Лекм13
1Господь Моисейлан тыге каласен:2«Израиль калык коклаште шочшо кажне икымше эрге азам, авагудын икымше саскажым, айдеме гыч тӱҥалын вольык марте, Мыланем святитле – нуно Мыйын улыт».3Моисей калыклан каласен: «Египет гыч, кул лийме вер гыч, лекме тиде кечым шарныза – Господь тендам тушечын виян кидше дене луктын. Шушо руаш гыч ыштымым ида коч.4Таче, авив тылзын, те тышеч лектыда.5Кунам Господь [Юмет] тыйым хананей, хеттей, аморрей, евей да иевусей, [гергесей да ферезей-влакын] шӧр да мӱй йогыман мландышкышт намиен шукта, – тиде мландым пуаш Тудо ача-кочат-влаклан товатлен, – тунам тиде тылзын Тудлан тыгай пайрем йӱлам шукто.6Шым кече шергиндым гына коч, а шымше кечын – Господь лӱмеш пайрем.7Шергиндым тый шым кече кочшаш улат. Шушо руаш дене пыштыме кинде тыйын ынже лий, тыйын илыме вершӧрыштет ру ынже лий.8Тудо кечын шке эргычлан увертаре: ”Египет мланде гыч лекмем годым Господь [Юмын] мыланем мом ыштымыжым шарнаш манын, мый тиде йӱлам шуктем”.9Господьын законжо йылмыштет лийже манын, тек тиде йӱла тыйын кидыштет пале да саҥгаштет шарныктыш семын лиеш. Вет тыйым Господь [Юмо] виян кидше дене Египет гыч луктын.10Палемдыме жапыште ий гыч ийыш тый тиде законым шуктен шого.11Кунам Господь [Юмет] тылат да ача-кочат-влаклан товатлымыж семынак тыйым Ханаан мландышке намиен пурта да тиде мландым тыланет пуа,12тунам тый авагудын кажне икымше саскажым, [эрге азам,] Господьлан ойыро, тыгак мо уло вольыкетын икымше кажне узак шочшыжым Господьлан [пу].13Осёл кокла гыч эн ончыч шочшым пача дене алмаштен кертат, а от алмаште гын, тӱлен нал. Тыгак эргыч коклаште эн ончыч шочшымат тӱлен нал.14Илен-толын эргыч тый дечет ”Тиде йӱла мом ончыкта?” манын йодеш гын, тый тудлан вашеште: ”Господь виян кидше дене мемнам Египет гыч, кул лийме вер гыч, луктын.15Кунам фараон ӱскыртланен да мемнам колтен огыл, Господь Египет мландыште чыла икымше шочшым, айдеме гыч тӱҥалын вольык марте, пытарен. Сандене мый Господьлан чыла вольык авагудын икымше узак саскажым надыр шотеш кондем, а кажне кугэргым тӱлен налам.16Тек тидыже тыланет кидыштет да саҥгаштет пале семын лиеш, вет Господь виян кидше дене мемнам Египет гыч луктын”».17Кунам фараон Израиль калыкым колтен, Юмо тудым филистим мланде гоч эртыше корно дене наҥгаен огыл, кеч тудыжо эн кӱчык лийын. «Кредалаш логалеш гын, калык ӧкынен мӧҥгеш Египетыш пӧртыл кертеш», – Юмо каласен.18Калыкым Юмо Йошкар теҥыз деке ир мланде гоч йыргорно дене наҥгаен. Израиль эрге-влак Египет мланде гыч саргурал дене лектыныт.19Моисей пеленже Иосифын лулегыжым налын, вет Иосиф израиль эрге-влак деч товатлен сӧрымӧ мутым налын. Тудо каласен: «Кунам Юмо тендам утараш толеш, те мыйын лулегем Египет гыч наҥгайыза».20[Израиль эрге-влак] Сокхоф гыч тарваненыт да станыштым Ефамыште, ир мланде мучаште, шогалтеныт.21Нуно йӱдымат, кечывалымат каен кертышт манын, Господь нунын ончыч каен: корныштым кечывалым пыл меҥге дене ончыктен, а йӱдым тул меҥге дене волгалтарен.22Калык дечын кечывалым пыл меҥге, а йӱдым тул меҥге ойырлен огытыл.
Institute for Bible Translation, Finland