Иез13
1Мыланем Господьын шомакше лийын:2«Айдеме эрге! Израильын пророкшо-влак ваштареш пророк шомакым ойло, шке шонымашыштым пророк шомак семын ойлышо-влаклан каласе: ”Колыштса Господьын шомакшым!3Тыге ойла Господь Юмо: Ушдымо пророк-влаклан ойго! Нуно шке шӱлышышт дене виктарыме улыт, нимогай кончымашым огыт уж!4Пророк-влакет, Израиль, шалатыме ола олмышто илыше рывыж гай улыт!5Господьын кечынже кредалме годым пырдыж чоткыдын шогыжо манын, те шелше деке шогалын огыдал, Израиль калыкым аралыше пырдыжым олмыктен огыдал.6Нунын кончымашышт – пуста, ончык ужмашышт – шояк. Нуно ойлат: ’Господь каласен’, но Господь нуным колтен огыл. Да нуно эше шомакышт шукталтмым вучен коштыт!7Пуста кончымашым огыл мо те ужында? Шояк ужмашым огыл мо увертаренда? Мый ойлен омыл гынат, те ’Господь каласен’ манында.8Сандене Господь Юмо тыге ойла: пуста шомакым ойлымыланда да шояк кончымашым ужмыланда Мый тендан ваштареш шогалам, – ойла Господь Юмо. –9Мыйын кидем шояк кончымашым ужшо да ондалыше ончык ужмашым ойлышо пророк-влак ваштареш лиеш. Нуно Мыйын калыкемын погынымаштыже огыт лий, лӱмыштым израиль эрге-влакын лӱмерышкышт огыт возо, Израиль мландыш огыт пуро. Тунам те пален налыда: Мый Господь Юмо улам.10Нуно Мыйын калыкем чын корно гыч кораҥдат, вет тыныс уке гынат, ’тыныс’ манын ойлат. Мыйын калыкем начар пырдыжым чоҥа, а нуно тудым штукатурко дене йыгат”.11Сандене пырдыжым йыгыше-влаклан каласе: ”Тудо вашке камвозеш. Кугу йӱр йӱреш, кӱ гай шолем толеш, да тудым тӱтан мардеж шалата.12Кунам пырдыж сӱмырла, тендан деч огыт йод мо: ’Кушто йыгыме штукатуркыда?’13Сандене Господь Юмо тыге ойла: Шыдем дене Мый тӱтан мардежым колтем, чот сырымем дене кугу йӱр йӱраш да кӱ гай шолем велаш тӱҥалыт. Нуно чыла пытарат.14Йыгыме пырдыждам Мый шалатем, мландымбаке сӱмырем, да тудын негызше кояш тӱҥалеш. Кунам пырдыж сӱмырла, тудын дене пырля теат пытеда. Тунам пален налыда: Мый Господь улам.15Тыге Мый уло шыдем пырдыж ӱмбаке да тудым йыгыше-влак ӱмбаке опталам. Мый тыланда каласем: уке тетла пырдыж, уке улыт тудым йыгыше-влак –16Израильын пророкшо-шамыч, кӧмыт Иерусалим нерген пророк шомакым ойленыт. Вет тыныс лийын огыл гынат, нуно тынысым сӧрышӧ кончымаш-влакым увертареныт, – ойла Господь Юмо”.17А кызыт, айдеме эрге, шке чуриетым калыкетын ӱдыржӧ-влак деке савыре, нунышт шке шонымашыштым пророк шомак семын ойлат. Пророкло нунын ваштареш,18каласе: ”Тыге ойла Господь Юмо: Ойго ӱдырамаш-шамычлан, кӧмыт, чон-влакым оптышыш кучаш манын, кидышкышт юзо калтам пунен сакалтат, чыла ийготан-влаклан вуй леведышым ургат! Мыйын калыкем оптышыш кучен, шке чондам утарен кодена манын шонеда мо?19Икмыняр кормыж шож ден кинде катышлан кӧра те Мыйым калыкем ончылно шӱктаренда. Кӧмыт колышаш огытыл, нуным колымашлан пуэнда, кӧмыт илышаш огытыл – илышым коденда. Мыйын калыкем ондален, те тидым ыштен кертында, а тудыжо шоякым колыштын!20Сандене Господь Юмо тыге ойла: Юзо калта-влакдам, кудын дене те чон-влакым кайык семын кучеда, ужмем ок шу. Мый нуным кидда гыч кӱрлам да кайык семын кучымо чон-влакым эрыкыш колтем.21Вуй леведыш-влакдам Мый кушкедам да тендан кид гыч шке калыкем утарем, тудым тетла те огыда кучо. Тунам пален налыда: Мый Господь улам.22Чын ыштыше еҥым, кӧм Мый ойгандараш шонен омыл, те шке шоякда дене ойгандаренда. А осал еҥ-влак шке корнышт гыч ынышт кораҥ да илышыштым арален ынышт кодо манын, те нуным кумылаҥден шогенда.23Сандене те ончыкшым пуста кончымаш-влакым ужаш да шояк ужмашым ойлаш огыда тӱҥал. Мый тендан кид гыч шке калыкем утарем, да те пален налыда: Мый Господь улам!”»
Institute for Bible Translation, Finland