2 Кур.кн29
1Кугыжалан шогалмыж годым Езекий коло вич ияш лийын да Иерусалимыште коло индеш ий вуйлатен. Аважын лӱмжӧ Авия, тудо Захарийын ӱдыржӧ лийын.2Давид кугезе кочаж семынак Езекий чыла шотыштат Господьлан келшыше пашам ыштен.3Икымше ий кугыжаланымыж годым, икымше тылзынже, Господьын пӧртшын омсаже-влакым почын да нуным олмыктен.4Тудо иерей ден левит-шамычлан толаш кӱштен, нуным эрвел капка воктене поген5да каласен: «Левит-влак, мыйым колыштса! Таче шкендам эрныктен святитлыза да ача-кочадан Господь Юмыжын пӧртшым святитлыза, святой вер гыч чыла йырныкым луктын кудалтыза.6Вет мемнан ача-кочана-влак ӱшанле лийын огытыл, Господь Юмына ончылно осалым ыштеныт. Нуно Тудым коденыт, Тудын илыме верже деч чурийыштым кораҥденыт, Тудын деке тупынь савырненыт,7храмыш пурымо кыдежын омсажым петыреныт, лампе-влакым йӧртеныт. Тамлыпушым тӱтырен огытыл, Израиль Юмын святой верыштыже йӱлалтен пуымо надырым конден огытыл.8Тидлан Иуда ден Иерусалим ӱмбаке Господьын шыдыже возын. Тудо нуным шучкылык ден ӧрткымашым лукшыш, воштылчыкыш савырен – те тидым шке шинчада дене ужыда.9Мемнан ачана-влакым керде дене пуштыныт, а эрге-ӱдыр ден ватына-шамыч [йот мландыште] пленыште улыт.10Кызыт мыйын шӱмыштем – Израильын Господь Юмыж дене ойпидышым ышташ, тек Тудо шке шыде тулжым мемнан ӱмбач кораҥда.11Йочам-влак! Сита айда-лийже илаш, вет Господь тендам шке чурийже ончылно шогаш, Тудлан служитлаш, Тудын тарзыже лияш да тамлыпушым тӱтыраш ойырен налын».12Тунам левит-влак кынелыныт: Кааф урлык гыч – Амасай эрге Махаф ден Азарий эрге Иоиль; Мерари урлык гыч – Авдий эрге Кис ден Иегаллелел эрге Азарий; Гирсон урлык гыч – Зимма эрге Иоах ден Иоах эрге Еден;13Елицафан урлык гыч – Шимри ден Иеиел; Асаф урлык гыч – Захарий ден Матфаний;14Еман урлык гыч – Иехиил ден Шимей; Идифун урлык гыч – Шемай ден Узиил.15Нуно иза-шольыштым погеныт, шкеныштым святитленыт да, Господьын шомакшым шуктен, кугыжан кӱштымыж почеш Господьын пӧртшым эрныкташ каеныт.16Тудым эрныкташлан иерей-влак пӧртыш пуреныт. Тушто мом ару огылым муыныт, чылажымат Господьын пӧртшын кудывечышкыже луктеденыт. А левит-влак чыла тидым погеныт да ола деч ӧрдыжкӧ, Кедрон йогын деке, наҥгаеныт.17Нуно икымше тылзын икымше кечынже святитлаш тӱҥалыныт да тудо тылзынак кандашымше кечынже Господьын пӧртыш пурымо кыдежышке шуыныт. Господьын пӧртшым эше кандаш кече святитленыт да икымше тылзын латкандашымше кечынже тиде пашам мучашленыт.18Нуно Езекий кугыжа дек толыныт да каласеныт: «Ме Господьын пӧртшым, надыр йӱлалтыме жертвенникым да тудын пелен кучылтмо чыла арверым, надыр киндылан ӱстелым да тудын пелен кучылтмо чыла арверым эрныктенна.19Ахаз кугыжан Господь деч кораҥын кугыжаланымыж годым кучылтдымо чыла арверымат ме ямдылен да святитлен улына, нуно кызыт Господьын жертвенникше ончылно улыт».20Вес кечын Езекий кугыжа эрден эр кынелын, оласе вуйлатыше-влакым поген да