1Wakolintu15
1Hinaa, walongo ghangu, ningupala kuwakumbusa kulongelela Habali Maha hila niwatangasilile, hai muipokelili iwelili mghomba wa ukwinila wa mwenga. Na mwenga mngugangamalika kumghomba hau.2Ujumbi niwatangasilile ni Habali Maha, mwenga mtelokolwa pamkikola maha ghala niwatangasilile, handa paikawela nagha ukwinila wa mwenga wayaghi yaghi.3Nenga niwavulile mwenga mighalu gha maha nesu ivile nenga niipokelili: yiwa Kilisito ahovili kwaikiva gha sambi zya twenga handa mayandiko gha Sapanga vila yailongile,4na akavikwa kulimambi na lichuwa lya itatu akahinduka handa mayandiko gha Sapanga vila yangulonga,5mtumbulo Yesu akamuhumila Petelo na kuulongolo kwa lihanja lya ivili akawahumila wala wandumindumi ikumi na ivili.6Kuulongolo akawahumila wakwinila wayetu wenikuwela kupiti imia itano kwa pamonga, na waghangi ghao wakomu na waghangi wahova kala.7Kuulongolo akamuhumila Yakobu na hinu akawahumila wandumindumi wogha.8Mwihu wa wogha, akanihumila nenga kangi, nikawela handa mwana mweni kuwelekwa kulipindi lyaki ng'ogha.9Kwaikiva nenga ndiwa msokombi kupiti wandumindumi wogha, nipalwa ng'ogha kukemwa mndumindumi, kwaikiva nilihakilili lipinga lya wandu wamkwinila Kilisito wenikuwela wandu wa Sapanga.10Ila kwa umaha wa Sapanga hinaa niwela mndumindumi, na highili anipeghili kambegha ng'ogha yaghi yaghi. Ng'ogha handa nigholile lihengu lya kutangasa kupiti wandumindumi waghangi wogha, ng'ogha nenga ila ni highili zya Sapanga zyenikuwela pamonga na nenga.11Hinu, nenga ndiwa nitangasili au wala wandumindumi waghangi, hali ndiwa tungulitangasa na mghalu hau ndiwa mnguukwinila.12Hinu handa tungutangasa yiwa Kilisito ahindukili, kwa kyani wamonga wa mwenga mngulonga kwahela uhinduko?13Ila handa kwahela uhinduko, hinu hata Kilisito ahindukile ng'ogha.14Kangi ikiva Kilisito kahinduka ng'ogha, kutangasa kwa twenga kwa yaghi yaghi na kukwinila kwa mwenga ni yaghi yaghi.15Kupiti hagha hyogha, twenga tungaliwoneka yiwa wahwangi kunani gha habali gha Sapanga, kwaikiva tuwalongilile yiwa Sapanga amuhindulile Kilisito, ila kamuhindula ng'ogha, paikawela ni chakaka hinu weni kuhova watehinduka ng'ogha.16Kwaikiva handa wahovili watehindulwa ng'ogha, hinu hata Kilisito mweni ahindukile ng'ogha.17Kangi handa Kilisito kahinduka ng'ogha, ukwinila wa mwenga ni yaghi yaghi, na mwenga mnguyendelela kuwela na sambi zyenu.18Hinu, wogha wala wahovili wakiwela wangumkwinila Kilisito wayalamika.19Ikiva litumaini lya twenga mghati gha Kilisito ni kwaikiva gha ukomu hau hau, twenga tungupalwa tuwonelwi luhungu kupiti wandu wogha kumlima wogha.20Ila kwa chakaka Kilisito ahindukile, mweni ni wamtumbulo na kilangihi kya chakaka kwa wala wahovili yiwa watehindulwa.21Kwaikiva handa vila kihu kiyeghilwi na mundu mmonga, hilahila na kuhinduka kuyeghwa na mundu hayu mmonga kumlima wogha.22Handa