2 Куг21
1Давид кугыжаланыме годым кум ий почела шужымаш лийын. Тидын шотышто Давид Господь деч йодын. Господь тудлан вашештен: «Тиде Сауллан да тудын вӱрым йоктарыше тукымжылан кӧра лийын, тудо Гаваонышто илыше-влакым пуштын».2Тунам кугыжа Гаваонышто илыше-шамычым ӱжын да нунын дене кутырен. Нуно Израиль калык гыч огыл, а аморрей калык деч кодшыжо лийыныт. Израильтян-влак нунын дене товатмут дене пеҥгыдемдыме келшымаш ойпидышым ыштеныт, но Израиль ден Иуда верч чот шогышо Саул нуным пытарынеже улмаш.3Давид Гаваонышто илыше-влак деч йодын: «Мом мылам тыланда ышташ? Господьын калыкше дек поро лийза манын, кумылдам мо дене савыраш?»4Нуно тудлан вашештеныт: «Саул деч але тудын тукымжо деч мыланна шӧртнят, шият огеш кӱл. А Израильыште иктаж-кӧм казнитлаш мемнан кертыжна уке». Давид каласен: «Мом йодыда, мый тыланда чыла ыштем».5Нуно кугыжалан вашештеныт: «Мемнам Израильын чыла кундемыштыже пушташ да пытараш шонышо еҥын6тукымжо гыч шым еҥым пу. Ме нуным Гиваште, Господьын ойырен налме Саулын олаштыже, Господь ончылан [кечан вереш] шуралтен сакалена». Кугыжа каласен: «Мый нуным тыланда пуэм».7Но Мемфивосфейым, Саул эрге Ионафанын эргыжым, Давид кугыжа Господь лӱм дене пуымо товатмутлан кӧра чаманен коден. Тиде товатмутым нуно Саул эрге Ионафан дене икте-весыштлан пуэныт улмаш.8Кугыжа Айан Рицпа ӱдыржын Сауллан ыштыме кок эргыжым, Армони ден Мемфивосфейым, да Саул ӱдыр Мелхолан Адриэллан, Мехола гыч Верзеллийын эргыжлан, ыштыме вич эргыжым налын9да Гаваонышто илыше-влакын кидышкышт пуэн. Нунышт нине еҥым курыкышто Господь ончылан [кечан вереш] шуралтен сакеныт. Нуно шымытынат пырля коленыт, нуным тӱредме жапын икымше кечылаштыже, шожым тӱредаш тӱҥалме годым, пуштыныт.10Тунам Рицпа, Айан ӱдыржӧ, чоштыра вургемым налын да шкаланже саде курыкеш шарен, тушто тӱредаш тӱҥалме жап гыч кап-влак ӱмбаке кава гыч йӱр йӱраш тӱҥалме пагыт марте шинчен. Тудо кап-влак деч кечывалым кавасе кайыкым, а йӱдым янлыкым поктен шоген.11Рицпан, Айан ӱдыржын, Саулын кулватыжын, мом ыштымыж нерген Давидлан каласеныт. [Колышо кап-влак шӱйыныт. Нуным кугу капан еҥ-влак тукым гыч улшо Дан, Иоа эрге, налын.]12Давид каен да Саул ден тудын Ионафан эргыжын лулегыштым Галаадысе Иавис олаште илыше-влак деч налын. Гелвуйышто Саулым пуштмеке, филистим-шамыч Саул ден Ионафанын капыштым Беф-Сан оласе погын верыште сакалтеныт, а Иависыште илыше-влак нунын капыштым шолып налыныт улмаш.13Давид тушечын Саул ден Ионафан эргыжын лулегыштым конден. Тыгак [кечан вереш] шуралтен сакыме-шамычын лулегыштымат погеныт.14Саул ден Ионафан эргыжын лулегыштым, [тыгак кечан вереш сакалтыме-влакын лулегыштым] Вениамин мландысе Целаш, Саулын Кис ачажын шӱгарешыже тоеныт. Чылажымат кугыжан кӱштымыж семын ыштеныт. Тидын деч вара Юмо кумалмыштым колын да Израиль деке поро кумылан лийын.15Филистим-влак ден Израиль коклаште сар угыч тӱҥалын. Давид шке еҥже-шамыч дене филистим-влак ваштареш кредалын, тудын вийже пытен.16Тунам рефаим калык гыч Иесвий, кудыжын кумшӱдӧ сикль нелытан той умдыжо да у кердыже лийын, Давидым пуштнеже улмаш.17Но кугыжалан полшаш Авесса, Саруян эргыже, толын [да тудым утарен]. Авесса филистим ӱмбаке кержалтын да тудым пуштын. Тунам Давидын еҥже-влак тыге товатленыт: «Тетла тый мемнан дене пырля сарыш от лек, уке гын Израильын лампыже йӧрен кертеш!»18Икмыняр жап гыч филистим-влак дене вес кредалмаш Гобышто лийын. Тунам Хуша гыч Совохай рефаим Сафутым пуштын.19Гобышто эше вес кредалмаш лийын. Тунам Елханан, Вифлеем гыч Ягаре-Оргимын эргыже, Геф гыч Голиафым пуштын. Тудыжын умдо вурдыжо куымо станын навуйжо гай лийын.20Эше ик кредалмаш Гефыште лийын. Тушто рефаим калык гычак кугу капан ик айдеме улмаш, тудын кид-йолыштыжо куд парня дене лийын – чылаже коло ныл парня.21Тиде еҥ израильтян-влакым шӱктарен ойлен. Тудым Ионафан, Давидын Самай изажын эргыже, пуштын.22Нине ныл еҥ Геф гычын, рефаим калык гыч, лийыныт. Нуно Давид ден тудын еҥже-влакын кидышт деч коленыт.
Institute for Bible Translation, Finland