Господьын пӧртышкӧ каен.21Нуно кугыжан ешыже, святой вер да Иуда калык верч сулык надырым пуашлан шым ӱшкыжым, шым тагам, шым пачам да шым казатагам вӱден конденыт. Езекий нуным Аарон тукым иерей-влаклан Господьын жертвенникешыже надырлан кондаш кӱштен.22Ӱшкыж-влакым шӱшкылыныт. Иерей-шамыч, вӱрым налын, тудын дене жертвенникым шыжыктеныт. Вара тага-влакым шӱшкылыныт да вӱрышт дене жертвенникым шыжыктеныт. Тидын деч вара пача-шамычым шӱшкылыныт да вӱрышт дене жертвенникым шыжыктеныт.23А сулык верч надырлан ямдылыме казатага-влакым кугыжа ден погынышо калык ончыко конден шогалтеныт. Нуно казатага-влакын вуйышкышт кидыштым пыштеныт.24Вара иерей-шамыч нуным шӱшкылыныт да, пӱтынь Израильын сулыкшым касараш манын, вӱрыштым жертвенник ӱмбак йоктареныт. Вет кугыжа йӱлалтен пуымо надыр ден сулык верч надырым пӱтынь Израиль верч кондаш кӱштен улмаш.25Господьын пӧртыштӧ Езекий левит-влакым шогалтен, кидышкышт кимвалым, кӱслем да арфым кучыктен. Тыге ышташ Давид, кугыжан ончыкужшыжо Гад да пророк Нафан кӱштеныт, вет тиде кӱштымашым Господь шке пророкшо-влак гоч пуэн.26Левит-шамыч Давидын ыштыме семӱзгаржым, а иерей-влак той пучым кучен шогеныт.27Езекий йӱлалтен пуымо надырым жертвенникыш пышташ кӱштен. Надырым кондаш тӱҥалмеке, Израиль кугыжа Давидын ыштыме семӱзгарже-влак ден пуч йӱк почеш Господьлан мураш тӱҥалыныт.28Надырым конден пытарымешке, погынышо-влак кумалыныт, мурызо-шамыч муреныт, той пуч-влакым пуалтеныт.29Йӱлалтен пуымо надырым кондымеке, кугыжа да пеленже улшо чыла еҥ сукен шинчыныт да вуйыштым савеныт.30Давидын да ончыкужшо Асафын шомакышт дене Господьым моктен мурышт манын, Езекий кугыжа да он-влак левит-шамычлан кӱштеныт. Нунышт куанен муралтеныт, Господьлан вуйыштым мланде марте савеныт.31Езекий каласен: «Кызыт те Господь ончылно ару улыда. Толза тышке, надыр ден тауштымо пӧлекдам Господьын пӧртышкыжӧ кондыза». Тунам погынышо-влак надыр ден тауштымо пӧлек-шамычым, а кӧн кумылжо лийын, йӱлалтен пуышаш надырым конденыт.32Погынышо-влакын йӱлалтен пуашлан кондымо надырышт чылаже шымле ӱшкыж, шӱдӧ тага да кокшӱдӧ пача лийын. Чыла тидым Господьлан йӱлалтен пуымо надырлан конденыт.33Моло святой надырын чотшо шолдыра вольык гыч кудшӱдӧ вуй да тыгыде вольык гыч кум тӱжем вуй лийын.34Но иерей-влак шагалын лийыныт, нуно йӱлалтен пуышаш чыла надыр вольыкым ньыктын шуктен огытыл. Надыр кондымо пашам пытарымешке да моло иерейын святитлалтмешкышт, нунылан левит иза-шольышт полшен шогеныт. Иерей-влак дене таҥастарымаште левит-шамыч святитлалтме йӱлам сайынрак шуктеныт улмаш.35Йӱлалтен пуымо надырым, татулык надыр коям да йӱлалтен пуымо надыр пелен кондымо йошкар арака надырым пеш шуко конденыт. Тыге Господьын пӧртыштыжӧ службо-влакым угыч эртараш тӱҥалыныт.36Мом Господь шке калыкшылан ыштен, тидлан Езекий да уло калык йывыртеныт, вет тиде чылажат вашке ышталтын.
Institute for Bible Translation, Finland