Wahebulania8
1Hinu, mghalu wa maha tungupalwa kulonga ni hau: Twenga tuvile na mtambika mkulu wa nagha, avile angulikala upandi wa kuliyila wa kitamilo kya unkosi kya Sapanga mkulu kundumba.2Haku kundumba angughola lihengu lya Utambika Mkulu mahala Pambulete pee, ingumaanisa mghati mwa mahala pachakaka pakuyupila pakundumba kuchengwili na Bambu na ng'ogha mundu.3Kila Mtambika Mkulu kahaghulwa kumyeghela Sapanga hupo na litambiku. Hinu Mtambika Mkulu wa twenga angupalwa na mweni aweli na kindu kya kuyegha.4Handa Yesu angaliyendelela kulikala haku kumlimawogha, angaliwesa ng'ogha kuwela mtambika, kwaikiva kuvile na watambika waghangi wanguyegha matambiku kwa kukovekela selia gha Sapanga ampeghili Musa.5Mahengu ghao gha kiutambika ni mlandano hela na kisisi kya ghala yavile kundumba. Ingulandana na vila amlongelili Musa. Lipindi Musa paawelili pabehi na kuchenga kibimilo, Sapanga amlongelili, “Chakaka ugholi kila kindu kukovekelana na hula mlandano ulangusilwi kula kulitumbi.”6Ila hinaa Yesu kapeghwa utumikila wa kiutambika uvile maha nesu kupiti hula wa weni. Handa vila lilaghano lila alihighilisili kwa kuwakonganisa wandu na Sapanga ni maha nesu, kwaikiva livili na mghomba ghaki kumighalu yeni kuwela maha nesu.7Kwaikiva lila lilaghano lya mtumbulo handa lingaliwela ng'ogha ulepelelu kungaliwesa ng'ogha kuwela na lilaghano lya ipili.8Ila Sapanga alolile ulepelelu kwa wandu, hinu akalonga, “Machuwa yanguhika, angulonga Bambu, niteghola lilaghano lyonu na wandu wa lighuta lya Izilaili na lighuta lya Yudasi.9Lilaghano hali litewela ng'ogha handa lila nigholile na watati ghao paniwalongola kwa umaha ili kuwahumisa kuhuma kumlima wa Misili, kwaikiva wayendelela ng'ogha kukola lilaghano lya nenga na nenga nikawaleka, angulonga Bambu.10Hali ndiwa lilaghano nitelighola na wandu wa Izilaili machuwa yahika, angulonga Bambu, Nitevika selia zyangu mumawachilo ghao na kuyandika mumioyu ghao. Nenga nitewela Sapanga wa weni na weni watewela wandu wa nenga.11Kwahela mundu atewesa kumvula myaki, hata ghangi kumlongela myaki, ‘Ummanyi Bambu’. Kwaikiva wogha, wanung'una na wakulu, watenimanya nenga.12Nitewalekesela mahakata ghao, na kuleka kukumbwike kangi sambi syao.”13Sapanga paangulonga hali ni lilaghanu “lyonu,” angulighola lila lya mtumbulo ni lya dahile. Na kindu chochosi kya dahile kinguwela kihakala na nipabehi kuyaghamika.
The Word for the World International