1Timoseo4
1Mpumulo wa Sapanga angulonga lipalalipala yiwa machuwa gha kuulongolo wandu ghangi wateleka ukwinila na kuyitikila mpumulo wa ughwangi na kukovekela mavulo gha mahyukana.2Mavulo gha nagha yangulandalwa na wandu wavile wambindingu wala wangulongela uhwangi, wavile lukani lwao luhova.3Wandu hagha wanguwakanisa wandu wakotoho kuposa na kuwalaghila wakotoho kulyegha amonga gha mulyo, mulyo hula Sapanga aulumbili ili upokelwi kwa kushukwile na wandu wogha wamkwinila na kuumanya uchakaka.4Kwaikiva kila kindu alumbili Sapanga ni maha, kwahela kindu chochosi kya kukanilwa ikiva kipokelwa kwa kushukwile,5kwaikiva vighululwa kupitila kwa lilando lya Sapanga na kwa mayupo.6Ikiva utewapegha malaghilo hagha wamkwinila Kilisito Yesu, utevile mtumikila wa maha wa Kilisito Yesu, ulelelilwi na milando gha uchakaka gha ukwinila na ghala mavulo maheli uyakovekelili.7Ila ulekani na luhumu lula lumuyinula ng'ogha Sapanga na lwa maha ng'ogha. Na uzyoweleli kulikala handa angupala Sapanga.8Kwaikiva mavulo gha kuchenga higha yavile na hupo ghaki, Ila kulikala vila angupala Sapanga kuvile na hupo kumighalu hyogha, kwaikiva yangutupegha litumaini lya ukomu wa hinaa na wakuulongolu.9Lilandu hali ni lya uchakaka, kangi lingupalwa kupokelwa kwa miwoku miivili nesu.10Twenga tunguyangala kughola lihengu nesu, kwaikiva tulivika litumaini kwa Sapanga avile na ukomu, mlokola wa wandu wogha nesu nesu wala wamkwinila.11Ila uwapeghi malaghilo na mavulo hagha.12Ukotoho kujumila mundu yoyosi akupughanyi kwaikiva wenga ni msongolo, ila uweli mlandano kwa wala wangumkwinila Kilisito; kwa vila ungulongela, ndyangilu ghako, upalo, ukwinila na ngalilu maheli.13Utumili lipindi lyako na uyangalai ghako kusoma paluagha Mayandiko, kutangasa na kuvula, mbaka panitehika.14Ukotoho kuleka kutumila uweso ghako wa weka hula upeghilwi na Sapanga kupitila milando gha walota wa Sapanga, pauvikilwa mawoko na wagogolo.15Uweli na kuyangala kumighalu hagha na uyagholi ili kila mundu aloli vila unguyendelela maha.16Uligholokeli wenga umweni na kulola mavulo ghako, na uyendeleli kughola hagha. Kwaikiva paughola nagha utejilokola umweni pamonga na wala wangukuyoghanila.
The Word for the World International