзеныт, а мучаштыже ончыл кыдеж лийын.23Йӱдвел капка ваштареш, эрвел капка семынак, кӧргӧ кудывечыш пуртышо капка лийын. Ик капка гыч вес капка марте тудо шӱдӧ кынергутым висен луктын.24Вара тудо мыйым кечывалвел могырыш наҥгаен, туштыжо кечывалвел капка лийын. Тудо капкам висен: меҥге ден кыдежше вес капка-шамычын гаяк лийыныт.25Капка оралтыште да ончыл кыдежыште окна-влак чыла могырым вес капка-шамычын гаяк лийыныт. Капка оралтын кужытшо витле кынергут, а лопкытшо коло вич кынергут лийыныт.26Капкашке шым лондеман тошкалтыш дене кӱзеныт, а мучаштыже ончыл кыдеж лийын. Кок могырымат тудын меҥге вуйлаштыже пальмыла койшо сӧрастарыш-влак лийыныт.27Кӧргӧ кудывечыш пурымаштат кечывалвел капка лийын. Тиде кӧргӧ капка деч кечывалвелысе тӱжвал капка марте тудо шӱдӧ кынергутым висен луктын.28Кӧргысӧ кудывечыш мыйым кечывалвел капка гоч пуртен да тудым висен – тудо моло капка гаяк лийын.29Тушто улшо ӧрдыжысӧ пӧлем-влак, нунын кокласе меҥге да изи пырдыж-влак – чылажат моло капкасе гаяк лийын. Капка оралтыште да ончыл кыдежыште чыла могырым окна-влак лийыныт. Капка оралтын кужытшо витле кынергут, а лопкытшо коло вич кынергут лийыныт.30Чыла вере кыдеж-влак лийыныт, нунын кужытышт – коло вич кынергут, а лопкытышт – вич кынергут.31Тиде капка оралтын ончыл кыдежше тӱжвал кудывечыш ончен, меҥге вуйлаштыже пальмыла койшо сӧрастарыш-влак лийыныт. Капкаш кандаш лондеман тошкалтыш дене кӱзеныт.32Вара тудо мыйым эрвел капка гоч кӧргӧ кудывечыш пуртен да ты капка оралтым висен – тудыжо моло капка гаяк лийын.33Тушто улшо ӧрдыжысӧ пӧлем-влак, нунын кокласе меҥге да изи пырдыж-влак – чылажат моло капкасе гаяк лийын. Капка оралтыште да ончыл кыдежыште чыла могырым окна-влак лийыныт. Капка оралтын кужытшо витле кынергут, а лопкытшо коло вич кынергут лийыныт.34Тудын кыдежше-влак тӱжвал кудывечыш онченыт, меҥге вуйлаште кок велымат пальмыла койшо сӧрастарыш-влак лийыныт. Капкаш кандаш лондеман тошкалтыш дене кӱзеныт.35Вара тудо мыйым йӱдвел капка дек конден да тудым висен – тудыжо моло капка гаяк лийын.36Туштат ӧрдыжысӧ пӧлем-влак, нунын кокласе меҥге ден изи пырдыж-влак моло капкасе гаяк лийыныт. Чыла могырым окна-влак верланеныт. Капка оралтын кужытшо витле кынергут, а лопкытшо коло вич кынергут лийыныт.37Кыдежше-влак тӱжвал кудывечыш онченыт, меҥге вуйлаште кок велымат пальмыла койшо сӧрастарыш-влак лийыныт. Капкаш кандаш лондеман тошкалтыш дене кӱзеныт.38Капка оралтын меҥгыж-влак пелен пӧлем лийын, тушто йӱлалтен пуымо надырым мушкыныт.39А капка оралтын ончыл кыдежыштыже кок могырым кок ӱстел дене шоген – тушто йӱлалтен пуымо, сулык верч да титак верч кондымо надыр вольыкым шӱшкылыныт.40Йӱдвел капка оралтыш кӱзымӧ верын кок могырыштыжат кок ӱстел дене шоген.41Тыгеракын, капкаш пурымо верын пырдыжше воктене тӱжвалне да кӧргыштӧ ныл ӱстел дене лийын – чылаже кандаше, тушан надыр вольыкым шӱшкылыныт.42Йӱлалтен пуымо надырым ямдылаш манын, тӧр руымо кӱ гыч ыштыме ныл ӱстел лийын – кажныжын кужытшо ик кынергутат пеле, лопкытшо кынергутат пеле да кӱкшытшӧ ик кынергут лийыныт. Тушто йӱлалтен пуымо надыр ден моло надырым шӱшкылмӧ ӱзгар киен.43Оралте пырдыжыште йырым-йыр сово кутышан сагыле-влак лийыныт, а ӱстембаке надыр шылым пыштеныт.44Кӧргӧ капка шеҥгелне, кӧргӧ кудывечыште, мурызо-влаклан кок пӧлем лийын: иктыже, йӱдвел капка пелен улшыжо, кечывалвелке ончен, весыже кечывалвел капка пелен лийын да йӱдвелкыла ончен.45Тиде пӧръеҥ мыланем каласен: «Кечывалвелке ончышо пӧлем – храмыште служитлыше иерей-влаклан.46Йӱдвелке ончышо пӧлем – жертвенник пелен служитлыше иерей-шамычлан. Нине иерей-влак Садокын тукымжо гыч улыт. Левий тукым эрге-влак кокла гыч нуно гына Господь дек лишемын да Тудлан служитлен кертыт».47Тудо кӧргӧ кудывечым висен. Тудыжо ныл лукан лийын: кужытшо – шӱдӧ кынергут да лопкытшо – шӱдӧ кынергут. Храм ончылно жертвенник шоген.48Вара тудо мыйым храмыш пурымо кыдеж деке конден да меҥгыже-влакым висен: нунын кажне могыржо вич кынергут лопкытан лийын. Пурымо верын лопкытшо латныл кынергут, а кок могырым улшо пырдыжын кужытшо кум кынергут лийыныт.49Ты кыдежын кужытшо – коло кынергут, лопкытшо – латик кынергут. Тушко лу тошкалтыш дене кӱзеныт. Меҥге-влак воктене колонно-шамыч шогеныт: иктыже – ик могырым, весыже – вес могырым.
Institute for Bible Translation, Finland