1Avaarnạng4
Ikhaana s'Sọlọmọn ọttạra atọhmnạng pẹ
1Wa ọvaar Sọlọmọn ọdạbhẹ Israẹl phyi-phyibh.2Maa wọ wa ode adecho p'ikhaana sẹ:Azariya kw'ode nnwa kw'Zadọk kw'ode ọfọhnẹja;3Ẹlihorẹph ọttạra Ahija p'ade ajunungva p'Shisha, ade akkẹrẹ; Jehoshaphat kw'ode nnwa kw'Ahilud, ode oye-idik;4Bẹnaya kw'ode nnwa kw'Jẹhoyada, ode odecho kw'akpongnạng; Zadọk ọttạra Abiyata, ade afọhnẹja;5Azariya kw'ode nnwa kw'Natan, ode ọfọhnẹja, ọttạra ọnạng kw'n'ọtọhn ọvaarnạng idik;6Ahishar ode otobh-idik s'ọvaarchọhm; Adoniram kw'ode nnwa kw'Abda, ode okker-itọhm s'nạn akpokha nípua.7Wa Sọlọmọn ọkhaam adạbhẹ-nkhạma jobh-kamfa k'Israẹl phyibh, p'n'anạng ọvaarnạng ọttạra anạng p'aning k'ọvaarchọhm uchiattọhk. Ọnạng kwidede ọkhaam ophye wạnọ k'cho kw'm'usi nttọhna s'uchiattọhk mvọ nạnạng.8Maa wọ ode ache pabẹ:
Bẹn-Hur ọdạbhẹ akpecho p'Ephraim;9Bẹn-Dẹkẹr ọdạbh Makaz, ọttạra Shalbim, ọttạra Bẹt-Shẹmẹsh, ọttạra Ẹlọn-Bẹtanan;10Bẹn-Hẹsẹd ọdạbh Arubot (Soko ọttạra isek s'Hẹphẹr ide sẹ);11Bẹn-Abinadab ọdạbh Naphot-Dor (wa ẹma ọtạk Taphat kw'ode uminanwa kw'Sọlọmọn k'ọbada);12Baana kw'ode nnwa kw'Ahilud, ọdạbhẹ Taanak ọttạra Mẹgido, ọttạra Bẹt-Shan phyi-phyibh kw'ọbaang Zarẹtan, k'isekhisek kw'Jẹzrẹl, tạma k'Bẹt-Shan tạrr ukpira Abẹl-Mẹhola, ajekha afona kha Jọkmeam;13Bẹn-Gẹbẹr ọdạbh Ramọt-Gilead (ibyirukhasẹ s'Jair kw'ode Manasẹ k'Gilead ide sẹ, ọttạra nkhạma s'Argọb k'Bashan, ọttạra ifhondiden sẹ s'ikhaam abaakha arạbh attaan p'akhaam mbaakha-mma s'brons);14Ahinadab kw'ode nnwa kw'Ido, ọdabh Mahanayim;15Ahimaz ọdạbh Naphtali (ẹma kk'Basemat kw'ode uminanwa kw'Sọlọmọn ọtạkha k'ọbada);16Baana kw'ode nnwa kw'Hushayi, ọdạbh Ashẹr ọttạra Alọt;17Jehoshaphat kw'ode nnwa kw'Parua ọdạbh Isaka;18Shimeyi kw'ode nnwa kw'Ẹla, ọdạbh Bẹnjamin;19Gẹbẹr kw'ode nnwa kw'Uri ọdạbh Gilead (k'ofhon kw'Sihọn kw'ode ọvaarnạng kw'Amọr, ọttạra k'ofhon kw'Ọg, kw'ode ọvaarnạng kw'Bashan). Ẹma-ẹma wọ wa ọdạbhẹ ẹkhạma njọ.
