Дан10
1Персий кугыжа Кирын кумшо ий вуйлатымыж годым Данииллан, кӧм эше Валтасар манын лӱмденыт, почмаш лийын. Тиде почмаш чынле, тудым умылаш кугу уш-акыл кӱлеш. Даниил тиде почмашым умылен, кончымашым ыҥлен.2«Тиде кечылаште мый, Даниил, кум арня ойгыренам.3Тиде кум арня жапыште тамле кочкышым кочкын омыл, шыл ден йошкар аракам умшашкем налын омыл, ӱй дене шкемым шӱрен омыл.4А икымше тылзын коло нылымше кечынже мый кугу Тигр эҥер серыште лийынам.5Вуем нӧлталынам да ужынам: ала-могай пӧръеҥ шога, йытын вургемым чиен, кыдалыштыже – Уфаз гыч кондымо шӧртньӧ дене ыштыме ӱштӧ.6Тудын капше топаз гай койын, чурийже – волгенче гай, шинчаже – тул гай, кид ден йолжо – йылгыжше той гай, а йӱкшӧ шуко еҥын йӱк-йӱанже гай шоктен.7Тиде кончымашым мый гына, Даниил, ужынам, а мый денем пырля улшо еҥ-влак тудым ужын огытыл. Но нуным пеш кугу лӱдмаш авалтен: нуно тушеч куржыныт да шылыныт.8Мый шкетын кодынам да тиде кугу кончымашым онченам. Мыйын вий-куатем йомын, чурием шапалген, нимогай ӱнарем кодын огыл.9Вара мый тудын ойлымыжым колынам. Мый тунамак ушым йомдаренам да мландымбаке кумык камвозынам.10Но мый декем кид тӱкнен да нӧлталын, да тунам, кидем дене мландыш эҥертен, пулвуйваке шинчын кертынам.11Тудо мыланем каласен: ”Даниил, кугун аклыме айдеме! Мом тылат каласем, тӱткын колышт да йол ӱмбаке шогал, вет мый кызыт тый декет колтымо улам”. Кунам тудо мылам тидым ойлен, мый чытырен кынелынам.12Тудо мылам каласен: ”Ит лӱд, Даниил! Икымше кече гычак, кунам тый, Юмет ончылно шкендым ӱҥышемден, умылаш тыршаш шонен пыштенат, мутет-влак колмо лийыныт, да мый тыйын кумалметлан вашмутым пуаш толынам.13Но Персий кугыжанышын онжо коло ик кече мыйын ваштарешем шоген. Тунам Михаил, кугу он-влак кокла гыч иктыже, мылам полшаш толын, да мый тушто Персий кугыжа-влак дене кодынам.14А кызыт мый тылат пытартыш кечылаште калыкет дене мо лийшашым увертараш толынам, вет тиде кончымаш – тора кече-влак нерген”.15Кунам тудо мылам тидым ойлен, мый мландымбаке кумык возынам да ойлен кертдыме лийынам.16Но ала-кӧ, айдеме эргыла койшо, умшам деке тӱкнен, да мый, умшам почын, кутыраш тӱҥалынам. Ончылнем шогышылан каласенам: ”Мыйын озам, тиде кончымаш деч чыла кӧргем коршташ тӱҥалын, нимогай ӱнарем кодын огыл.17Кузе мый, тыйын мыскынь тарзет, тый денет, озам, кутырен кертам? Мыйын йыжыҥем пытен, шӱлашат неле”.18Тунам тудо, айдемыла койшо, мый декем угыч тӱкнен да мылам ӱнарым пуэн.19Тудо каласен: ”Ит лӱд, кугун аклыме айдеме! Тыныс тыланет, пеҥгыдем, пеҥгыдем!” Тыге ойлымыж годым мый декем вий пӧртылын, да мый каласенам: ”Ойло, мыйын озам! Вет тый мыйым пеҥгыдемденат”.20Тудо каласен: ”Палет мо, молан мый тый декет толынам? Мый кызыт мӧҥгеш Персийын онжо дене кредалаш каем. Тушеч кайымекем, Грецийын онжо толеш.21Но чыным возымо книгаште мом серымым мый тылат увертарем. Мылам нунын дене кредалаш тендан Михаил онда деч моло нигӧ ок полшо.
Institute for Bible Translation, Finland