Зак.уш9
1Колышт, Израиль! Вашке тый Иорданым вончет, шке дечет шукырак да виянрак калык-влакым поктен колтет. Олашт нунын кугу, пырдыжышт кавашке шуыт.2Калык тушто виян да кугу капан. Тиде – енак-влак, нунын нерген тый палет да колынат тыге ойлымым: ”Кӧ енак-влак ваштареш шоген кертеш?”3Но пален шого: ончычет Господь, тыйын Юмет, чыла пытарыше тул семын кая. Господь нине калыкым пытара, нуным тыйын кидыш пуа. Господьын каласымыж семынак, тый нуным поктен колтет, нуным вашке пытарет.4Кунам Господь, тыйын Юмет, нуным чурий ончычет поктен колта, шке семынет ит шоналте: ”Чын ыштымемлан кӧра Господь мыйым тышке конден да тиде [сай] мландым пуэн”. Уке, нине калыкым Господь тыйын ончычет осал пашаштлан кӧра поктен колта.5Тый чын ыштыметлан да чынле шӱметлан огыл нунын мландыштым сеҥен налаш кает. Господь Юмет нине калыкым тыйын чуриет ончыч осал пашашт [ден сулыкыштлан] кӧра поктен колта. Господь тыгак тыйын ача-кочат-влаклан – Авраамлан, Исааклан да Иаковлан – товатлыме мутшым шуктынеже.6Тыгеракын, пален лий: тыйын Господь Юмет тиде сай мландым тыланет чын ыштыметлан огыл илаш пуа. Вет те ӱскырт калык улыда.7Ир мландыште Господь Юметым шыдештарымет нерген шарне, тидым ит мондо. Египет мландым коден кайыме кече гыч тӱҥалын, тиде верыш толын шумешке, тый Господьлан эре торешланенат.8Хорив курык дене те Господьым чот сырыктенда, да Тудо шыдыж дене тендам пытараш ямде лийын.9Кунам мый Господьын тендан дене ыштыме ойпидышым возыман кок кӱоҥам налаш курыкыш кӱзенам, тушто кочде-йӱде нылле кече да нылле йӱд лийынам.10Господь мыланем шке кидше дене возымо кок кӱоҥам пуэн. Туштыжо погынымаш кечын курыкышто Господьын тыланда тул лоҥга гыч ойлымо чыла шомакше [возымо лийын].11Ойпидышым возыман нине кок кӱоҥам Господь мыланем нылле кече да нылле йӱд эртымеке пуэн.12Тудо мылам каласен: ”Кынел да вашкерак тышеч воло, тыйын Египет гыч лукмо калыкет пужлен пытен. Мыйын каяш кӱштымӧ корнем гыч нуно пеш вашке кораҥыныт! Нуно шкаланышт шояк юмым велен ыштеныт”.13Господь мылам эше каласен: ”Мый тиде калыкын ӱскырт улмыжым ужам, [тидын нерген Мый тылат шуко гана ойленам].14Мыйым чараш ит тӧчӧ – Мый нуным пытарем, лӱмыштым кава йымач ӱштыл шуэм. А тый дечет Мый вес калыкым ыштем, тудо нинын деч [кугурак,] виянрак да шукырак чотан лиеш”.15Тунам мый волгалт йӱлышӧ курык гыч волышым, кидыштем ойпидышым возыман кок кӱоҥа лийын.16Мый ужым: Господь Юмыда ончылно те сулыкыш пуренда – шкаланда ӱшкыж статуйым велен ыштенда. Господьын каяш кӱштымӧ корныж гыч те пеш вашке кораҥында.17Мый кок кӱоҥам нальым да мландыш кудалтышым, шинча ончылныда нуным шалатышым.18Господь ончылно кумык возын, мый [кокымшо гана] ончычсо семынак кочде-йӱде нылле кече да нылле йӱд тендан ыштыме чыла сулыкда верч кумалынам. Вет Господь [Юмыда] ончылно те осал пашам ыштенда, Тудын шыдыжым луктында.19Мый пеш лӱдынам, вет Господь тыланда тынар чот шыдешкен, эсогыл тендам пытараш ямде лийын. Но Господь мыйым ты ганат колыштын.20Тудо Ааронланат чот шыдешкен, тудымат пытарынеже ыле, но мый тунам Аарон верчынат кумальым.21А велен ыштыме ӱшкыждам, тендан сулыкдам, мый нальым да тулеш йӱлалтышым. Тудым мый шалатышым, шурен тыгыдемден, пуракыш савырышым да тиде пуракым курык гыч йоген волышо вӱдйогыныш кудалтышым.22Господь [Юмыдам] те Тавераштат, Массаштат, Киброт-Гаттааваштат шыдештаренда.23Кунам Господь тыланда Кадес-Варни гыч каяш кӱштен, тыге каласен: ”Кайыза да Мыйын тыланда пуымо мландым сеҥен налза”. Но те Господь Юмыдан кӱштымыжлан тореш лийында, Тудлан ӱшанен огыдал, мутшым колыштын огыдал.24Мыняр мый тендам палем, те нигунамат Господьым колыштын огыдал.25Нылле кече да нылле йӱд мый Господь ончылно кумык киенам да Тудым сӧрваленам, вет Господь ”тендам пытарем” манын.26Господьлан кумалын, мый тыге ойленам: ”Господь Юмем, [юмо-влакын Кугыжаже,] шке калыкетым ит пытаре. Тый нуным [кугу] куатет дене утаренат, [нӧлталме] виян кидет дене Египет гыч луктынат.27Шарналте шке тарзет-влакым: Авраамым, Исаакым да Иаковым, [нунылан Тый Шке денет товатленат]. Ит ончо тиде калыкын ӱскыртланымыжым, тудын осал пашажым да сулыкшым.28Уке гын Египетыште илыше-влак тыге каласен кертыт: ’Господь нуным сӧрымӧ мландышкыже пуртен кертын огыл. Тудо нуным ужмышудымо лийын да, ир мландыште пушташ манын, нуным тушко наҥгаен’.29А вет нуно Тыйын калыкет, Тыйын ужашет улыт. Тый нуным [Египет мланде гыч] шке кугу куатет да нӧлталме кидет дене луктынат!”
Institute for Bible Translation, Finland