1 Кур.кн21
1Израиль ваштареш сатана шогалын, тудо Давидым израильтян-влакым шотлен лекташ таратен.2Давид Иоав ден калык вуйлатыше-шамычлан каласен: «Мылам калыкын чотшым палаш манын, кайыза да Вирсавий гыч Дан марте израильтян-влакым шотлен лукса, вара мыланем каласыза».3Иоав манын: «Тек Господь шке калыкшын чотшым шӱдӧ пачаш шукемда! Мыйын кугыжа озам, нуно чыланат озамын тарзыже-влак огытыл мо? Молан мыйын озам тидым ыштынеже? Молан Израильым титакыш пурташ?»4Но кугыжан шомакше Иоавын мутшо деч виянрак лийын. Иоав каен, пӱтынь Израильым савырнен лектын да Иерусалимыш пӧртылын,5мыняр еҥым шотлен лукмо чотым Давидлан увертарен. Кердым нумалше пӧръеҥ-влак Израильыште ик миллионат шӱдӧ тӱжем, а Иуда эрге-шамыч нылшӱдӧ шымле тӱжем лийыныт.6Иоавлан кугыжан кӱштымашыже йырнык лийын, сандене тудо шотлымо чотыш Левий ден Вениамин эрге-влакым пуртен огыл.7Тиде паша Господьлан келшен огыл, да Тудо Израиль ӱмбаке орлыкым колтен.8Тунам Давид Юмылан каласен: «Тыге ыштен, мый кугу сулыкыш пуренам. Кудалте шке тарзетын титакшым, вет мый ораде семын ыштенам».9Господь Гадлан, Давидын ончыкужшыжлан, каласен:10«Кай, Давидлан каласе. Тыге Господь ойла: ”Мый тыланет кум тӱрлӧ орлыкым темлем. Кудыжым ойырен налат – тый денет тыге ыштем”».11Гад Давид деке толын да каласен: «Господь тыге ойла: ойырен нал –12але кум ий шужымаш, але кум тылзе тыйым тушманет-влак керде дене поктылаш тӱҥалыт, але кум кече мландыштет Господьын кердыже да шучко чер лиеш, Господьын Суксыжо Израиль мучко пытарен кая. Шоналте, мыйым Колтышылан могай вашмутым пуаш».13Давид Гадлан каласен: «Мылам пеш неле. Тек мый Господьын кидышкыже логалам, вет Тудын порылыкшо кугу. Еҥ-влакын кидышкышт гына логалаш огыл ыле».14Господь Израиль ӱмбаке шучко черым колтен, да шымле тӱжем еҥ колен.15Иерусалимым пытараш манын, Юмо тушко Суксым колтен. Но кунам тудыжо пытараш тӱҥалын, тидым Господь ужын да орлыкым колтымыжлан ӧкынен. Пытарыше Суксылан Тудо каласен: «Сита! Кидет кораҥде!» Господьын Суксыжо тунам иевусей Орнан идымже тураште лийын.16Давид вуйжым нӧлталын да Господьын Суксыжым ужын. Тудыжо мланде ден кава коклаште шоген, кидыштыже Иерусалим ӱмбак шуялтыме керде лийын. Тунам чоштыра вургемым чийыше Давид ден кугурак-влак кумык возыныт.17Давид Юмылан каласен: «Мый огыл мо калыкым шотлен лекташ кӱштенам? Мый сулыкыш пуренам, мый осалым ыштенам! А нине шорык-влакше мом ыштеныт? Господь Юмем, тек Тыйын кидет мыйын ӱмбакем да мыйын тукымем ӱмбаке савырна, но шке калыкетым ит пытаре!»18Тунам Господьын Суксыжо Гадлан каласен: «Давидлан ойло, тек кая да иевусей Орнан идымыштыже Господьлан жертвенникым шогалта».19Господьын лӱмжӧ дене ойлышо Гадын шомакше почеш Давид каен.20Шыдаҥым шиймыж годым Орна савырнен ончалын да Суксым ужын, а пеленже улшо ныл эргыже шылыныт.21Давид Орна деке толын. Тудым ужмеке, Орна идым гыч лектын да кугыжалан вуйжым мланде марте савен.22Давид тудлан каласен: «Мылам идыметым ужале. Калыкым пытарымаш чарныже манын, мый тудын олмышто Господьлан жертвенникым чоҥем. Тудым мылам мыняр шогымо акше дене ужале».23Орна Давидлан вашештен: «Нал тудым. Тек мыйын кугыжа озам мом сайлан шотла, тудым ышта. Мый йӱлалтен пуашлан ӱшкыж-шамычым, пулан шийме оҥа-влакым да кинде надырлан шыдаҥым пуэм. Чыла тидым мый яра пуэм».24Давид кугыжа Орналан каласен: «Уке, мый тудым тый дечет мыняр шогымо акше дене налнем. Вет Господьлан надыр шотеш мый тыйын погетым ом кондо, яра налмым йӱлалтен пуымо надырлан кондаш ом тӱҥал».25Давид тиде верлан Орналан кудшӱдӧ сикль шӧртньым тӱлен.26Тушан Давид Господьлан жертвенникым чоҥен да йӱлалтен пуымо ден татулык надырым конден. Тудо Господьым ӱжын кумалын, да Господь тудым колын – надырым йӱлалтыме жертвенник ӱмбак кава гыч тулым колтен.27Тидын деч вара Суксо Господьын кӱштымыж почеш кердыжым лодакышке пыштен.28Иевусей Орнан идымыштыже Господьын тудлан вашмутым пуымыжым ужмеке, Давид тушан надырым конден.29Моисейын ир мландыште ыштыме скинийже да надырым йӱлалтыме жертвенник тунам Гаваонысо кӱкшакаште верланеныт улмаш.30Но Давид тушко Юмо деч каҥашым йодаш каен кертын огыл – тудо Господьын Суксыжын кердыж деч лӱдын.
Institute for Bible Translation, Finland