3 Куг9
1Кунам Соломон Господьын храмжым, кугыжан пӧртым да чыла мом шонымыжым чоҥен пытарен,2Гаваонышто кончымыж семынак Господь тудлан кокымшо гана кончен.3Господь тудлан каласен: «Мыйын ончылнем кумалмет ден йодметым колынам. [Чылажымат кумалын йодмет семын ыштенам.] Мыйын лӱмемлан курымеш илаш чоҥымо тиде храметым Мый святитленам. Мыйын шинчам ден шӱмем эре тушко савырыме лийыт.4Тый Мыйын ончылнем Давид ачат семынак ару шӱм-чон дене чыным ыштен илаш, чылажымат кӱштымем семын шукташ, пунчал ден устав-влакем шуктен шогаш тӱҥалат гын,5Мый тыйын кугыжа престолетым Израильыште курымешлан пеҥгыдемдем. Вет Мый Давид ачатлан каласенам: ”Тыйын тукымет гыч еҥ Израиль престолышто эре шинчаш тӱҥалеш”.6Но те да йочада-влак Мый дечем кораҥыда да Мыйын пуымо кӱштымаш ден пунчал-шамычем шуктен шогаш огыда тӱҥал, каеда да вес юмо-влаклан служитлаш да кумалаш тӱҥалыда гын,7Мый Израильым тудлан пуымо мландем гыч пытарем да шке лӱмемлан святитлыме тиде храмем шке чурием ончыч кораҥдем. Чыла калыклан Израиль воштылтыш да койдарчык лиеш.8Чапланыше тиде храм деч кӱ-влак гына кодыт. Тудын воктеч эртен кайыше кажне еҥ ӧрын колта да шӱшкалтен тыге йодеш: ”Молан Господь тиде мланде да тиде храм дене тыге ыштен?”9Тудлан вашештат: ”Нуно ача-кочаштым Египет мланде гыч лукшо Господь Юмыштым коденыт да вес юмо-влак почеш каеныт, нунылан кумалыныт да служитленыт. Теве молан Господь нунын ӱмбак чыла тиде азапым конден”».10Коло ий жапыште Соломон кок пӧртым – Господьын пӧртшым да кугыжан пӧртым – чоҥен шуктен.11Хирам, Тирын кугыжаже, Соломонлан кедр ден кипарисым, тыгак шӧртньым кунар кӱлеш, тунар конден шоген. Тидлан Соломон Хирамлан Галилей мландыште коло олам пуэн.12Хирам Тир гычын Соломонын пуымо олаж-влакым ончалаш толын. Нуныжо тудлан келшен огытыл.13Тудо каласен: «Шольым, тый мыланем могай ола-влакым пуэнат?» Хирам нуным Кавул мланде манын лӱмден. Тачат нуным тыгак лӱмдат.14Кугыжалан Хирам шӱдӧ коло талант шӧртньым колтен.15Господьын храмжым, шке пӧртшым, Миллом, Иерусалим пырдыжым, Гацорым, Мегиддом да Газерым чоҥаш манын, Соломон кугыжа еҥ-влакым ӧкым пашам ышташ шогалтен.16Фараон, Египет кугыжа, Газер ӱмбак кержалтын да руалтен налын улмаш. Олам йӱлалтен, тушто илыше хананей-влакым кырен шалатен да тудым кузык шотеш шке ӱдыржылан, Соломонын ватыжлан, пуэн.17Соломон Газерым, Ӱлыл Беф-Ороным,18ир мландыште Ваалаф ден Фадморым,19тыгак шапашым аралыме ола-влакым, орван имне ден кудалышт коштмо имне-шамычлан ола-влакым угыч чоҥен. Мом Соломон Иерусалимыште, Ливан курыкышто, вуйлатен шогымо пӱтынь мландыштыже чоҥаш шонен, чыла ыштен.20Аморрей, хеттей, ферезей, [хананей,] евей, иевусей [да гергесей]-влак деч кодшо калыкым – нуно израильтян кокла гыч лийын огытыл –21тиде мландыште израиль эрге-шамыч пӱтынек пытарен кертын огытыл улмаш. Нунын деч вара кодшо тукымыштым Соломон ӧкым пашам ышташ шогалтен. Таче кечынат тиде тыгак кодын.22Но израиль эрге-влаклан Соломон тыгай пашам ыштыктен огыл. Нуно тудын сарзыже, тарзыже, полышкалышыже, сарзывуйжо, орва ден имнешке-влакын вуйлатышышт лийыныт.23Соломонын шуктен шогымо пашажын тӱҥ эскерышыже-влак вичшӱдӧ витлын лийыныт. Нуно пашам ыштыше калыкым вуйлатеныт.24Фараонын ӱдыржӧ Давид-Ола гыч Соломонын тудлан чоҥымо пӧртышкӧ илаш куснен. Вара Соломон Миллом чоҥен.25Господьлан чоҥымо жертвенникешыже тудо ик ийлан кум гана йӱлалтен пуымо надыр ден татулык надырым конден, туштак Господь ончылно тамлыпушым тӱтырен. Тыге тудо храм чоҥымо пашам мучашлен.26Соломон кугыжа тыгак Идумей мландысе Елаф воктене, Йошкар теҥыз серыште улшо Ецион-Гаверыште, корабль-влакым чоҥен.27Нине корабль дене Соломонын еҥже-шамыч пелен Хирам кугыжа теҥызыште коштын тунемше шке еҥже-влакым колтен.28Нуно Офирыш каеныт, тушто нылшӱдӧ коло талант шӧртньым налыныт да Соломон кугыжалан конденыт.
Institute for Bible Translation, Finland