2Timoseo3
1Umanyi yiwa, kumachuwa gha mwihu kutevile na lipindi lya lung'ai.2Wandu watelipala wenibaha na weni lumatamata lya mapesa, weni kujiyinula, na weni kinyengu, na weni kulighu, na weni kuwatundamila ng'ogha walela ghao, na wavile ng'ogha na kushukwile, na wahaghulwa ng'ogha kwaikiva gha Sapanga,3wavile ng'ogha na upalo, na wapala ng'ogha kulekesela, na wabaisila, na weni kubaka ng'ogha na lumatamata lwao, na wakalipa na wapala ng'ogha ghala gha maha,4weni kuhyuka, na wandu weni lilaka lya pabehi, na wamemeswa na kuliyinula, na weni kupala mawamba kupiti kumpala Sapanga.5Wandu hagha kwa panji watewoneka handa wandu wa kumtundamila Sapanga, ila wangukingama uweso ghaki. Ulikali kutali nesu na weni.6Wamonga ghao wanguyenda kumaghuta gha wandu na kuwatola kwa kuwakwegha kwa kuwangonga wadala wavile na makakala ng'ogha kumpumulo na weni mihighu gha sambi na wangulongoswa na kila mitindu gha lumatamata lihakata,7wadala hagha wanguyangala kujivula machuwa hyogha ila wawesa ng'ogha kuhikila kumanyi uchakaka.8Wandu hagha huukingama uchakaka handa vila Yane na Yambile vila wamkingama Musa. Hagha ni wandu wa luhala libyodoka na waileka ukwinila wa chakaka.9Ila wawesa ng'ogha kuyendelela nesu kwaikiva usihisihi wa weni utewoneka lupala kwa wogha, handa iwelili kwa Yane na Yambile.10Ila wenga, uyamanya mavulo ghangu na kukovekela, na ndyangilo ghangu, na lukani lwangu, na ukwinila ghangu, na ufumilifu wa nenga, na upalo wa nenga, na kugangamala kwa nenga,11na mahakilo na lughai. Yala yanihumilili nikiva ku Anitiokia, na ku Ikonia na ku Lisitila, mahakilo hyogha niyafumilili, ila Bambu anilokolili kuhagha hyogha.12Mundu yoyose atepala kulikala ngalilu gha kumtundamila Sapanga kupitila ku Kilisito Yesu atehakilwa.13Wandu wahakata na wahwaghi wateyendelela kuwela wahakata nesu, wakingonga waghangi, na weni wakingongwa hilahila.14Ila wenga uyendeleli kulikala na yala uvulilwi na kuyakwinila nesu. Wawamanya wala wawelili wavula ghako,15kangi kuhuma ununguna ghako ungumanya Mayandiko yala yanguwesa kukupatila luhala lukani ulokolwi kwa njila gha kumkwinila Kilisito Yesu.16Mayandiko hyogha yayandikwa kwa kulongoswa na Sapanga na yamaha kwa mavulo, na kukanisa wandu mahakili ghao, na kuwalongosa na kuwavula ku ndyangilo apalili Sapanga,17ili mundu wa Sapanga aweli katimila, na kayandalwa kwa kughola kila lihengu maha.
The Word for the World International