Есф9
1Латкокымшо – адар – тылзын латкумшо кечынже кугыжан пунчалже шукталтшаш улмаш. Тиде кечын иудей-влакым тушманышт шке кид йымакышт налнешт улмаш, но мӧҥгешла лектын – нуным иудей-влак шке кид йымакышт налыныт.2Тунам Артаксерксын вуйлатыме чыла кундемыштыже иудей-влак шке илыме олалаштышт, нунылан осалым шонышо тушманышт ӱмбаке кержалташ манын, иквереш чумыргеныт. Нунын ваштареш нигӧ шоген кертын огыл, вет чыла калыкым нунын деч лӱдмаш авалтен.3Чыла кундемысе он ден сатрап-влак, кундемласе вуйлатыше ден кугыжан еҥже-влак иудей калык велне лийыныт – нуно чыланат Мардохей деч лӱдыныт.4Вет Мардохей кугыжан полатыште ынде пеш кугу верым налын да тудын чапше чыла кундемыштат шарлен улмаш. Тиде айдеме кӱшкырак да кӱшкырак кӱзен.5Иудей-влак шке тушманыштым кырен шалатеныт: нуным керде дене руэныт, пуштеденыт, пытареныт, нунын дене мом шоненыт, тудым ыштеныт.6Суза оласе карманыште иудей-влак вичшӱдӧ еҥым пуштыныт.7Нуно тыгак Паршандафам, Далфоным, Асфафам,8Порафам, Адальям, Аридафам,9Пармашфам, Арисайым, Аридайым да Ваиезафам –10Амадафын Аман эргыжын, иудей-влакын кугу тушманжын, лу эргыжым – пуштыныт, но погыштым тӱкен огытыл.11Суза оласе карманыште мыняр еҥым пуштмо нерген уверым кугыжалан тудо кечынак намиен шуктеныт.12Кугыжа Есфирь ватыжлан каласен: «Суза оласе карманыште иудей-влак вичшӱдӧ еҥым да Аманын лу эргыжым пуштыныт. А кугыжан моло кундемыштыже мо ышталтын? Тыйын эше могай йодмашет уло? Мый тудым шуктем. Тыланет эше мо кӱлеш? Тидымат мый тыланет пуэм».13Есфирь вашештен: «Кугыжалан келша гын, тек Суза оласе иудей-влаклан таче мом ыштымыштым эрлат шуяш кертыжым пуат. А Аманын лу эргыжын капыштым тек меҥгеш сакат».14Кугыжа тыгак ышташ кӱштен – Сузаште тиде пунчалым увертареныт, а Аманын лу эргыжын капыштым меҥгеш сакеныт.15Суза оласе иудей-влак адар тылзын латнылымше кечынжат иквереш погыненыт да тиде олаште эше кумшӱдӧ еҥым пуштыныт, но нунын погыштым тӱкен огытыл.16Кугыжанышын моло кундемыштыжат иудей-влак, иквереш чумырген, шке илышыштым аралаш да тушманышт деч утаралташ кынелыныт. Иудей-влак чылаже шымле вич тӱжем тушманыштым пуштыныт, но погыштым тӱкен огытыл.17Чыла тиде адар тылзын латкумшо кечынже лийын, а латнылымше кечын иудей-влак каненыт да тиде кечым куанле пайрем семын палемдаш тӱҥалыныт.18А Сузысо иудей-влак латкумшо кечынжат, латнылымше кечынжат иквереш погыненыт. Нуно тиде тылзын латвизымше кечынже каненыт да тудым куанле пайрем семын палемдаш тӱҥалыныт.19Сандене яллаште илыше иудей-влак адар тылзын латнылымше кечыжым пайрем семын куанен, кочкын-йӱын палемдат, ваш-ваш пӧлекым ыштат. [А кугу олалаште илыше-влак латвизымше кечынат поро кумыл дене веселитлат, икте-весыштлан пӧлекым пуэдат.]20Мардохей чыла тидын нерген возен да Артаксеркс кугыжан вуйлатыме чыла кундемыштыже илыше иудей-влаклан, лишыл ден торасе-влакланат, серышым колтен.21Серышыште тыге возымо лийын: «Иудей-влак кажне ийын адар тылзын латнылымше да латвизымше кечыжым пайрем семын палемдышаш улыт.22Вет нине кечын иудей-влак тушманышт деч утаралтыныт, тиде тылзыште нунын ойгышт куанышке, шортмышт пайремышке савырнен. Нине кечым иудей-влак пайрем семын куанен, кочкын-йӱын, ваш-ваш тӱрлӧ кочкыш сийым колтеден да йорло-влаклан пӧлекым пуэден палемдышаш улыт».23Нунын тыге ыштымышт – мо нерген нунылан Мардохей возен – тидын деч вара иудей калыкын йӱлашкыже пурен.24Вет Вугей тукым гыч Аман, Амадафын эргыже, иудей-влакын тушманже, чыла иудейым пушташ шонен пыштен да, нуным пытараш манын, пурым – шеревам – кышкен.25Но кунам Есфирь кугыжа дек миен, кугыжа у пунчалже дене Аманын иудей-влакым пытараш шонымыжым лугыч ыштен, да Аманын шучко шонымашыже шкаланжак пӧртылын – тудым шкенжымат, эргыж-влакымат меҥгеш сакеныт.26Садланак нине кече-влакым Пурим манын лӱмденыт, тудо «пур» шомак гыч лектын. [Тидыже нунын йылмыштышт «шерева» манмым ончыкта.] Мардохейын серышыж дене келшышын, тыгак шке ужмыштым да нунын дене мо лиймым шотыш налын,27иудей-влак шкаланышт, шочшыштлан да чылалан, кӧ нунын деке ушна, тыге ыштен шогымым йӱлаш пуртеныт: нине кок кечым, серышыште каласыме семынак, кажне ийын палемдыме жапыште пайремлаш.28Чыла кундем ден олаште кажне еш нине кечым тукым гыч тукымыш шарнен шогышаш да пайрем семын палемдышаш. Иудей-шамыч Пурим кече-влакым пайремлымым чарнышаш огытыл, нунын ончыкылык тукымыштат тидын нерген нигунамат мондышаш огытыл.29Пурим нерген ондак возымым шуктен шогышт манын, кугыжанвате Есфирят, Абихаилын ӱдыржӧ, иудей Мардохей дене пырля возымо вес серышыштыже шке кучемвийже дене пеҥгыдемден.30А Артаксерксын кугыжанышышкыже пурышо шӱдӧ коло шым кундемыште илыше иудей-влаклан тыныслык ден эсенлыкым тыланымашан серыш-влакым колтеныт.31Тушто Пурим кече-влакым иудей Мардохей ден кугыжанвате Есфирьын ончыктымо жапыште палемден шогаш кӱштымӧ. Нине кече-влакым иудей калыкын шкаланже да шочшыж-влаклан палемдыме пӱтым кучымо да магырен шортмо кече-влакым палемдыме семынак палемдыман.32Тыге Есфирь шке кӱштымашыж дене Пурим пайремым пеҥгыдемден, да тидын нерген книгашке возеныт.
Institute for Bible Translation, Finland