Ẹkhaama ọttạra ekkoji ch'Sọlọmọn
20Wa anạng p'Juda ọttạra p'Israẹl asaabhẹ masẹ uyiyeng kw'ẹraanga-kha. Wa anạng mbọ achi, agwo, ettem ẹbạra erebh bẹ.21Mạnna wọ Sọlọmọn ọdạbhẹ ivaarfhon nnọ phyibh, tạma k'ọraanga kw'Euphrates, akwu akpira k'isek s'aPhilistiya tạrr akpira k'erem ch'Ijip. Wa nkhạma nnọ n'ikkena Sọlọmọn ntuma, asẹ ibạra ininga k'isekhisek kwẹ k'akpen pẹ phyibh.22Wa uchiattọhk f'Sọlọmọn ororu k'iwu ode akpobhu-mbọhk ẹrạbh ukuma jobh p'abubuma akkapyẹ, ọttạra akpobhu-mbọhk arạbh attaan p'uchiattọhk,23mmaam jobh sabẹ n'anạng uchiattọhk k'ọpa, mmaam ẹrạbh sabẹ n'anạng asạsaarẹ, ọttạra arạkhạmaan arạbh asen ọttạra mvu, akwu attạra k'achimi, ọttạra ayip, ọttạra uchimi-khora, ọttạra inọhn s'ijibhi ifor.24Ẹma wa ọdạbhẹ avaar p'ifhondiden phy-phyibh, k'ukhubha kw'ududon n'udimi, k'Ọraanga kw'Euphrates, tạma k'Tiphsa tạrr akpira Gaza, ọbạra uruk k'idira k'ukhubha kwidede.25Israẹl ọttạra aJuda, tạma k'Dan tạrr akpira Beershẹba, arukhu k'idira k'okpe kw'Sọlọmọn. Ọnạng kwidede n'uchi agrep ọttạra afig pyẹ oyeni.26Wa Sọlọmọn ọkhaam ibyi sabẹ n'achok ijaar nnọhna jobh s'nnyạnyaang nitwạr, ọbạra ọkhaama anyạnyaang-pa nnọhna ẹrạbh ukuma jobh.27Adạbhẹ p'nkhạma atạk ọnạng-ọnạng k'ophye kwẹ, n'akkena ọvạrr Sọlọmọn uchiattọhk, ọttạra anạng phyibh p'n'achi ọttọhk k'okpokkro kw'ọvaarnạng. Abẹ akwu ase bẹ́, ọttọhk vạnọ-vạnọ f'oworu bẹ kòde.28Abẹ abạra atima nnạnga sabẹ s'abarli ọttạra asạsaarẹ-bukhu p'abẹ n'anạng nnyạnyaang s'nitwạr ijaar, ọttạra nnyạnyaang idwạkh-ọdwạk, akwu achok ator k'ibyi sabẹ.Ekkoji ch'Sọlọmọn
29Wa Ubinọkpaabyi ọnạngẹ Sọlọmọn ekkoji ọttạra esonga chideden, ọttạra itina ch'esaabhẹ masẹ uyiyeng kw'ẹraanga-kha.30Ekkoji ch'Sọlọmọn ẹbạrẹ ẹyọhnga ekkoji ch'anạng phyibh p'aning k'ukhubha kw'ududon n'uyin, ẹbạra ẹbạr ọtạm ẹyọhnga ekkoji ch'Ijip phyibh.31Ẹma wa ọkhaam ekkoji ọyọhnga ọnạng kwidede, de attạr Ẹtan kw'ubin Ẹzra. Ọkhaam ekkoji ọyọhnga Heman, ọttạra Kalkol, ọttạra Darda p'ade ajunungva p'Mahol. Uyini eche k'idifhon idwạkh-ọdwạk phyi-phyibh.32Ọkpaakhẹ itọhnga s'ẹtạma nnọhna arạbh asenọfa ukuma arạbh jobh, ọbạra ọkkọhn mmạng nnọhna mfa ukuma arạbh jobh ukuma asen.33Ọkpaakhẹ idik otena akpen p'asạsaarẹ, tạma k'achigbagba p'Lebanọn tạrr ukpira k'ahisọp p'ameni k'udimokpon. Ọbạra ọkpaak idik otena k'nten, ọttạra k'ọnọhn, ọttạra ọjọhk, ọttạra atum, ọttạra nsiten.34Avaarnạng p'ọyagbin p'kk'udik kw'ekkoji ch'Sọlọmọn abhaanga n'atọhm anạng p'abin k'nkhạma idwạkh-ọdwạk bẹ́, phyi-phyibh abẹ akwu akhọhmọ itọhng anạng ekkoji ch'Sọlọmọn.The Seed Company