Ugubutulo13
1Hinu, nikalola likokolu limonga lya mkalipa, likihumila mghati gha bahali. Liwelile na vimutu isaba na pembi zyaki ikumi, na kunani gha kila pembi lyaki kuwelile na likokoma, na kila kumutu ghaki kuwelile na lihina lya kumlighu Sapanga.2Likokolu hali liwonekanili handa chui, maghulu ghaki yawelile handa likokola likemilwi dubu, lilomo lyaki liwelile handa lya himba. Lila linjoka likampegha hayu likokolu makakla ghaki wogha na kitamilo kyaki kya ukulu na ulongosi mkulu.3Mutu mmonga gha hayu likokolo kiwelili handa livanga likulunga, ila lilonda lyaki liwelile lilamiswa kala. Wandu wogha kumlimawogha wawelile walikangasa na hayu likokolu na kumkovekela.4Wandu wakawela wangumyupa yula linjoka kwaikiva ampeghili yula likokolu uwesa ghaki. Hilahila wakawela wangumyupa yula likokolu, “Wakilongela ni ghani mweni kuwela handa hali likokolu? Ni ghani mweni kuwesa kutovana nayu?”5Hayu likokolu akapeghwa uweso wa kulongela milando gha kuitutumula na kumlighu Sapanga. Na akalekeselwa kulongosa kwa lipindi lya miehi ialobaini na ivili.6Akatumbula kumlighu Sapanga, akililighu lihina lyaki na kumahala katama na wala kawela nau haku kundumba.7Hilahila akalekeselwa atovani na wandu wa Sapanga na kuwasinda, akapeghwa uwesa wa kulongosa kwa kila likabila na ukolu na luga na mlima.8Wandu watangala weni kulikala kumlima wogha watemyupa mkokolu hai, ila wala wavile mahina ghao yayandikwa kukihitabu kya ukomu kya Mwanakondolu ahinjilwi kuhuma mtumbulo wa mlima wogha wamyupile ng'ogha.9Mwenikuwela na mapulukilo gha kuhyoghanila na ahyoghanili.10Paikawela mundu kavikilwa lukani lwa kuwela muhusutu, atewela muhusutu, na yula mweni kuvikilwa lukani lwa kukomwa kwa lipanga, atekomwa kwa lipanga. Kwa nagha wandu wa Sapanga wangupalwa waweli na ufumilifu na weni kuyendelela kukwinila.11Hinu, nikalola likokolu lighangi, likikwela kunani kuhuma kumlima, na lyeni liwelili na pembi miivili handa kondolu na likalongela handa linjoka lingulonga.12Likokolu hali likawela na makakala zyogha zya kulongosa kuhuma kwa lila likokolu lya mtumbulo. Likokolu hau lya ivili kawalasimisa wandu wogha kumlimawogha kumyupila likokola likulunga lya mtumbulo ndiwa mweni lilonda lya kihu lilamisilwi.13Hinu hali likokolu likalipa hali lya ivili likaghola makangaso makulunga hata akayambusa lyoto kuhuma kundumba lihuluki kumlima wogha wandu wakilola.14Anguwangongili dahile wandu watangala wenikulikala kumlimawogha kwa makangaso apeghilwi kuyaghola na lila likokolo lya mtumbulo, awalongilile wahongoli ming'omung'omu kwa kumtundamilisa lila likokolu mwenikudumulwa na lipanga ila akayendelela kulama.15Hinu akapeghwa uweso wa kulipegha mpumulo lila ling'omung'omu lya likokolu lila lya mtumbulo, ili liwesi kulongela na kuwayambusa wala wogha walemili kuliyupa lila ling'omung'omu wakomwi.16Hilahila awalasimisili kila mmonga, mnung'una na mkulunga na mnaisa na kapuku na mundu muhusutu na mweni kuwela ng'ogha muhusutu, avikwi kilangihi kuliwoku lyaki lya kuliyila au kukivungi kya wuso.17Kangi akalemesa mundu yeyosi mweni kuwela ng'ogha na kilangihi haki akotoho kuwusa wala kuhemela. Kilangihi haki ni lihina lya likokolu hali likulunga au inamba gha lihina lyaki.18Mghalu hau ungupala luhala, mweni malangu anguwesa kughalambula yiwa inamba gha likokolu hali ingumanisa niki, kwaikiva ni inamba gha mundu, inamba hazi ni imia isita na sitini na isita.
The Word for the World International