2 Кур.кн26
1Тидын деч вара уло Иуда калык Амасийын латкуд ияш Озий эргыжым ачаже олмеш кугыжалан шогалтен.2Кугыжа ачажын шке кугезыже-влак деке кайымеке, Озий угыч Елафым чоҥен шогалтен да Иуда кугыжанышлан пӧртылтен.3Кугыжаланаш тӱҥалмыж годым Озий латкуд ияш лийын да Иерусалимыште витле кок ий вуйлатен. Аважын лӱмжӧ Иехолия, тудо Иерусалим гыч лийын.4Амасий ачаж семынак Озий Господьлан келшыше пашам ыштен.5Захарий илыме кечылаште тудо Юмо деч каҥашым йодын илен, Захарий тудым Юмо деч лӱдаш туныктен. Господьым шотлен илыме жапыште Юмо тудын пашажым ворандарен шоген.6Озий филистим-влак ӱмбаке сар дене каен да Геф, Иавней, Азот ола-влакын пырдыжыштым шалатен. Филистим мландын Азот да моло кундемыштыже ола-влакым чоҥен.7Филистим-влак, Гур-Ваалыште илыше араб-шамыч да маон-влак дене кредалмыж годым Юмо тудлан полшен шоген.8Аммон-шамыч Озийлан йозакым тӱлен иленыт. Тудын вий-куатше пеш кугу лийын, сандене лӱмжӧ Египет чек марте чапланен.9Тудо Иерусалимыште Лукысо капка ден Лапвер капка ӱмбалне, тыгак пырдыж лукышто башне-влакым чоҥен, нуным чоткыдемден.10Лопышто да тӧрверыште Озийын шуко вольыкшо лийын, сандене тудо башне-влакым ир мландыштат чоҥен да вӱдлан шуко тавым кӱнчен. А курыклаште да сад-пакчалаште мланде пашазе ден виноградым куштышо еҥже-влак лийыныт, вет тудо мланде пашам йӧратен.11Озийын сарыш лектын коштшо, отряд-влаклан шеледыме сарзывийжат лийын. Возкалыше Иеиел ден сарзывуй Маасей нунын чотыштым ончыктыман лӱмерым ыштеныт. Тиде пашам Хананий, кугыжан онжо-влак кокла гыч иктыже, вуйлатен шоген.12Урлыквуй-шамычын – лӱддымӧ сарзе-влакын – чотышт кок тӱжемат кудшӱдӧ лийын.13Нунын кид йымалнышт кумшӱдӧ шым тӱжемат вичшӱдӧ тале сарзе улмаш. Нуно кугыжа верч тушман дене кредалаш ямде шогеныт.14Озий уло сарзывийлан авыртыш ден умдым, ӧшлӧк ден кӱртньӧ тувырым, йоҥежым да шӱштӱштӧ дене кышкышаш кӱ-влакым ямдылен.15Башне да пырдыж лукла гыч пикш ден кугу кӱ-влакым лӱйкалаш манын, тудо Иерусалимыште мастарын ыштыме курал-шамычым шогалтен. Озийын чапше умбаке шарлен, вет Юмо тудлан ӧрыктарыше полышым пуэн шоген, да тудын вий-куатше кугемын.16Но кунам Озий вий-куатым налын, тудым кугешнымаш авалтен да пытымашке шуктен. Тудо шке Господь Юмыж ончылно сулыкым ыштен: тӱтырымӧ жертвенникыште тамлыпушым йӱлалташ манын, Господьын храмышкыже пурен.17Почешыже иерей Азарий да Господьын кандашле иерейже, лӱддымӧ еҥ-влак, пуреныт.18Нуно Озий кугыжан корнешыже шогалыныт да каласеныт: «Тыланет огыл, Озий, Господьлан тӱтырыман. Тиде Аарон эрге иерей-влакын пашашт – нуно тидлан святитлыме улыт. Лек святой вер гыч – тый сулыкыш пуренат, Господь Юмо ончылно тиде тыланет чапым ок кондо».19Озий шыдешкен, кидыштыже тӱтырымӧ ате лийын. Иерей-влаклан шыдешкымекше, тудын саҥгаштыже проказе лектын. Чыла тидыже Господьын пӧртыштӧ, тӱтырымӧ жертвенник дене, иерей-влак шинча ончылно лийын.20Кугу иерей Азарий ден моло иерей тудын ӱмбаке ончалыныт да саҥгаштыже проказе лекмым ужыныт. Нуно Озийым тушеч лукташ вашкеныт, да тудо шкежат тушеч вашкерак лекташ шонен, вет Господь кугыжалан черым колтен.21Колымо кечыж марте Озий кугыжа проказе дене черле лийын. Тидлан кӧра тудо посна пӧртыштӧ илен, Господьын пӧртшӧ деч кораҥдыме лийын. А Иофам, тудын эргыже, кугыжан пӧртыштӧ озаланен да элысе калыкым вуйлатен.22Озийын моло пашажым, тӱҥалтыш гыч мучаш марте, пророк Исаий, Амос эрге, возен.23Вара Озий ача-кочаж-влак деке ушнен. Тудым нунын воктене, кугыжа-шамычын шӱгар пасуштышт, тоеныт, вет Озий нерген ойленыт: «Тудо проказе черан». Озий олмеш кугыжалан Иофам эргыже шогалын.
Institute for Bible Translation, Finland