vila wandu wogha wanguhova kwaikiva wahumila na Adamu hilahila wandu wogha wangugholwa wakomu kwaikiva gha kukongana na Kilisito.23Ila kila mmonga atehinduka kwa kukovekela njila hai, Kilisito ahindukile mtumbulo na kuulongolo ghaki wala wenikuhova kunu wakimkwinila Kilisito watehindulwa pala paatehika Kilisito.24Hinu mwihu utehika lipindi Kilisito paatempegha Sapanga Tati unkosi, paateyaghamisa kila ulongosi na uweso na makakala.25Kwaikiva Kilisito atelongosa mbaka lipindi awasindi wahakata ghaki na kuwalongosa.26Mhakata wa mwihu kuyalamiswa ni kihu.27Kwaikiva Mayandiko yangulonga nagha, “Sapanga kavika vyogha pahi gha ulongosi ghaki Kilisito.” Ila Mayandiko payalongile, “Vindu vyogha vivikwa pahi gha ulongosi ghaki Kilisito,” ingulangiha lipala lipala yiwa Sapanga kawela ng'ogha pahi gha Kilisito, kwaikiva mweni ndiwa mweni kuvika vindu vyogha pahi gha ulongosi gha Kilisito.28Ila vindu vyogha pavitevikwa pahi gha ulongosi wa Mwana ghaki, ndiwa namweni Mwana atejivika mweni pahi gha ulongosi wa Sapanga, ili Sapanga alongosi vindu vyogha na kila mahala.29Hinu handa kwahela uhinduko, ghuli, wategholaghuli wala wabatiswa kwaikiva gha wandu wahovili? Handa wahovili watehindulwa ng'ogha kwa kyani wandu wangubatiswa kwaikiva gha weni?30Na kumbandi gha twenga kwa kyani tungujiyambusila kuhova kila lelo?31Walongo gha nenga kila lelo nenga ninguliyambusila kihu! Chakaka ningulonga! Ningujisifila kwaikiva gha mwenga kukongine na Yesu Kilisito Bambu wa twenga.32Handa litumaini lya nenga lingaliwela lya mlima wogha hau, hinu kutovana kwa nenga na wandu wenikuiwela wakalipa handa mikokolu kumlima wa Efesu, ghuli kutenitanga niki? Handa wandu wahovile watehindulwa ng'ogha hinu hinaa, “Tulyeghi na kunywegha kwaikiva kilau tutehova.”33Mukotoho kungongwa na wandu weni kulonga nagha kwaikiva, “Maghanja wahakata wanguyalamisa ndyangilu ghamaha.”34Hinu mkalamuki walongo, mtumbuli kulama maha, na mleki kughola sambi. Kwaikiva amonga gha mwenga wammanya ng'ogha Sapanga katu. Hai ninguwalongela, ni honi ngulu kwa mwenga.35Ila mundu anguwesa kukonya, “Ghuli wandu wahovili wanguwesa ghuli kuhindulwa? Ghuli watewela na mhigha wa ghuli?”36Ukotoho kuwela mndyungi wenga kila ukikulila kiwesa ng'ogha kumela mbaka kihovi huti.37Paukulila ungukulila mbeyu imonga hela, ikiva mbeyu gha nganu au mbeyu ighangi na ng'ogha mmela handa mmela wenikuhumila kuulongolo.38Ila Sapanga kalumba mbeyu handa inguwoneka, na kila mbeyu ivile na muwoneko ghaki.39Hilahila viumbi wakomi na weni wawela na mihigha ghao na ingulandine ng'ogha. Wandu wavile na mihigha ghao na mikokolo ivile na mihigha ghao, wambongu wavili na mihigha ghao na homba hilahila wavili na mihigha ghao.40Kangi kuvile na mihigha gha kundumba na mihigha gha kumlima wogha, ila umaheli gha mihigha gha kundumba ingulandine ng'ogha na mihigha