Иез33
1Мылам Господьын шомакше лийын:2«Айдеме эрге! Шке калыкетын эргыж-влаклан шомакым ойло, нунылан каласе: Мый иктаж-могай мланде ӱмбаке кердым колтем гын, а ты мландыште илыше-шамыч шке коклашт гыч еҥым ойырен налыт да оролыштлан шогалтат,3да тудо, шке элже ӱмбак толшо кердым ужын, пучым пуалта да калыкым шижтара,4но элысе калык кокла гыч иктаж-кӧ, пуч йӱкым колмеке, тудым шотыш ок нал, да керде толеш да тудым пуштеш гын, ты еҥ колымыжлан шке титакан лиеш.5Пуч йӱкым колын, но шотыш налын огыл, сандене колымыжлан тудо шке титакан. А шотыш налеш гын, илышыжым утарен кода ыле.6Но орол, толшо кердым ужын, пучым ок пуалте да калыкым ок шижтаре гын, тунам керде толеш да нунын кокла гыч иктаж-кӧм пуштеш гын, ты еҥ шке сулыкшылан кӧра кола, а тудын колымыжлан орол титакан лиеш.7Айдеме эрге, Мый тыйым Израиль калыкын оролжылан шогалтенам. Тый Мыйын умшам гыч лекше шомакым колышташ да Мыйын шижтарен ойлымем Израиль калыклан увертараш тӱҥалат.8Кунам Мый осал пашам ыштыше еҥлан каласем: ”Осал еҥ, тый колет”, а тый, тудым осал корныж гыч кораҥдаш манын, нимом от ойло – тиде осал еҥ шке сулыкшылан кӧра кола, а колымыжлан мут кучаш Мый тыйым шогалтем.9Но тый осал еҥым ”уда корнет гыч кораҥ” манын шижтарет гын, а тудо тидым ок ыште – тудо шке сулыкшылан кӧра кола, а тый шке чонетым арален кодет.10Айдеме эрге, Израиль калыклан каласе: ”Те ойледа: ’Осал пашана ден сулыкна-влак мемнам темдат, ме нунын верч мерчена. Кузе ме илыше кодын кертына?’”11Каласе нунылан: ”Шкем дене товатлем, – ойла Господь Юмо, – сулыкан еҥлан Мый колымашым ом шоно, тудо шке осал корныж гыч кораҥже да илыше кодшо манын шонем! Кораҥза, кораҥза осал корныда гыч! Молан тыланда колаш, Израиль калык?”12Айдеме эрге, шке калыкетлан каласе: ”Чын ыштыше еҥ сулыкым ышта гын, ончычсо чын ыштымашыже тудым ок утаре. А осалым ыштыше еҥ шке осал пашаж деч кораҥеш гын, ондак ыштыме осал пашажлан ок коло. Тыгак чын ыштыше еҥ сулыкым ышташ тӱҥалеш гын, ондак ыштыме чын пашаже тудлан ок полшо – тудо илыше ок код.13Кунам Мый чын ыштыше еҥлан ’тый илаш тӱҥалат’ манам, а тудо чыным ыштен илымыжлан инана да осал пашам ышта – тудын чын пашаже-влак шарналтыме огыт лий, да осал пашам ыштымыжлан тудо кола.14А кунам осал еҥлан каласем: ’Тый чынжымак колет’, но тудо сулыкшо деч кораҥеш да чын паша ден чынлыкым ышташ тӱҥалеш:15залоглан налмым мӧҥгеш пуа, шолыштмым пӧртылта, илышым пуышо закон-влак почеш ила да тетла осал пашам ок ыште – тудо ок коло, чынжымак илаш тӱҥалеш.16Ондак ыштыме чыла сулыкшо огеш шарналт, вет тудо ынде чын паша ден чынлыкым ышта, сандене илыше кодеш.17Тыйын калыкетын еҥже-влак тыге ойлат: ’Господьын корныжо чын огыл!’ Уке, тиде нунын корнышт чын огыл!18Чын ыштыше еҥ чыным ыштымыжым чарна да осал пашам ышташ тӱҥалеш гын, тудо кола.19А осалым ыштыше еҥ осал корныж гыч кораҥеш да чын паша ден чынлыкым ышташ тӱҥалеш гын, тудо илыше кодеш.20А те ойледа: ’Господьын корныжо чын огыл!’ Израиль калык, Мый тендам кажныжым коштмо корныда почеш судитлаш тӱҥалам”».21Пленыш наҥгайыме деч вара латкокымшо ийын луымшо тылзыжын визымше кечынже мый декем Иерусалим гыч утлен куржшо ик еҥ толын да каласен: «Олам руалтен налыныт!»22Но эше кастенак, тиде еҥын толмыж деч ончыч, мыйын ӱмбалнем Господьын кидше лийын. Господь тиде еҥын эрдене толмыж деч ончыч мыйын умшам почын. Мыйын умшам почылтын, да мый кутыраш тӱҥалынам.23Мылам Господьын шомакше лийын:24«Айдеме эрге! Израиль мландын пустаҥше верлаштыже илаш кодшо-влак тыге ойлат: ”Авраам шкетын улмаш, да тиде мланде тудлан пуымо лийын. А ме шукын улына, тиде мланде мыланна пуалтын!”25Каласе нунылан: ”Господь Юмо тыге ойла: те шылым вӱрге кочкыда, ончалтышдам шояк юмо-влак велыш савыреда, вӱрым йоктареда – эше тиде мландым кучен илынеда?26Те кердылан инанен иледа, йырнык пашам ыштылыда, вес еҥын ватыжым шакшыледа! Тыланда мо тиде мландым кучен илаш?”27Теве мом нунылан каласе: ”Тыге Господь Юмо ойла: Шкем дене товатлем! Пустаҥдыме верлаште илыше-влак керде деч пытат, чара пасушто улшо-шамычым янлыклан кочкаш пуэм, а карман ден курыкпомышто шинчыше-влак шучко чер деч колат.28Мый тиде мландым ошманурыш савырем, тудын кугешныше вий-куатше йомеш, Израильын курыкшо-влак пустаҥыт, тушто нигӧ кошташ ок тӱҥал.29Кунам нунын ыштыме чыла йырнык пашаштлан Мый тиде мландым кошкышо ир мландыш савырем, нуно пален налыт: Мый Господь улам”.30А тыйын нергенет, айдеме эрге, калыкетын эргыже-шамыч пырдыж ден пӧрт омса воктене кутыркалат, икте-весыштлан тыге ойлат: ”Каена, колыштына – Господь деч могай шомак лийын!”31Нуно тый декет калык погынымашыш толмо семын толыт. Мыйын калыкем тыйын ваштарешет шинчеш да шомакетым колыштеш, но тудым ок шукто. Шомакышт дене нуно сайла кояш тӧчат, а шӱмышт лач пайдам кычалеш.32Тый нунылан йӧратымаш нерген моторын мурышо да сайын шоктышо еҥ гай улат. Нуно шомакетым колыштыт, но огыт шукто.33Но кунам шомакет-влак шукталтыт – нуно шукталташат тӱҥалыныт – пален налыт: нунын коклаште пророк лийын».
Institute for Bible Translation, Finland