Wahebulania6
1Hinu, tuleki kuhyetu ghala mavulo tutumbulile kuvulwa patuwelile tumanya ng'ogha chochosi kuhabali gha Kilisito, tuyendi kuulongolo kwa ghala yeni kukamala, na ng'ogha kuvika mghomba kwa kuyendelela kulongelelela kulekana na ngalilu imhekelesa ng'ogha Sapanga na ghala mavulo yeni kulongelelela habali zya kumkwinila Sapanga,2mavulo gha ubatiso na gha kuwayupila kwa kuwavikila mawoku na gha uhinduko wa kihu na gha ulamulo wa machuwa hyogha bila mwihu.3Kwa kughola nagha tuteyendelela kukula na kukamala kuukwinila Sapanga paatepala.4Kwaikiva ni yuyughu ng'ogha kuwaghola kangi waleki sambi wandu wala wapokela vindu maheli kuhuma kundumba kwa njila gha Mpumulo wa Sapanga,5kangi wangumanya maheli yiwa Lilando lya Sapanga ni maheli na hilahila wangumanya makakala gha ulongosi wa Sapanga kumlimawogha hula utehika,6kangi wandu hagha wakaleka kila wangukikwinila kwa lukani iwesekana ng'ogha kuwahuyisa hagha ili wapati kuleka sambi kwaikiva wangumvamba Yesu kwa lihanja lya ivili.7Kwaikiva lutupi lula lungutonyelwa ndonya lihanja kwa lihanja na kumelesa mimela yeni kuwapegha mabeno watukutula hai ihighilwa na Sapanga.8Ila lutupi palikahumisa mihomi na migugu, itewela ng'ogha na umaha, hinu mtukutula atekungula hagha na kumwihu ghaki ateyanyanya lyoto.9Mwenga wapalwa wa nenga pamonga na yiwa niwayandikila kwa milando ikalipa; hata nenga nivile na uchakaka yiwa mngughola ghamaha yenikulangiha yiwa mlokolwa.10Kwaikiva Sapanga ni mmaha anguisemwa ng'ogha lihengu lya mwenga na upalo hula muulangisili kwaikiva gha mweni kwa vila muwatangili wandu ghaki na vila munguyendelela kuwatanga.11Luhujulu lwa twenga ni yiwa kila mmonga wa mwenga agholi kuyangalai hakuhaku mbaka kumwihu, ili ghala mnguyatumainila yawesi kutimila.12Hinu mkotoho kuwela wapweli, ila muweli handa wala wangukwinila na weni ufumilifu, wakapokela ghala alalongili Sapanga.13Sapanga ampeghili Abulahamu akilongilile, alapili kwa lihina lyaki mweni, kwaikiva kwahela avili mkulu kupiti mweni ikamuwesesa kwa hayu mkulu kulapa kwa kutumila lihina lyaki likulu.14Sapanga alongili, “Chakaka nitekuhighila na nitekupegha wawelekwa watangala.”15Abulahamu alindilili kwa ufumilifu na akapokela hila alongelelilwi na Sapanga.16Kwaikiva wandu pawalapa, wangulapa kwa kutumila lihina lya mmonga avile mkulu kupiti weni, na kilapo kila kinguhumisa utatala wogha.17Kwa njila hai Sapanga, apalili kulangiha paluagha kwa wala watepokela akilongelile yiwa mweni kawesa ng'ogha kuhyuka kila akilongelile, akalihighilisa kwa kutumila kilapo.18Sapanga agholile vindu havi viivili, ili atupeghi moyu twenga weni kumtuhilila ili tukoli litumaini lya mighalu itehika.19Tuvili na litumaini hali handa nanga gha kulama kwa twenga. Litumaini hali linguyingila mbaka kumahala pambuleti pee kundumba.20Mahala pavile Yesu mlongola wa twenga ayingilili kwaikiva gha twenga, mweni kawela mtambika mkulu machuwa hyogha bila mwihu, handa Melekisadeki vila kaiwela.
The Word for the World International