4 Куг10
1Ахавын Самарийыште шымле эргыже лийын. Ииуй серыш-влакым возен да нуным Самарийыш Изреельын тӧраже-влаклан, тыгак кугурак-шамычлан да Ахав тукым эрге-влакым ончышо-шамычлан колтен. Туштыжо тыге возымо лийын:2«Тендан дене озадан эргыже-влак улыт, тендан тыгак сарлык орва ден имньыда, чоткыдемдыме ола ден саргуралда уло. Сандене, тиде серышым налмеке,3шке озадан эргыж-влак кокла гыч эн сайжым да келшен толшым ойырен налза да ачажын престолышкыжо шындыза. Вара шке озадан тукымжо верч кредалза».4Нунышт пеш чот лӱдыныт да каласеныт: «Тудын ваштареш кок кугыжа шоген кертын огыл. А меже кертына мо?»5Кугыжан пӧрт вуйлатыше ден ола вуйлатыше, кугурак-влак да эрге-шамычым ончышо-влак Ииуй дек тыге каласаш колтеныт: «Ме тыйын тарзет улына. Мом каласет, тудым ыштена. Ме нигӧмат кугыжалан огына шогалте. Мом сайлан шотлет, тудым ыште».6Тунам Ииуй нунылан кокымшо серышым возен: «Те мыйын могырышто улыда да мыйын шомакем колыштыда гын, озадан эргыже-влакын вуйыштым налза да эрла тиде жапыште мый декем Изреельыш толза». Кугыжа тукым эрге-шамыч шымлын лийыныт, нуным оласе лӱмлӧ еҥ-влак ончен куштеныт.7Серышым налмеке, нине еҥ-шамыч кугыжа тукым эрге-влакым налыныт да нуным, шымле еҥым, шӱшкыл пуштыныт. Вуйыштым комдыш пыштеныт да Ииуйлан Изреельыш колтеныт.8Колтымо еҥ толын да Ииуйлан каласен: «Кугыжа тукым эрге-влакын вуйыштым конденыт». Ииуй вашештен: «Нуным ола капкаш пурымаште кок вере орален оптыза, тек тушто эр марте кият».9Вес эрдене тудо лектын, калык ончыко шогалын да каласен: «Те титакан огыдал. Тиде мый шке озам ваштареш заговорым ыштенам да тудым пуштынам. А ниным чылаштым кӧ пуштын?10Палыза: мом Господь Ахав тукым шотышто каласен, ик мутат шукталтде ок код. Господь Илия тарзыж гоч мом ойлымыжым шуктен».11Ииуй Изреельыште Ахав тукым деч кодшо чыла еҥым пуштын: кугу тӧра, лишыл еҥ да онаеҥ-влакым. Ик еҥат утлен кодын огыл.12Вара Ииуй Самарийыш каен. Кайышыжла, тудо Беф-Екед лӱман кӱтӱчӧ вер воктене13Иуда кугыжа Охозийын иза-шольыжо-влакым вашлийын. «Те кӧ улыда?» – нунын деч йодын. «Ме Охозийын иза-шольыжо улына. Кугыжа тукым эрге-шамыч ден кугыжан аважын эргыже-влакын кузерак илымышт нерген пален налаш каена», – нуно вашештеныт.14«Нуным илышынек налза», – Ииуй каласен. Нине еҥ-влакым пӱтырен кученыт да Беф-Екед таве воктене шӱшкыл пуштыныт. Нуно нылле коктын лийыныт, иктат илыше кодын огыл.15Тушечын кайышыжла, Ииуй Ионадавым, Рехав эргым, вашлийын. Тудыжо ваштарешыже толын. Ииуй тудын дене саламлалтын да йодын: «Кузе мый тылат уло шӱм-чонем дене ӱшанле улам, тыят мылам тыгак ӱшанле улат мо?» Ионадав вашештен: «Тиде тыге». Ииуй каласен: «Тиде тыге гын, мылам кидетым пу». Ионадав тудлан кидшым пуэн, да Ииуй тудлан орваш кӱзаш полшен.16Ииуй каласен: «Айда мый денем пырля. Тый мыйын Господь верч чон йӱлен тыршымем ужат». Тыге Ионадавым орвашке шынден наҥгаеныт.17Самарийыш толмеке, Ииуй Ахавын тыште кодшо чыла еҥжым пуштын. Тыге Господьын