1Yohana5
1Mundu yeyosi mweni kukwinila yiwa Yesu ni Kilisito, hayu ndiwa mwana wa Sapanga. Na mundu yeyosi mweni kupala tati angumpala hata mwana wa tati hayu.2Havi ndiwa tungumanya yiwa tunguwapala wana wa Sapanga, kwa njila gha kumpala Sapanga na kuyayitikila malaghilo ghaki,3hai ni kwaikiva kumpala Sapanga ni kuyatimilisa malaghilo ghaki, na malaghilo ghaki ni mayuyughu,4kwaikiva kila yula mweni kuwela mwana wa Sapanga anguwesa kusinda sambi sya mlima wogha. Havi ndiwa tunguwesa kusinda sambi sya mlima wogha, ni kwa kukwinila kwa twenga.5Ghani anguwesa kusinda sambi sya mlima wogha hau? Ni mundu yula mwenikukwinila yiwa Yesu ni Mwana wa Sapanga.6Yesu Kilisito agubutuliwi na Sapanga kumlimawogha, kwa kubatiswa kwa masi na kuhakilwa mbaka kuhova. Ng'ogha kwa kubatiswa kwa masi weka bali kwa kuhakilwa mbaka kuhova. Na mweni Mpumulo wa Sapanga angumlongelela yiwa ni chakaka, kwaikiva Mpumulo wa Sapanga ni mlongela chakaka.7Hinu, wawela waitatu weni kutughola tumanyi yiwa Yesu ahumile kwa Sapanga,8Weni ni Mpumulo, masi na mwahi, na hagha waitatu wangulongela mghalu hulahula yiwa Yesu kahuma kwa Sapanga.9Ikiwela wandu pawangulongelela mghalu wa chakaka tunguwakwinila, ila mghalu hula anguulongela Sapanga ni mkulu nesu, na havi ndiwa Sapanga katulongela, atulongelili uchakaka kunani gha habali zya Mwana ghaki.10Mundu yeyosi mweni kumkwinila Mwana wa Sapanga hayu kana chakaka hai atulongelili Sapanga, ila wandu wamkwinila ng'ogha Sapanga, wangumghola Sapanga kuwela mhwangi kwaikiva wangukwinila ng'ogha kila Sapanga katulongela kunani gha Mwana ghaki.11Habali gha chakaka yeni ndiwa hai, Sapanga katupatila ukomu wa machuwa hyogha bila mwihu, ukomu hau tunguupokela kwa kumkwinila Mwana ghaki.12Mundu mweni umonga na Mwana wa Sapanga, hayu kana hau ukomu. Ila yula kawela ng'ogha na umonga na hayu Mwana wa Sapanga, hayu kahela hau ukomu.13Ninguwayandikila mighalu hai mwenga weni kumkwinila Mwana wa Sapanga, ili mmanyi yiwa muwela na hau ukomu wa machuwa hyogha bila mwihu.14Haki ndiwa kitetughola tukotoho kutila kumyupa Sapanga, yiwa tungumanya patumyupa kindu chochosi handa anguipala atetuhyoghanila.15Mweni angutuhyoghanila patungumluwa lolosi, na kwaikiva tungumanya yiwa mweni angutuhyoghanila patumluwa, tungumanya hilahila yiwa angutupegha hyogha tungumluwa.16Paikawela mundu yeyosi angulola yiwa myaki angughola sambi zyeni kuwesa ng'ogha kumyegha kukihu kya machuwa hyogha bila mwihu, amyupili kwa Sapanga, na Sapanga atempegha ukomu. Ningulonga nagha kwa wala wenikughola sambi handa hazi weka. Ila kuwela na sambi zyeni kumvika kutali na Sapanga machuwa hyogha bila mwihu, nenga ningulongela ng'ogha amyupili myaki kwa sambi hasi.17Kughola mghalu hula Sapanga kanguujumila ng'ogha, ndiwa kughola sambi. Ila kuwela na sambi syeni kumvika ng'ogha kutali na Sapanga machuwa hyogha bila mwihu.18Tungumanya yiwa Mwana wa Sapanga kangughola ng'ogha sambi, mwana wa Sapanga anguigholokela, na Lihyukana linguwesa ng'ogha kumgholela lolosi.19Tungumanya yiwa twenga ni wana wa Sapanga, ila wandu waghangi wogha weni kumyitikila ng'ogha Sapanga wangulongoswa na Lihyukana.20Tungumanya hilahila yiwa Mwana wa Sapanga kahika kala, akatupegha malangu ili tummanyi Sapanga wa chakaka, na twenga tuwela na umonga na Sapanga wa chakaka, kwaikiva tuwela na umonga na Mwana ghaki Yesu Kilisito. Hayu ndiwa Sapanga wa chakaka, na ndiwa mweni kutupegha ukomu wa machuwa hyogha bila mwihu.21Wana ghangu, mlikali kutali na milungu gha uhwangi.
The Word for the World International