Дан5
1Валтасар кугыжа шке тӱжем тӧражлан кугу сийым ыштен да нунын дене пырля йошкар аракам йӱын шинчен.2Йошкар аракам подылмеке, Валтасар шӧртньӧ ден ший ате-влакым кондаш кӱштен, нуным Навуходоносор ачаже Иерусалимысе храм гыч конден улмаш. Кугыжа шке тӧраже, ватыже да кулватыже-влак дене пырля нине ате гыч йӱаш шонен.3Кунам храм гыч, Юмын Иерусалимысе пӧртшӧ гыч, налме шӧртньӧ ате-влакым конденыт, кугыжа ден тӧраже-шамыч, вате ден кулватыже-влак нунын гыч йӱаш тӱҥалыныт.4Нуно йошкар аракам йӱыныт да шкеныштын шӧртньӧ ден ший, той ден кӱртньӧ, пу ден кӱ юмыштым чапландареныт.5Кенета айдеме кид лектын да кугыжан полатын ошемдыме пырдыжешыже, светильник воктене, возаш тӱҥалын. Кугыжа возышо кидым ужын.6Тунам чурийже вашталтын, тудо пеш чот аптыранен, пулвуйжо чытыраш тӱҥалын, йолйыжыҥже каен.7Кугыжа кугу йӱкын кычкырал колтен да мужедше, Халдейысе мунлыеҥ ден шӱдырмужаҥ-влакым кондаш кӱштен. Тудо Вавилонысо нине мунлыеҥ-влаклан каласен: «Кӧ тиде возымым лудеш да мылам умылтара, тудлан шемалге-йошкар тӱсан чапле вургемым чиктат, шӱйышкыжӧ шӧртньӧ шинчырым сакат. Кугыжанышыште тудо кумшо айдеме лиеш».8Кугыжан чыла мунлыеҥже толын, но нуно мом возымым лудынат, кугыжалан умылтаренат кертын огытыл.9Тунам Валтасар кугыжа эшеат чот лӱдын, чурийже ошемын. Тӧра-влакат ӧрын шогалыныт.10Кугыжан да тӧраже-влакын ойлымыштым колмеке, сийым ыштыме залыш кугыжан аваже пурен. Тудо каласен: «Кугыжа, эсен лий! Арам тый тыге аптыраненат да чуриет тынар ошемын.11Тыйын кугыжанышыштет ик еҥ уло, тудын кӧргыштыжӧ святой юмо-влакын шӱлышышт ила. Эше ачатын илыме жапыште тудо волгыдо уш-акылан, шонен моштышо лийын да юмо-влакын гай мунлылыкым ончыктен. Тыйын ачат, Навуходоносор кугыжа, тудым юзо, мужедше, Халдейысе мунлыеҥ ден шӱдырмужаҥ-влакын вуйлатышыштлан шогалтен. Тыйын кугыжа ачат тудым шкежак шогалтен!12Тудын, Даниилын, кӧм кугыжа вес семын Валтасар манын лӱмден, кӧргыштыжӧ – таҥастараш лийдыме чон-шӱлыш. Омо ден тушто-влакым умылтараш, неле йодыш-шамычым рончаш тудын шинчымашыже да уш-акылже улыт. Тугеже, тек Даниилым ӱжыт – тиде возымым тудо тылат умылтара».13Даниилым кугыжа деке конденыт. Кугыжа тудлан каласен: «Тый мо Даниил улат, пленыш налме-влак кокла гыч иктыже, кӧмытым кугыжа ачам Иуда мланде гыч конден?14Мый колынам: кӧргыштет юмо-влакын шӱлышышт ила, тыйын волгыдо уш-акыл, шонен моштымаш да кугу мунлылык улыт.15Теве тиде возымым лудаш да умылтараш манын, мый декем юзо мунлыеҥ ден мужедше-влакым конденыт, но нуно тудым умылтарен кертын огытыл.16А тыйын нергенет мый колынам: тый умылтарен да неле йодышым рончен моштет. Тыгеже, тый мылам тиде возымым лудын да умылтарен кертат гын, тылат шемалге-йошкар тӱсан чапле вургемым чиктат, шӱйышкет шӧртньӧ шинчырым сакат, да тый кугыжанышыште кумшо айдеме лият».17Тунам Даниил кугыжалан тыге вашештен: «Пӧлек-влакым шкаланет кодо але иктаж-кӧлан весылан пу. Мый возымым кугыжалан тугакат лудам да мом ончыктымыжым умылтарем.18О кугыжа! Чыла деч Кӱшылысӧ Юмо тыйын Навуходоносор ачатлан кучемвийым, кугулыкым, чапым ден пагалымашым пуэн.19Тудлан Юмын пуымо кугулыкшо ончылно чыла калык, тукым да йылме гыч улшо еҥ-влак лӱдын чытыреныт. Кӧм шонен, тудым пуштын, кӧм шонен – илышым коден, кӧм шонен – кӱшкӧ нӧлталын, кӧм шонен – ӱлыкшемден.20Но кунам кугешнымаш авалтен да шӱмжӧ пешкыдемын, тудо пеш торжа да осал лийын, сандене престол гыч кораҥдыме лийын да чап деч посна кодын.21Тудым еҥ-влак деч поктен колтеныт, ушыжо янлыкын гай лийын. Тудо ир осёл-влак дене пырля илен, ӱшкыж семын шудым кочкын, капшым кавасе лупс вӱдыжтарен. Тыге лийын тудо жап марте, кунам пален налын: айдемын кугыжанышыж дене Чыла деч Кӱшылысӧ Юмо озалана, тудын вуйлатышыжлан кӧм шона, тудым шогалта.22А тый, Валтасар, тудын эргыже, кеч чыла тидым паленат, шке шӱметым ӱҥышемден отыл.23Тый кавасе Оза ваштареш шогалынат. Тылат Тудын пӧртшӧ гыч налме ате-влакым конденыт, нунын гыч тый шке тӧрат, ватет да кулватет-влак дене пырля йошкар аракам йӱынат. Тый ший ден шӧртньӧ, той ден кӱртньӧ, пу ден кӱ юмо-влакым чапландаренат, кудышт нимом огыт уж, огыт кол да огыт пале. А Юмым, Кӧн кидыштыже тыйын илыш шӱлышет да коштмо корнет улыт, тый чапландарен отыл.24Сандене Тудо нине шомакым возышо кидым колтен.25Теве мом тыште возымо: МЕНЕ, МЕНЕ, ТЕКЕЛ, УПАРСИН.26Теве мом нине мут-влак ончыктат: МЕНЕ – Юмо кугыжаланыме кечет-влакым шотлен луктын да нунылан мучашым пыштен.27ТЕКЕЛ – тый виса дене висыме улат да пеш куштылгыш лектынат.28ПЕРЕС – тыйын кугыжанышетым шелме да мидян ден перс-влаклан пуымо».29Тунам Валтасарын кӱштымыж почеш Данииллан шемалге-йошкар тӱсан чапле вургемым чиктеныт, шӱйышкыжӧ шӧртньӧ шинчырым сакеныт да тудым кугыжанышын кумшо айдемыжлан увертареныт.30Тиде йӱдымак Валтасарым, Халдей кугыжам, пуштыныт.31Кугыжалан мидян Дарий шогалын, тунам тудо кудло кок ияш лийын.
Institute for Bible Translation, Finland