2 Кур.кн12
1Ровоамын кугыжа кучемвийже пеҥгыдемын, да тудо вий-куатан лийын. Тунам Ровоам кугыжа Господьын законжым коден, тудын дене пырля – уло Израиль.2Господь дечын кораҥмыштлан кӧра Ровоамын визымше ий кугыжаланымыж годым Иерусалим ӱмбаке Египет кугыжа Сусаким керылтын.3Тудо тӱжем кокшӱдӧ сарлык орва да кудло тӱжем имнешке дене лийын. Пеленже Египет гыч шотлен пытарыдыме калык – ливий, сукхит да эфиоп-влак – толыныт.4Сусаким Иудан чоткыдемдыме олаже-шамычым сеҥен налын да Иерусалим деке лишемын.5Тунам Ровоам ден Иуда вуйлатыше-влак деке пророк Самей толын. Нунышт, Сусаким деч шылын, Иерусалимыш погыненыт улмаш. Самей нунылан каласен: «Тыге Господь ойла: те Мыйым коден улыда, сандене тендам Сусаким кидыш пуэм».6Израиль вуйлатыше-влак ден кугыжа ӱҥышемыныт да вашештеныт: «Господь чын ышта».7Кунам Господь нунын ӱҥышеммыштым ужын, Самейлан Господьын шомакше лийын: «Нуно ӱҥышемыныт, сандене Мый нуным пытараш ом тӱҥал, вашке утарем. Сусакимын кидше дене Иерусалим ӱмбаке шыдем ом йоктаре.8Но нуно тудын кид йымакше садак логалыт да пален налыт: Мылам служитлымаште да мландымбалысе кугыжа-влаклан служитлымаште могай ойыртем уло».9Сусаким, Египет кугыжа, Иерусалимыш толын да Господьын пӧртшӧ ден кугыжан пӧртыштӧ улшо шергакан арверым поген налын. Мо тушто лийын, чыла налын. Тудо Соломонын ыштыме шӧртньӧ авыртыш-влакшымат налын.10Нунын олмеш Ровоам кугыжа той авыртыш-влакым ыштен да кугыжан пӧртын омсаж воктене шогышо капорол вуйлатыше-шамычлан пуэн.11Кажне гана, кунам кугыжа Господьын пӧртышкыжӧ толын, орол-влак нине авыртышым кидышкышт налыныт да тудым ужатен коштыныт, вара адакат орол пӧлемыш пыштеныт.12Кугыжа ӱҥышемын, сандене Господьын шыдыже Ровоам деч кораҥын, тудым мучаш марте пытарен огыл, вет Иудан ала-мо сайжат лийын.13Ровоам кугыжа Иерусалимыште пеҥгыдемын да кугыжаланен. Престолыш шичмыж годым тудо нылле ик ияш лийын да Иерусалимыште латшым ий кугыжаланен. Шке лӱмжӧ Иерусалимыште илыже манын, Господь Шкаланже израиль тукым-влакын мландышт гыч тиде олам ойырен налын. Ровоамын аважын лӱмжӧ Наама, тудо аммон калык гыч лийын.14Кугыжа шуко осал пашам ыштен, вет тудо Господьым уло шӱм-чон дене кычалын огыл.15Ровоамын мом ыштымыжым, тӱҥалтыш гыч мучаш марте, пророк Самейын да ончыкужшо Аддан возымаштышт серыме, тушто тудын тукымвожшымат ончыктымо. Ровоам ден Иеровоам коклаште сар эре каен шоген.16Вара Ровоам шке кугезыже-влак деке ушнен, тудым Давид-Олаште тоеныт. Тудын олмеш кугыжалан Авий эргыже шогалын.
Institute for Bible Translation, Finland