Дан8
1Валтасар кугыжан кумшо ий вуйлатымыж годым мыланем, Данииллан, ончыч ужмо кончымаш деч вара эше ик кончымаш лийын.2Тиде кончымаште мый Елам кундемысе Суза олан карманыштыже, Улай эҥер воктене лийынам.3Мый вуем нӧлталынам да ужынам: эҥер серыште тага шога. Тудын кок кугу тӱкыжӧ лийын, иктыже – кужурак, тудыжо варарак лектын.4Мый ужынам, кузе тиде тага касвелне, йӱдвелне да кечывалвелне мо лийын, чыла ӧрген. Нигӧ да нимо тудын ваштареш шоген але тудын деч утарен кертын огытыл. Тудо мом шонен, тудым ыштен, да эшеат виянрак лийын.5Тидым ончен шогымем годым мый ужынам: касвелым, пӱтынь мландым эртен, мландыш тӱкныде, казатага толеш. Тудын шинчаже коклаште кугу тӱкӧ лийын.6Тудо кок тӱкан тага деке, кудым мый эҥер воктене шогышым ужынам, каен да ӱмбакше кугу шыде дене кержалтын.7Мый ужынам: тудо тага деке лишемын да, эшеат чот ажгынен, тудым ӧргалын, кок тӱкыжге пудыртен. Тага тудын ваштареш шоген кертын огыл. Казатага тудым мландымбаке сӱмырен кудалтен да тошкен, тудым утарыше нигӧ лийын огыл.8Тунам казатага эшеат вияҥын, но, куатан лиймекше, кугу тӱкыжӧ пудырген да олмыштыжо ныл велыш ончышо кугу ныл тӱкӧ лектын.9Нунын кокла гыч иктыж гыч эше ик тӱкӧ лектын. Ончыч тудо изи лийын, но вара кушкын да кечывалвелыш, эрвелыш, тыгак Сӧрал Эл деке шуйнен.10Тудо кавасе виян арвыле декат шуын да тудын икмыняр ужашыжым, тыгак шӱдыр-влакын икмыняр ужашыжым мландымбаке налын кудалтен да нуным тошкен.11Тудо эсогыл кавасе арвыльын Онжо ваштареш шогалын: Тудым кажне кечын кондымо надыр деч посна коден, Тудын святой вержым шӱктарен.12Юмын калыкше тудын кидыш пуымо лийын, кажне кечын кондымо надырым сулык вашталтен, законысо чынлык мландымбаке налын кудалтыме лийын – тӱкын чыла мом ыштымыже воранен толын.13Вара мый ик святойын ойлымыжым колынам, а вес святой тиде ойлышо деч йодын: «Тиде кончымашыште мом ончыктымо кужун шуйна мо? Мыняр жап кажне кечын кондымо надыр огеш лий да пустаҥдыше осаллык озаланаш тӱҥалеш, а святой вер ден Юмын калыкше тошкымо лийыт?»14Тудыжо вашештен: «Чыла тиде кок тӱжем кумшӱдӧ кас да эр шуйна, тидын деч вара святой вер эрныктыме лиеш».15Тиде кончымашым ужмеке, мый, Даниил, тудын мом ончыктымыжым умылаш тӧченам. Тунам мыйын ончылнем ала-кӧ айдеме гай койшо шогалын.16Мый Улай эҥер ӱмбач айдеме йӱкым колынам, тудо ӱжын каласен: «Гавриил, тиде кончымашым тудлан умылтаре!»17Тудыжо мыйын шогымо вер деке толын. Кунам тудо лишемын, мый чот лӱдмем дене кумык возынам. Тудо мылам каласен: «Айдеме эрге, пален шого: тиде кончымаш – пытартыш жап нерген».18Кунам тудо мыланем ойлен, мый, нимом шижде, кумык киенам. Тудо мый декем тӱкнен да йол ӱмбаке шогалтен.19Тудо каласен: «Теве мый тылат шыдым йоктарыме пытартыш кечылаште мо лийшашым почам. Вет тиде кончымаш палемдыме пытартыш жап нерген ойла.20Тый кок тӱкан тагам ужынат, тиде – Мидий ден Персийын кугыжаже-влак.21Лузга межан казатага – Грецийын кугыжаже, а шинча коклаштыже улшо кугу тӱкӧ – тудын икымше кугыжаже.22Тый ужынат: тудо пудырген, олмыштыжо вес ныл тӱкӧ лектын. Тиде – ныл кугыжаныш, нуно тиде калык гычак лектыт, но икымше кугыжа гай виян огыт лий.23Кунам нунын кугыжаланымыштлан мучаш лишемеш да осаллык тич темеш, тунам ӱскырт да осал чоя кугыжа шогалеш.24Тудо виян лиеш, но шке вий-куатшылан кӧра огыл. Тудо ӧрыктарыше пустаҥдымашым конда, чыла пашаже ушнен толеш, виян-влакымат, святой калыкымат пытара.25Чоялыкше тудын осал шонымашыжлан воранымашым конда, шӱмжым кугешнымаш авалта. Тыныс жапыште тудо шукыштым пытара, он-влакын Онышт ваштарешат шогалеш. Тудо пытарыме лиеш, но айдеме кид дене огыл.26Кас ден эр-влак нерген ончыктымо кончымашыште мом каласыме чын улеш. Но тиде кончымашым тый ит поч, вет тудо тора ончыкылык дене кылдалтын».27Мый, Даниил, чылт лунчыргенам да икмыняр кече черле киенам. Вара кынелынам да кугыжан пуымо сомылжо-влакым ыштенам. Тиде кончымаш мыйым ӧрмашыш пуртен, тудым мый умылен омыл.
Institute for Bible Translation, Finland