K'egbegbeho cha Sinai
1K'ophe kw'ottong attaan, mada anọng p'Israẹl akk'abina k'Ijip, m'ewu nduma dani, bẹ apyiri k'ibe s'anọng an-arukhi sa Sinai.2Mada bẹ abin ka Rẹphidim, bẹ arenga apyiri k'ibe s'anọng an-arukhi sa Sinai. Wa anọng p'Israẹl abhing mẹ, k'itzitzikha s'egbegbeho nda.3Mẹ wọ, Mosẹs ovura otza okhebha Ibinọkpaabyi, Ọvaar Ibinọkpaabyi oyer-ẹ k'egbegbeho, oben bi, “Ma wọ ode odik kw'ágbaak va pa va pa Jekọb, ọmaana anọng p'Israẹl.4‘Bọbọng ọkhaam akk'idik ara sa nnsi Ijip, ọmaana eden cha ndini bọng k'ẹrọng mach'ikyenọhn itzini va pẹ ka mbabaang, ndima nkwu ma da kaam nwobh.5Mẹ wọ, idikha bọng akhakha eho k'ettem obungichẹ, bọng abira ahok echekhi chaam, k'ottem kw'idibhon biphyir, bọng áde anọng pa kaam nhokhi ettem, kaambi ode bi oyagbin biphyir ọkhaam kaam.6Bọng áde obhon kwaam kw'afọhni-nja, ọmaana obhon kw'awurada.’ Ma wọ ode atzim p'agbaak anang anọng p'Israẹl.”7Mẹ wọ, Mosẹs ọkpa nnam okwu otzobha adeden-nọng p'anọng mba, ọtzọkha atzim biphyir p'Ọvaar Ibinọkpaabyi ọkk'ẹ ọtzọhna bi ọgbaak, ọgbaak bẹ.8Anọng mba biphyir an-abhina k'ogbe wani bi, “Ḿosi odik kpenamkpen ósi mach'Ọvaar Ibinọkpaabyi okk'obena.” Mẹ wọ e, Mosẹs ọkpa nnam ọtza ọgbaak Ọvaar Ibinọkpaabyi ebhina chabẹ.9Ọvaar Ibinọkpaabyi oben Mosẹs bi, “Kaam nhakha ndor-ọ k'eboni ch'epyi bi kaang, ifha anọng mba ábhaanga da mgbaak atzim ttar-ọ, bẹ áphennam ka kọ.” Mẹ wọ, Mosẹs ọn-ọgbaak Ọvaar Ibinọkpaabyi ebhina ch'anọng mba akk'ananga.10Ọvaar Ibinọkpaabyi oben Mosẹs bi, “Kpa nnam atza akhebha anọng mba, hok bẹ awur-owur mayina ttara ophyini. Tte bẹ agbobhi ọbara fabẹ fa for,11bọng ado for k'ewu ch'ettong ittaan, okhuri bi, Ọvaar Ibinọkpaabyi ọ́hakha k'egbegbeho cha Sinai m'ewu nduma k'ibe s'anọng biphyir arẹ-ẹ.12Kọ khe enem akhọri egbegbeho nda, abira agbaak bẹ bi, ‘Bọng tọkha ogbe kwabọng o, ọnọng oningi egbegbeho nda ovur o, yina ira ọn-ọttọhmi chẹ ọttọhmi. K'odik-ọkka, onong kpenamkpen kw'ọttọhmi egbegbeho nda, bẹ áfhẹ-ẹ ofhu.13Kẹ bẹ átzọbh-ẹ atza, asi mẹ bẹ akhum-ẹ akhọhn, bẹ kẹ ọbọhk kabun. Ode ọnọngẹya, obiro ode etzen o, kọbaan bi, bẹ attẹ-ẹ ọbọhk oruk akpen.’ Oyongi bi, bẹ agyi ẹha ch'erukhimaan-dim k'ogbe-bhirada, mẹ kwa bẹ afha arenga abaanga egbegbeho nda.”14Mẹ wọ, mada Mosẹs okk'm'egbegbekho nda ọhakha, okwu osi anọng mba awur, bẹ abira agbobhi ọbara fabẹ fa for.15On-oben bẹ bi, “Bọng do for atzik ottong iwu nttaan. Bọng ayok abẹ kayima.”16K'ekpebha ch'ewu ch'ettong ittaan, ẹbhaangkpon ẹtta, ebira ẹmani, eboni ch'epyi bi kaang ebubha egbegbeho ebir-ebir, obukpọhng obiro ogyi k'ẹrọng bi pooom, opoma osi ọnọng kpenamkpen k'ibhingabe.17Mẹ wọ, Mosẹs otzima anọng mba obina k'ibhingabe, bẹ atza akhebha Ibinọkpaabyi, bẹ abe k'egbegbeho-rin.18Irorong ibubha egbegbeho cha Sinai, okhuri bi, Ọvaar Ibinọkpaabyi ọhak m'egbegbeho nda k'ekpon. Irorong nna ivura k'ẹrọng mach'irorong s'ekpon ch'ẹwọm-ọwọma, egbegbeho nda biphyir enyingi itzama-itzama.19Ẹmọng ch'obukpọhng en-edo ẹtza-ọtza. Mẹ wọ e, Mosẹs ọgbaak atzim, Ibinọkpaabyi otzima ẹbhaangkpon obhin-ẹ.20Ọvaar Ibinọkpaabyi ọhakha k'egbegbekho cha Sinai ebir-ebir, oyeri Mosẹs bi, ovura okhebh-ẹ kẹ. Mẹ wọ, Mosẹs ovura,21Ọvaar Ibinọkpaabyi oben Mosẹs bi, “Kọ hakha atza atzọr anọng mba itzọhng, ifha bẹ aningi eden arori cha bẹ akwu are Ọvaar Ibinọkpaabyi, ofona mẹ, haabhada ape.22Kaambi afọhnẹja p'areng afora Ọvaar Ibinọkpaabyi bọ, bẹ akhaambi ahok for sabẹ, iwur-owur, oni mando ode, Ọvaar Ibinọkpaabyi ọ́nang bẹ ettuma.”23Mosẹs oben Ọvaar Ibinọkpaabyi bi, “Anọng mba k'egbegbeho cha Sinai kafha arenga abaanga, okhuri bi, kọ ọkhaam wọ atzọri man itzọhng bi, ‘Kẹ enem akhori egbegbeho nda, ahok chẹ ewur-owur.’ ”24Ọvaar Ibinọkpaabyi obhina bi, “Kọ hakha atza atzima Aarọn akwu. Yina, afọhnẹja, ọmaana anọng mba kakhaambi atzima ẹkhaari avura akwu k'Ọvaar Ibinọkpaabyi, oni mando ode, kẹ ọnang bẹ ettuma.”25Mẹ wọ e, Mosẹs ọhakha okwu okhebha anọng mba, ọgbaak bẹ idik s'Ọvaar Ibinọkpaabyi okk'obena.