Илиялан каласыме шомакше шукталтын.18Ииуй уло калыкым поген да каласен: «Ахав Вааллан шагал служитлен. Ииуй тудлан шукырак служитлаш тӱҥалеш.19Мый декем Ваалын чыла пророкшым, служитлышыже-влакым, онаеҥже-шамычым ӱжса. Мый Вааллан кугу надыр кондымашым ыштынем, садлан тек икте кодде толыт. Кӧ огеш тол, тудо илыше ок код». Ваалын чыла служитлышыжым пытараш манын, Ииуй тыге чоян ыштен.20Тудо каласен: «Ваал лӱмеш пайрем погынымашым увертарыза». Пайрем нерген увертареныт.21Ииуй тиде уверым пӱтынь Израиль мучко колтен, да Вааллан кумалше-влак чылан толыныт. Нуно Ваалын храмышкыже икте кодде погыненыт. Ваалын храмже калык дене тич темын.22Ииуй вургем клат вуйлатышылан каласен: «Вааллан кумалше-влаклан вургемым кондо». Тудыжо кажныжлан вургемым конден.23Ииуй ден Ионадав, Рехав эрге, Ваалын храмышкыже пуреныт. Ииуй Ваалын служитлышыже-влаклан каласен: «Ончалза, терген лекса – тендан коклаште Господьлан служитлыше ынже лий. Тыште Ваалын еҥже-влак гына лийшаш улыт».24Вара нуно йӱлалтен пуымо надыр ден моло надырым кондаш тӱҥалыныт. А Ииуй пӧрт тӱжвалне кандашле еҥым шогалтен, нунылан каласен: «Нине еҥ-влак тендан кидыште улыт. Тендан кокла гыч иктаж-кӧ кеч иктым колта гын, тудын чонжо утаралтше еҥын чонжо олмеш лиеш».25Кунам йӱлалтен пуымо надырым конден пытареныт, Ииуй орол ден сарзывуй-влаклан каласен: «Пурыза да пуштедыза, иктат ынже курж!» Орол ден сарзывуй-влак нуным керде дене шурен пуштыныт да колышо капыштым тӱжваке луктын кышкеныт. Вара Ваалын храмжын кӧргысӧ пӧлемышкыже пуреныт,26тушечын кумалме меҥге-влакым луктыныт да йӱлалтеныт.27Нуно Ваалын кумалме меҥгыже-влакым, тыгак Ваалын храмжым шалатеныт. Храм лийме верым шонданыш савыреныт. Тудо таче кечынат тыгак кодын.28Тыге Ииуй Израиль мландыште Вааллан кумалмылан мучашым пыштен.29Но Израильым сулыкыш пуртышо Нават эрге Иеровоамын сулыкшо-влак деч – Вефильыште да Даныште шогышо шӧртньӧ ӱшкыж-шамычлан кумалме деч – тудо кораҥын огыл.30Господь Ииуйлан каласен: «Мылам келшыше пашам шуктымет дене сайым ыштенат – тый Ахав тукым дене мом ышташ шонымем шуктенат. Тидлан тыйын эргыч-влак Израиль престолышто нылымше тукым марте шинчаш тӱҥалыт».31Но Израильын Господь Юмыжын законжым Ииуй уло шӱм-чон дене шуктен шогаш тӧчен огыл. Тудо Израильым сулыкыш пуртышо Иеровоамын сулыкшо деч кораҥын огыл.32Тиде жапыште Господь Израильын мландыжым иземдаш тӱҥалын. Азаил израильтян-влакым чек воктенысе мландыштышт кырен шалатен.33Тудо Иордан деч эрвелныла пӱтынь Галаад мландым, Гад, Рувим да Манассий тукым-влакын мландыштым – Арнон эҥер воктенысе Ароер деч Галаад ден Васан марте – сеҥен налын.34Ииуйын моло пашаже, чыла мом ыштымыже, сеҥымашыже-влак нерген «Израиль кугыжа-шамычын курымсерыш книгаштышт» возымо.35Вара Ииуй ача-кочаж-влак деке ушнен, тудым Самарийыште тоеныт. Тудын олмеш кугыжалан Иоахаз эргыже шогалын.36Ииуй Самарийыште Израильым коло кандаш ий вуйлатен.
Institute for Bible Translation, Finland