1 Куг22
1Давид тушеч лектын да Одолламысе курыкпомышыш куржын. Тидын нерген колмеке, тудын дек изаж-влак да ачажын суртысо чыла еҥ толыныт.2Кӧ нелылыкыш логалын, кӧ парымжым тӱлен кертын огыл, кӧ илышлан ӧпкелалтын – чыланат Давид деке погыненыт. Тудо нунын вуйлатышышт лийын. Тыге Давид дене нылшӱдӧ еҥ наре погынен.3Тушечын Давид Моавысе Мицфэш каен да Моав кугыжалан каласен: «Лиеш гын, Юмын мый денем мом ышташ шонымыжым пален налмешке, тек мыйын ачам ден авам тендан дене лийыт».4Давид ачаж ден аважым Моав кугыжа деке конден коден. Давидын шылме верыште улмыж годым нуно Моав кугыжа дене иленыт.5Но пророк Гад Давидлан каласен: «Тиде шылме вереш ит код, Иуда мландыш кай». Тыге Давид тушечын Херет чодыраш каен.6Давидым да тудын дене улшо еҥ-влакым ужмо нерген Саул колын. Тунам тудо Гивасе кӱкшакаште тамариск пушеҥге йымалне шинчен, кидыштыже умдо лийын. Тудын йыр сарзыже-влак шогеныт.7Саул нунылан каласен: «Вениамин эрге-влак, колыштса! Иессей эрге тыланда пасу ден виноград аҥам пуа да тендам чыладам тӱжемвуй ден шӱдывуйлан шогалта шонеда мо?8Садлан мо те мыйын ваштарешем кутырен келшенда? Нигӧ мыланем эргымын Иессей эрге дене келшымаш ойпидышым ыштымыж нерген каласен огыл. Нигӧ тендан кокла гыч мыйым чаманен огыл да эргымын мыйын ваштарешем Давид тарземым таратымыже нерген каласен огыл. Тудыжо мыланем оптышым шындылеш, тидым те кызыт шкеат ужыда».9Саулын тарзыже-влак коклаште шогышо идумей Доик каласен: «Мый Иессей эргын Новыш Ахимелех деке, Ахитув эрге деке, толын кайымыжым ужынам.10Тудо Господь деч Давидлан каҥашым йодо, тыгак кочкышым да филистим Голиафын кердыжым пуыш».11Тунам кугыжа иерей Ахимелехым, Ахитув эргым, да тудын Новышто улшо чыла иерей родо-тукымжым шкеж деке ӱжаш колтен. Нуно чыланат кугыжа деке толыныт.12Саул каласен: «Колышт, Ахитув эрге». Тудыжо вашештен: «Теве мый улам, мыйын озам».13Саул тудлан манын: «Молан те, тый да Иессейын эргыже, мыйын ваштареш кутырен келшен улыда? Тудо ваштарешем шогалже да мылам оптышым шындыже манын, тый тудлан кинде ден кердым пуэнат да Юмо деч каҥашым йодынат».14Ахимелех кугыжалан вашештен: «Кӧ тыйын еҥет-влак кокла гыч Давид семын ӱшанле? Тудо – кугыжан веҥыже, тыйын кӱштыметым шуктышо да тыйын полатыштет пагалыме еҥ.15Кызыт гына мо мый тудлан Юмо деч каҥашым йодаш тӱҥалынам? Уке, кугыжа, тыште шке тарзетым да ачамын тукымжым ит титакле, вет чыла тидын нерген тыйын тарзет нимомат пален огыл».16Но кугыжа каласен: «Тый колышаш улат, Ахимелех. Тый да ачатын уло тукымжо».17Кугыжа пеленже шогышо капорол-влаклан каласен: «Кайыза, Господьын иерейже-влакым пуштса. Нуно Давид могырышто улыт. Тудын куржмыжым паленыт, но мыланем каласен огытыл». Но кугыжан тарзыже-влак Господьын иерейже-шамыч ӱмбаке кидым нӧлталаш келшен огытыл.18Тунам кугыжа Доиклан каласен: «Кай да иерей-влакым тый пушт». Идумей Доик каен, иерей-влак ӱмбаке кержалтын да тудо кечын йытын ефодым чийыше кандашле вич еҥым пуштын.19Тудо тыгак Новышто, иерей-влакын олаштышт, илыше-шамычым керде дене пуштеден. Пӧръеҥ ден ӱдырамашымат, рвезе ден азамат, ӱшкыжымат, осёл ден шорыкымат керде дене пытарен.20Ахитув эрге Ахимелехын Авиафар лӱман эргыже гына утлен кертын да Давид деке куржын.21Саулын Господьын иерейже-влакым пуштмыжо нерген Авиафар Давидлан увертарен.22Давид тудлан каласен: «Тушто идумей Доик лийме кечынак мый паленам: тудо Сауллан садак чыла каласа. Чыла родо-тукыметын колымыжлан мый титакан улам.23Код мый денем, ит лӱд: кӧ тыйын чонетым кычалеш, тудо мыйынат чонем кычалеш. Тый мыйын аралтышем йымалне лият».
Institute for Bible Translation, Finland