2Petelo2

1Pahumilili walota wa uhwangi paghati gha wandu, handa vila wahumilili wavula wa uhwangi paghati mwa mwenga, wandu hagha wateyingisa mavulo gha kubyodosa gha uhwangi hata kuhikila kumlema Bambu yula awakombolili kwaikiva gha nagha wateliyeghela wenibaha mayalamisu kwa bwitu.2Kangi wandu watangala watezikovikela hazi njila zyau zya uhakata, na kwaikiva gha nagha wamonga wateghola njila gha chakaka zipughanyiki.3Kulumatamata lwao watelipatila hindu kuhuma kwa mwenga wakiwalongela milando gha uhwangi. kuhuma dahile ulamula ghao utangasilwi na kuyalamiswa kwa weni kunguwalindila.
4Kwaikiva watumikila wa Sapanga wa kundumba pawagholili sambi, Sapanga kawalekesela ng'ogha, ila awawopili minyololu kumambi kulwisa litopehu wakilindila lichuwa lya ulamulo.5Hilahila Sapanga kalekesela ng'ogha mlima wogha haku dahile, ila ayeghili ghalika lya masi kunani gha mlima hula wa wandu walikalili ng'ogha kwa kumtundamila Sapanga, ila Nuhu yula atangasili yala yangupalwa na Sapanga, Sapanga amlokolili mweni pamonga na wandu ghangi isaba.6Hilahila Sapanga anyokolili wandu wa milima gha Sodoma na Gomola kwa kuilungusa lyotu, na kuighola kuwela mlandano wa mighalu hila itewakola wandu wala wamtundamila ng'ogha Sapanga.7Sapanga amlokolili Lutu, mundu wa ulungwana, yula avile kang'ung'uliswa nesu na ndyangilu gha wala wandu wakovekela ng'ogha laghililo.8Lutu alikalili paghati gha wandu hagha, na kwa machuwa yatangala moyu ghaki hula ubhaghulwa kwaikiva gha Sapanga uwelili uhomwa nesu pakayughanila na kulola matendu ghao mahakata.9Kwa hayi, hinu, Bambu angumanya njila gha kuwalokola kumayesu wandu wala wangumkwinila mweni, na njila gha kuwawika wahakata ili akawanyokola kulichuwa lila lya ulamulo,10nesunesu wala wangukovekela lumatamata lwa higha na kupughanya ulongosi wa Sapanga.
Wavula hagha wa uhwangi ni weni kinyengu na weni kulitutumula hata watila ng'ogha kuwalighu viumbi vyeni ukwilikihi vivile kundumba,
11ila hata watumikila wa kundumba wa Sapanga weni uweso na makakala nesu, wawasitaki ng'ogha na kuwalighu hagha kuulongolo gha Bambu.12Wandu hagha wangummanya ng'ogha yula wangumlighu. Weni ni handa mikokolo ivile ng'ogha na luhala wala wanguwelekwa na kuulongolo hukolwa na kuhinjwa. Na weni handa mikokolu wateyalamiswa,13watehipwa mahakilo kwaikiva gha mahakili wayayambusili. Luheku lwau ni kughola chochosi kikwila lumatamata lwa lweni paluagha nesunesu lipindi lya pamuhi. Hinu weni ni handa malembu gha ndaka na walemafu na wanguyegha honi pamlyegha na weni kunu wakiyendelela na njila zyao zya uhwangi.14Mihu gha weni ghamema ngongola na watoka ng'ogha kughola sambi. Wangukwegha wandu wavile na makakala ng'ogha. Mioyu gha weni izyowelela kuwela na lumatamata lwa hindu. Wandu hagha walapilwa na Sapanga.15Waileka njila gha chakaka na kubyodoka na kuikovekela njila akovekelili Balaamu, mwana wa Beoli, Hayu apalili kupokela vindu kwa njila gha ulungwana ng'ogha,16ila kwaikiva gha uhakata ghaki akalipililwi na punda, mkokolo kamanya ng'ogha kulongela, akalongela kwa kutumila lilowi lya kimundu na kuukanisa ulukwali wa hayu mlota.
17Wala wavula wa uhwangi ni handa uhimbuki uvile ng'ogha na masi, weni handa ukungweta unguyeyeswa na luyegha, mwihu wa wandu hagha ni lwisa ngulu.18Wangulonga milandu gha mikwinakwina na imanyika ng'ogha, na kutumila lumatamata lwau luhakata lya higha kuwakwegha wala wavile havi pabehi waleka njila syao zihakata na wandu wangulikala kuuhwangi.19Wakiwalongela wandu waghangi yiwa watewela pekesu, ikiva wenibaha ni wahusutu wa swinda, kwaikiva mundu ni muhusutu wa kindu chochosi kingumlongosa.20Handa watyelembuka kuhuma kuuhakata wa mlima wogha hau kwa kummanya Bambu wa twenga na mlokola Yesu kilisito na pawaghomelwa kangi na sambi na zikawalongosa ngalilu ghao gha mwihu itevile ihakata nesu kupiti hila gha utumbulo.21Ingawelili mbaha kwa weni handa waimanyili ng'ogha njila gha chakaka, kupiti badili gha kumanya wangulilema lilaghilo lila lya Sapanga wapeghilwi.22Ila kihumila kwa weni hilahila kingulandana na mithali gha chakaka hila ingulonga, “Ghalu anguhuyila kangi kulyegha malukula ghaki mweniba,” na mithali ghangi ilongile, “Lighuluwi yula kaghululwa kala kawuyila kuligalausa kumandakali.” Hagha wangulandana na hagha.

The Word for the World International

https://app.library.bible/content/6f6cca05a7913c93