Лекм1
1Теве Иаков [ачашт] дене пырля Египетыш шке ешышт дене толшо Израиль эрге-влакын лӱмышт:2Рувим, Симеон, Левий ден Иуда,3Иссахар, Завулон ден Вениамин,4Дан ден Неффалим, Гад ден Асир.5Иаков тукымысо пӧръеҥ чылаже шымле [вич] еҥ улмаш, а Иосиф тунам Египетыште лийын.6Иосиф, тудын иза-шольыжо-влак да тунам илыше тукым варажым чыланат колен пытеныт.7А Израиль тукым пеш чот тӱлаҥын да шукемын, кушкын да вияҥын – тусо мланде нунын дене темын.8Египетым вуйлаташ у кугыжа шогалын, тудыжо Иосифым пален огыл.9У кугыжа шке калыкшылан каласен: «Израиль калык шукемын да мемнан деч виянрак лийын.10Тудо умбакыже ынже шукем манын, айста ынде ме ушанрак лийына. Уке гын, сар тӱҥалме годым нуно мемнан тушманна дене пырля ушнат да мемнан ваштареш шогалыт, а вара мемнан мланде гыч лектын каят».11Израиль тукымым неле паша дене индырашлан вуйлатен шогышо-влакым палемденыт. Шапашым аралаш манын, тиде калык фараонлан Пифом ден Раамсес ола-влакым чоҥен. [Израиль еҥ-влак тыгак Он, вес лӱмжӧ Илиополь, олам чоҥеныт.]12Но кеч-мыняр индыреныт гынат, нуно эшеат шукемыныт, шарленыт. Египтян-влак нунын деч лӱдаш тӱҥалыныт,13сандене израиль эрге-влаклан эшеат неле пашам ыштыктеныт.14Израиль калыкын илышыже шун да кермыч, пасу да моло тӱрлӧ пашаште пеш кочо да неле лийын. Нуным паша дене чот тӱнчыктареныт.15Египет кугыжа еврей ӱдырамаш-влакын павышкаштлан – иктыжын лӱмжӧ Шифра, весыжын Фуа лийын – тыге кӱштен каласен:16«Кунам те еврей ӱдырамаш-влаклан азам ышташ полшеда, ончыза: эрге шочеш гын – пуштса, ӱдыр гын – тек ила».17Но павышка-влак Юмо деч лӱдыныт да Египет кугыжан ойлымыж семын ыштен огытыл: эрге аза-влакымат илышым коденыт.18Египет кугыжа павышка-влакым ӱжыктен да нунын деч йодын: «Молан тыге ыштеда – эрге аза-влакымат илышым кодеда?»19«Еврей ӱдырамаш-влак Египетысе гай огытыл, нуно таза улыт – азаштым мемнан миен шумо деч ончычак ыштат», – павышка-влак фараонлан вашештеныт.20Тыге ыштымыштлан Юмо павышка-влакланат порылыкым ыштен. А еврей калык шукемын да пеш вияҥын толын.21Павышка-влак Юмо деч лӱдыныт, сандене Юмо нунын ешыштым суапландарен.22Тунам фараон шке калыкшылан кӱштен: «[Еврей деч] шочшо чыла эрге азам Нил эҥерыш кудалтыза, а ӱдыр азам чылаштым илышым кодыза».
Institute for Bible Translation, Finland