1Petelo4
1Hinu kwaikiva Kilisito ahakiliwi kihigha, na mwenga hilahila mgupalwa kuwela kulukani lulalula kwaikiva mundu pakahakilwa kala kihigha atelekana na sambi.2Kuhuma hinaa na kuyendelela ingupalwa mwenga kukulama kwa mwenga kuhighalile haku kumlimawogha, mlikali ng'ogha kwa kukovekela lumatamata mhakata lwa higha, ila mukovekeli mapalo gha Sapanga.3Kwaikiva lipindi lya kuyetu mtumilili lipindi litangala kukulikala kwa mwenga mkighola mighalu hila igholwa na wandu wammanya ng'ogha Sapanga hinaa ikwila. Mlikalili kungongola, lumatamata luhakata, kunywegha nesu, mihambu gha kunywegha uyimbi nesu na kuhina kwa kutikulilana, na kulitundamila ling'omung'omu kuwela ni kumyomelesa Sapanga.4Hinaa, wandu hagha wamkwinila ng'ogha Sapanga wangulikangasa pawalola mkovekelana ng'ogha kangi na weni kumahakata ghao makulunga, hinu wanguwalongelela hofyo,5ila watepalwa kuyegha mavalangilo kuulongolo gha yula aliyandala kala kuwalamula wala wakomu na wala wahovili.6Ndiwa kwaikiva Habali Maha ikatangaswa hata kwa wala wahovili, ili walamulwi handa wandu waghangi kuhigha, ila kumpumulo walikali handa angupala Sapanga.7Mwihu wa mighalu hyogha wa pabehi. Hinu muweli na kuilongosa weni na muweli mihu ili muwesi kuyupa.8Pamonga na hagha hyogha mngupalwa myangalayi kupalana kwaikiva upalo ungugubika sambi zitangala.9Mkemani kumaghuta weni kwa weni kunu mkileka kuling'ung'ula.10Kila mmonga kwa hila hupo apeghilwi na Sapanga awatumikili waghangi, handa wagholokela maha wa hupo wekaweka gha Sapanga.11Mundu yula angutangasa milando ghaki iweli handa milando gha Sapanga na yula angutumikila angupalwa atumikili kwa makakala ghala apeghilwi na Sapanga ili kumighalu hyogha, Sapanga akwilikiwe kupitila Yesu Kilisito yula ukwilikihi na makakala ni vya mweni machuwa yayendelela! Yinaa.12Walongu ghangu, mkotoho kulikangasa kwa kuyeswa mayesu makulunga paghati mwa mwenga, handa kindu kya kihenja kiwakola,13ila mhekeleli yiwa mhakilwa pamonga na Yesu kilisito ili muwesi kuwela na kiheku kikulunga lipindi ukulu ghaki paugubutuliwa.14Mhighilwa ikiva wanguwalighu kwaikiva gha lihina lya Kilisito, kwaikiva Mpumulo wa Sapanga ungulikala mghati mwa mwenga.15Ila pakotoho kuwela na mundu yoyosi paghati gha mwenga kanguhakilwa kwaikiva ni mkoma wandu, mwihi au mghola mahakata, au myambusa mlitovi weni kwa weni.16Ila ikiva mundu yoyosi pahakilwa kwaikiva gha kumkovekela Yesu kilisito, akotoho kuwela na honi, ila amtundamili Sapanga, kwaikiva kapeghwa lihina hali Kilisito.17Lipindi lya ulamula lihika kala na ulamula hau ungutumbula na wandu ghaki Sapanga mweni, hinu palitumbula kwa twenga, mwihu wa wala watundamila ng'ogha Habali Maha gha Sapanga utewela ghuli?18Hilahila handa, “Yuhu yuhu ng'ogha kwa wandu walungwana kulokolwa, hinu itewela ghuli kwa wala wandu wamtundamila ng'ogha Sapanga na weni sambi?”19Hinu, wala wanguhakilwa kwa kumkwinila Sapanga, wangupalwa, kupegha mioyu ghao kwa Sapanga yula mweni kukwinilwa na wayendeleli kughola ghala ghamaha.
The Word for the World International