Лекм32
1Моисей курык гыч кужу жап волен огыл. Тидым ужмеке, калык Аарон деке погынен да тудлан каласен: «Кынел, мыланна юмым ыште, тудо мемнан деч ончыч кайыже. Египет гыч мемнам лукшо Моисей дене мо лийын – ме огына пале».2Аарон нунылан каласен: «Шке ватыдан, эргыдан да ӱдырдан пылышышт гыч шӧртньӧ кӧржыштым мучыштарыза да мый декем кондыза».3Уло калык шке пылышыж гыч шӧртньӧ кӧржым мучыштарен да Аарон деке конден.4Тудыжо кидышт гыч кӧрж-влакым налын да, нуным левыктен, ӱшкыжым велен ыштен, вара калыплен саемден. Нуно каласеныт: «Израиль, теве тыйым Египет мланде гыч лукшо юмет!»5Тидым ужын, Аарон ӱшкыж ончылан жертвенникым шогалтен да увертарен: «Эрла Господьын пайремже!»6Вес кечын нуно эрден эр кынелыныт, йӱлалтен пуымо надыр ден татулык надырым конденыт. Калык кочкаш да йӱаш шинчын, а вара намысдымын веселитлаш тӱҥалын.7Господь Моисейлан каласен: «Воло вашкерак [тышечын], вет тыйын Египет гыч лукмо калыкет пужлен пытен.8Мыйын кӱштымӧ корнем гыч нуно вашке кораҥыныт: шкаланышт ӱшкыжым велен ыштеныт, тудлан кумалыныт да надырым конденыт. ”Израиль, теве тыйым Египет мланде гыч лукшо юмет!” – ойлат нуно».9Господь Моисейлан эше каласен: «Мый ужам: тиде калык ӱскырт.10Коден кай кызыт Мыйым. Тек Мыйын шыдем нунын ваштареш ылыжеш: Мый нуным пытарем. А тый дечет шуко еҥан калыкым ыштем».11Но Моисей Господьым, шке Юмыжым, сӧрвалаш тӱҥалын: «Господь, молан Тылат шке калыкетлан шыдешкаш? Вет тудым Тый кугу куатет да пеҥгыде кидет дене Египет мланде гыч луктынат.12Египтян-влак тыге ойлен кертыт: ”Господь шке калыкшым Египет гыч курык лоҥгаште пушташ, мландымбач ӱштыл шуаш луктын!” Йодам, шке шыде тулетым йӧртӧ, шке калыкетым пытараш шоныметым вашталте!13Шарналте Авраам, Исаак да Израиль [Иаков] тарзет-влакым. Нунылан Тый Шке денет товатленат: ”Тендан тукымдам кавасе шӱдыр наре шукемден шукемдем. Мыйын сӧрымӧ пӱтынь тиде мландым Мый тендан тукымланда пуэм, нуно курым-курымеш тудын озаже лийыт”».14Тунам Господь калыкым пытараш шонымыжым вашталтен да мом каласымыжым шуктыде коден.15Моисей савырнен да курык гыч волен, кидыштыже кок ойпидыш кӱоҥа лийын, нуно кок велымат возымо лийыныт.16Нине кӱоҥам Юмо Шке ыштен да тушко шке кидше дене возен.17Иисус калыкын йӱкланымыжым колын да Моисейлан каласен: «Станыште кредалме йӱк шокта!»18Но Моисей каласен: «Тиде сеҥыше-влакын кычкырымышт огыл, сеҥалтше-влакынат магырымышт огыл. Мый мурымо йӱкым колам!»19Кунам Моисей стан деке лишемын да шӧртньӧ ӱшкыж ден куштымашым ужын, тудын шыдыже ылыжын: кидше гыч кок кӱоҥам кудалтен, нуным курыкйол воктене шалатен.20Моисей калыкын ыштыме ӱшкыжшым налын да тулеш йӱлалтен. Вара тудым, шурен тыгыдемден, пуракыш савырен да вӱдыш шавалтен, тидым израиль эрге-влаклан йӱктен.21Моисей Ааронлан каласен: «Тиде калык тыланет мом ыштен, вет тый тудым пеш кугу сулыкыш пуртенат?»22Аарон [Моисейлан] вашештен: «Ит шыдешке, мыйын озам. Тый шкат палет: тиде калык осал могырыш пеш куштылгын лупшалтеш.23Нуно мылам каласышт: ”Мыланна юмым ыште, тудо мемнан деч ончыч кайыже. Египет гыч мемнам лукшо Моисей дене мо лийын – ме огына пале”.24Тунам мый нунылан каласышым: ”Кӧн шӧртньыжӧ уло, ӱмбачда мучыштарыза”. Нуно [мучыштарышт да] мылам пуышт, мый тиде шӧртньым тулыш кудалтышым да ӱшкыж лекте».25Моисей ужын: тиде калык – кучен кертдыме, а Аарон тудлан эрыкым пуэн, тушман ончылно намысыш пуртен.26Тунам Моисей станыш пурымо вер деке шогалын да каласен: «Кӧ Господьын, мый декем толза!» Тудын деке Левий тукым эрге-влак погыненыт.27Тудо нунылан каласен: «Господь, Израиль Юмо, тыге ойла: ”Кажныже шке кердыдам кыдалышкыда сакыза. Станын ик могырым пурымо вер деч вес могырыш да мӧҥгеш эртыза, да кажныже иза-шольыдамат, йолташдамат, лишыл еҥдамат пуштса”».28Левий тукым эрге-влак Моисей каласыме семынак ыштеныт: тудо кечын калык гыч кум тӱжем еҥ наре пытен.29Моисей [нунылан] каласен: «Таче шке эргыда, иза-шольыда ваштареш каенда, тыге Господьлан служитлаш шогалтыме лийында, да таче Тудо тыланда суапландарымашым колта».30Эрлашыжым Моисей калыклан каласен: «Те пеш кугу сулыкым ыштенда. Мый Господь деке курыкыш кӱзем. Ала тендан сулыкдам кудалтыктен кертам?»31Моисей Господь деке пӧртылын да каласен: «О, [Господь,] тиде калык кугу сулыкыш пурен: шкаланже шӧртньӧ юмым ыштен.32Кудалте нунын сулыкыштым, а уке гын мыйынат лӱмем шке книгат гыч ӱштыл шу».33Господь Моисейлан каласен: «Кӧ Мыйын ончылно сулыкыш пурен, тудын лӱмжым шке книгам гыч ӱштыл шуэм.34Кай кызыт, [воло]. Кушко Мый тиде калыкым наҥгаяш каласенам, тушко наҥгай. Мыйын Суксем тыйын ончылнет каяш тӱҥалеш. А кунам мут кучыктымо кече шуэш, нуно Мыйын ончылнем шке сулыкыштлан мутым кучат».35Ааронлан шӧртньӧ ӱшкыжым ыштыктымыштлан Господь калыклан эҥгекым колтен.
Institute for Bible Translation, Finland