Зак.уш3
1Тушечын ме савырнышна да Васаныш наҥгайыше корно дене кайышна. Васан кугыжа Ог, уло сарзывийжым поген, Едрей воктене мемнан ваштареш кредалаш лекте.2Господь мыланем каласыш: ”Ог деч ит лӱд, вет Мый тудым уло калыкше да мландыжге тыйын кидышкет пуэм. Кузе тый Есевонышто илыше аморрей кугыжа Сигон дене ыштенат, тидын денат тугак ыште”.3Тыге Господь, мемнан Юмына, Васанын Ог кугыжажым, тудын чыла сарзыжым мемнан кидыш пуыш. Ме нуным чылаштым пытарышна.4Тунам тудын чыла олажым икте кодде сеҥен нална: пӱтынь Аргов кундемым, Васанысе Огын кугыжанышыжым – чылаже кудло олам.5Чыла нине ола пеш сайын чоткыдемдыме лийыныт: кӱкшӧ пырдыжан, капкан да тӱкылтышан. Нунын деч посна ме пырдыж дене авырыдыме шуко моло оламат сеҥен нална.6Есевонысо Сигон кугыжам пытарыме семынак ме чыла нине олам, тушто илыше пӧръеҥ, ӱдырамаш да икшыве-влакым, Господьлан надыр шотеш пӧлеклен, пӱтынек пытарышна.7А уло вольыкым да руалтен налме погым ме шкаланна кодышна.8Тыге ме кок аморрей кугыжан мландыштым – Арнон эҥер деч Ермон курык марте шуйнышо, Иорданын ты велныже улшо мландым – поген нална.9Сидонышто илыше-влак Ермоным Сирион, а аморрей-влак Сенир маныт.10Ме тӧрверысе чыла олам, пӱтынь Галаадым да пӱтынь Васаным Салха ден Едрей марте сеҥен нална. Салха ден Едрейже Васанысе Огын кугыжанышыжын олаже-влак лийыныт.11Васанысе Ог кугыжа рефаим-влак кокла гыч шкетын кодын улмаш. Тудын колоткаже кӱртньӧ дене ыштыме лийын. Тыглай кынергут дене висымаште тудо индеш кынергут кужытан да ныл кынергут лопкытан лийын. Тиде колотка кызытат аммон-влакын Равва олаштышт.12Тунам сеҥен налме мланде гыч мый Рувим ден Гад тукым-влаклан Арнон эҥер серыште улшо Ароер ола деч йӱдвелкыла шуйналтше кундемым, тыгак Галаад курыкын пел ужашыжым олаштге пуышым.13А Галаадын вес пел ужашыжым да Васаным, Огын кугыжанышыжым, – пӱтынь Аргов кундемым Васан дене пырля – Манассийын пел тукымжылан пуышым. Васанжым ончыч рефаим мланде маныныт.14Иаир, Манассийын эргыже, пӱтынь Аргов кундемым Гесур ден Маахан мландышт марте сеҥен налын да тудлан шке лӱмжым пуэн. Садлан таче кечынат Васаным ”Иаир ял-влак” маныт.15Махирлан мый Галаадым,16а Рувим ден Гад тукым-влаклан Галаад деч Арнон эҥер деке шуйнышо мландым пуэнам. Тудыжо Арнон лапвер ден аммон-влакын чекыштлан шотлалтше Иавок изэҥер коклаште верланен.17Мый нунылан тыгак Иордан тӧрверым Киннереф гыч Шинчалан теҥыз да Фасга курыкын эрвел тайылже марте пуэнам.18Тунам мый тыланда, Иордан эҥер деч эрвелныла мландым налше тукым-влаклан, тыгай кӱштымашым пуэнам: ”Господь, тендан Юмыда, тиде мландым тыланда пуэн. Сарзылан йӧрышӧ чыла пӧръеҥда-влак, саргуралым кидыш налын, моло израиль калык ончыч кайышаш улыт.19А тендан ватыда, икшывыда да вольыкда, – тендан вольыкда шуко улмым мый палем, – тек мыйын тыланда пуымо олалаште кодыт.20Кунам Господь [Юмо] тыланда пуымо семынак тендан иза-шольыдаланат тыныслыкым пуа, да нуно Господь Юмыдан Иордан вес велне пуымо мландым сеҥен налыт, тунам те кажныже мыйын тыланда пуымо мландышкыда пӧртыл кертыда”.21Вара мый Иисуслан каласышым: ”Господь, тендан Юмыда, нине кок кугыжа дене мом ыштен, тый шке шинчат дене ужынат. Чыла кугыжаныш дене, кудын гоч эртен каяш тӱҥалат, Господь тидымак ышта.22Нунын деч ида лӱд: Господь, тендан Юмыда, тендан верч Шке кредалаш тӱҥалеш”.23Тунам мый Господьлан кумальым:24”Господь Юмем, Тый шке тарзетлан кӱдыратле улметым, [куатетым], [нӧлталме] виян кидетым ончыкташ тӱҥалынат. Каваште але мланде ӱмбалне Тыйын гай кӱдыратле пашам ыштыше вес юмо уло мо?25Мыланем Иорданым вончаш да эҥер вес велне улшо сай мландым, тиде мотор курыклам да Ливаным ужаш пу!”26Но тыланда верч Господь мыланем шыдешкен да мыйым колыштын огыл. Тудо каласен: ”Сита, Мыланем тидын нерген тетла ит ойло!27Фасга курык вуйыш кӱзӧ да касвелке, йӱдвелке, кечывалвелке да эрвелке ончал. Шинчат тиде мландым ужеш, но Иорданым тый от вончо.28Иисусым туныкто, тудым кумылаҥде да пеҥгыдемде. Вет калыкым тудо вӱден наҥгая, тыйын ужмо [пӱтынь] мландым нунылан тудо пайлен пуа”.29Ме Беф-Фегор ваштареш улшо лапвереш шогална.
Institute for Bible Translation, Finland