Wagalatia6
1Walongo wa nenga, paikawela mundu kawoneka na uhakata mtenu, mwenga wenikulongoswa na Mpumulo wa Sapanga mumkanisi mundu hayu ili aleki sambi kwa njila gha unyalinyali. Na kila mmonga wa mwenga akali mihu, lukani akotoho kughola mahakata hilahila.2Mtangani mwenga kwa mwenga pamnguwela kulung'ai, kwa kughola nagha mngughola handa Kilisito angupala.3Kwaikiva mundu pakailola yiwa angumanya nesu na kunu kangumanya ng'ogha, hayu anguingonga mweni.4Ila kila mundu na aweli na ndyangilu maheli, ndiwa atewela na lukani lwa kuisifila, akileka kuilandanisa na mundu mghangi.5Hinu kila mundu na agholi lihengu angupalwa kughola.6Mpeghani mighalu hyogha maheli na mundu yeyosi mweni kukuvula kila akilongelile Sapanga.7Mkotoho kululunganyika, kwahela mundu mweni kuhigha mighalu ghaki kuulongolo gha Sapanga, kwaikiva kila akikulila mundu ndiwa atekibena.8Mundu pakaghola ghala yeni kumhekelesa mweni, atebena uyalamisu, na mwenikulongoswa na Mpumulo wa Sapanga utepokela ukomu wa machuwa hyogha bila mwihu.9Hinu tukotoho kuleka kughola ghamaha, kwaikiva patughola maheli bila kutoka na kutenyuka ng'ogha moyu hinu tutebena ghamaha lipindi palihika.10Kwa nagha, kwa vila tungupokela fwasi na tuwagholeli wandu wogha ghamaha, nesu nesu wala walongo weni kumkwinila Kilisito handa twenga.11Hau ni myandiku ghangu mweni, mnguwesa kulola vila milando inguwoneka kuwela mikulukulu.12Wandu wala wenikuyesa kuwalasimisa mwenga kuyingiswa jandu wangughola nagha, ili wawahekelesi Wayahudi wayau. Wangutila wakotoho wakahakilwa kwaikiva gha kutangasa Habali gha lipingika lya Kilisito.13Hata wala weni kuyingiswa jandu weni wanguyitikila ng'ogha malaghilo. Na wambila wangupala mwenga myingiswi jandu ili wawesi kuitutumula yiwa wawavika kilangihi kumihigha gha mwenga.14Ila nenga niisifila ng'ogha chochosi kihyetu na kihu kya Bambu wa twenga Yesu Kilisito kulipingika, kwaikiva kukovekelana na kihu kyaki mighalu hyogha gha mlima wogha hau yangunitanga ng'ogha na ngalilu ghangu gha dahile ihova kupitila kihu kya Bambu Yesu Kilisito.15Kwaikiva kuyingiswa jandu au kukotoho kuyingiswa jandu kwa kindu ng'ogha, ila kya maha ni kuwela kiumbi kihyonu.16Kuponga na luhungu vyeni kuhuma kwa Sapanga viweli na wandu wogha weni kukovekela uchakaka hau, kwaikiva weni ndiwa wandu wa Sapanga.17Hinu, kutumbula hinaa mundu akotoho kunighasa kangi kwaikiva niwela na vilangihi vya vilonda kumhigha ghangu, vinikolile kwaikiva gha kumkovekela hayu Yesu.18Walongo wa nenga, umaha wa Bambu wa twenga Yesu Kilisito uweli pamonga na mwenga wogha. Hina.
The Word for the World International