gha kumlima wogha.41Lijuwa livile na umaheli ghaki na mwehi uvile na umaheli ghaki, na ndondwa zivile na umaheli ghaki. Pamonga na yiwa ndondwa na zyeni zilekana umaheli ghaki.42Ndiwa itewela lipindi lya kuhindulwa wandu wahovili. Handa uwela mlandanu wa mbeyu, mhigha na weni ungusikwa na kuwola ila unguhinduka ukiva mkomu.43Mhigha ungusikwa kumuwoneku wa kupughanywa na kuwela ng'ogha na makakala ila unguhinduka kumuwoneku wa utundamilu na makakala.44Mhigha pausikwa, ungusikwa na mhigha hula wa kimundu, ila pauhindulwa unguwela mhigha wa kimpumulo, handa kuvile na mhigha gha kimundu hinu hilahila kuvile na mhigha wa kimpumulo hilahila.45Iyandikwa ku Mayandiko, “Mundu wa mtumbulo avile ni Adamu awelili kilumbi mweni mkomu,” ila Adamu wa mwihu ni mpumulo mweni kuwapegha wandu ukomu.46Ila ng'ogha hula mhigha wa kimpumulo weni kulongola, ila ni mhigha wa kimundu na kumwihu ni hula mhigha wa kimpumulo.47Mundu wa mtumbulo Adamu, alumbilwi kuhuma kulutupi ila mundu wa ivili ahumili kundumba.48Wandu wogha kumlima wogha wavile na mihigha handa Adamu ila wala wavile wa kundumba wawela handa yula ahumile kundumba.49Handa vila tulandanile na mundu mweni kulumbwa kuhuma kulutupi, ingumanisa Adamu, hilahila tutelandana na mundu ahumile kundumba, ingumanisa Kilisito.50Walongo ghangu kila ningukilonga ni haki, kiloa kigholilwe kwa mhigha na mwahi vinguwesa unguwesa ng'ogha kuyingila kuunkosi wa Sapanga, wala mhigha wa kuyalamika unguwesa ng'ogha kuyingila kumahala inguyingila mihigha yeni kuyalamika ng'ogha.51Myoghanile, ninguwalongela kifisu, tutehova ng'ogha wogha ila tuteghalambulwa,52mighalu itehumila bwitu handa kufumbata na kufumbula mihu lipindi lya lipembi lya kumwihu palitetovwa, kwaikiva lipembi litetovwa na wandu wahovili watehindulwa ili wakotoho kuhova kangi na weni wateghalambulwa mihigha ghao.53Kwaikiva mhigha hau wa kuyalamika ungupalwa ughalambulwi na kuwela mhigha uyalamika ng'ogha, na mhigha wa kuhova ungupalwa ughalambulwi na kuwela mhigha uhova ng'ogha.54Kwa nagha, mhigha hau wa kuyalamika pauteghalambulwa na kuwela mhigha uyalamika ng'ogha, na mhigha wa kuhova pauteghalambulwa na kuwela mhigha gha kuhova ng'ogha, hinu lila lilando liyandikilwi litetimila, “Kihu kiyalamiswa, usindi utimila.”55“Ghuli, wenga kihu usindi ghako wa kugha? Ghuli, wenga kihu makakala ghako yenikuyegha utungu gha kugha?”56Sambi inguyegha utungu wa kihu na makakala gha sambi yanguwoneka kupitila laghililo lya Sapanga ampeghili Musa.57Ila tungumshukwile Sapanga angutupegha usindi kwa kupitila Bambu wa twenga Yesu Kilisito.58Kwa nagha, walongo ghangu wapalwa, mgholoki kwa ugangamalo kuukwinila, machuwa hyogha muyendeleli kulihumisa kulihengu lya Bambu kwaikiva mngumanya yiwa mahengu mnguyaghola kwaikiva gha Bambu mngughasika ng'ogha yaghi yaghi.
The Word for the World International