1Avaarnạng17
Elija ọnạngẹ ẹyaakha ch'iyoma sididen
1Ma wọ Elija kw'ubin Tishbe, k'ẹkhạma ch'Gilead obeni Ahab bẹ́, “Oche ngwọ kw'Ọvaar Ubinọkpaabyi, kw'ode Ubinọkpaabyi kw'Israẹl kw'amma mkpobh urukhu akpen, ipọhrọ, ọbạra ode ọrạngkpaang, k'icho s'm'ikwu k'iwu oro, mátebh, oyonga bẹ́ kk'ẹmma mmạnga.”Ikpembukha ọnạngẹ Elija uchiattọhk
2Ma o, Ọvaar Ubinọkpaabyi oben Elija bẹ́,3“Bina maa, sọhng k'ukhubha kw'okpebhadudon n'uyin ata attubha k'usí kw'Kẹrit, k'ukhubha kw'okpebhadudon n'uyin k'Jọrdan.4Ọma m'agwo asi ma efhobh njọ, kk'Ikpembukha ntọhma bẹ́ ẹnạng-ọ uchiatttọhk ma.”5Ma wọ usi oche kw'Ọvaar Ubinọkpaabyi ọkpaakh-ẹ. Ukwu ofona k'usi kw'Kẹrit, k'ukubha kw'okpebhadudon n'uyin k'Jọrdan, uninga kha.6Ikpembukha n'ikken-ẹ brẹd ọttạra eten k'ekpebha ọttạra ẹchọhkhawu chidede, n'ọbạra ogwo asi ma efhobh.Elija ọttạra opokwa kw'Zarẹphat
7K'okpe ma, efhobh njọ ẹkka, ukwuru s'ọrạngkpaang nạn ma ẹkhạma njọ nótebha.8Ọvaar Ubinọkpaabyi ọkpaakh-ẹ udik oben bẹ́:9“Nemi eden sọhng kha Zarẹphat k'ẹkhạma ch'Sidon, ata aninga kha. Amma kk'opokwa wạnọ ntọhna ma bẹ́ ọnạng-ọ uchiattọhk.”10Mạnna wọ ubin ofona kha Zarẹphat. Masẹ ukpir k'ẹbaakhamma ch'ofhon ngwọ, okhebha opokwa s'n'otobha ommeni. Elija oyeri opokwa nwọ oben-ẹ bẹ́, “Totokhạn, nạng-m asi ngwo.”11Masẹ ọta bẹ́, ọta ọkhaabha asi, oben-ẹ bẹ́, “Gba ttạra brẹd ọnnwakwẹ ma, nchi.”12Opokwa nwọ ubhina bẹ́, “K'oche kw'Ọvaar Ubinọkpaabyi, kw'ode Ubinọkpaabyi kwọ urukhu akpen, brẹd wạnọ-wạnọ kạ́nkhaam, oyonga ẹbọhkka ch'abubuma, ọttạra ana p'oliv k'ekpomma. Ẹgwọ n'ntobha ommeni f'm'ntima mmạna nta nwọhn uchiattọhk f'amma ọttạra nnwa kwaam, ọfha amạna anchi ampe.”13Elija oben-ẹ bẹ́, “Tte nạng-ọ ojor. Sọhng abhạna ata asi oche kw'abeni. Okhenka, tima mvọ f'akhaam asi brẹd ọnwakwẹ kwaam akken-m, bạrasẹ n'ata asi uchiattọhk f'ọma ọttạra nnwa kwọ m'achi.14S'Ọvaar Ubinọkpaabyi kw'ode Ubinọkpaabyi kw'Israẹl obeni bẹ́, ‘Igbạre sọ s'abubuma, abubuma míwor, ẹnakpomma chọ ana mása tạrr ukpira k'iwu ch'Ọvaar Ubinọkpaabyi m'otebh asi ma ẹkhạma nja.’ ”15Ofona ọta usi oche kw'Elija kk'ẹ otekha bẹ́ usi. Mạnna wọ kw'uchiattọhk uning k'iwu chidede ọnạng Elija ọttạra ikwanạng nnwa ọttạra ẹchọhmfhạr chẹ.16Abubuma nása k'igbạre sabẹ age, ana nábạra asa k'ekpomma, otor k'ọtọhnga kw'Ọvaar Ubinọkpaabyi utim Elija ọkpaak.17K'okpe ma, nnwa kw'ikwanạng nwọ kw'ọkhaam ọchọhm, ukwu ọmmẹ-ẹ. Ọmmẹ-ẹ tạrr okhema adim, okponga ma, ope.18Ikwanạng nwọ oben Elija bẹ́, “O usi-ẹyaakha kw'Ubinọkpaabyi, ode yạn kw'awun-m o?” Ttọttọ, akwu bẹ́ akwu ajim-m mpyibh saam, abạra afhọ nnwa kwaam o?”19Elija ọpọhna bẹ́, “Nạng-m nnwa kwọ.” Ọtạkh-ẹ k'mbọhk s'ọkka, utim-ẹ uvura k'ẹmaanggọ ch'ẹnyạng ch'nuninga, urur-ẹ k'ibhikha chẹ.20Nose njọhm oyeri Ọvaar Ubinọkpaabyi, oben bẹ́, “O Ọvaar Ubinọkpaabyi kw'ode Ubinọkpaabyi kwaam, node bẹ́ ọma kk'ọkhạnkạmọ ọbọhk attia okhebha opokwa nnwa kw'amma nning abẹ, kw'asi nnwa kwẹ ope o?”21Uyima ukhubha nnwa nwọ nden nttaan, ose njọhm oyeri Ọvaar Ubinọkpaabyi bẹ́, “O Ọvaar Ubinọkpaabyi kw'ode Ubinọkpaabyi kwaam, tte nnwa nnwa ọbạra uruk akpen!”22Wa Ọvaar Ubinọkpaabyi ọbhaang njọhm s'Elija, usi nnwa nwọ ọphyạbha, ọbạra uruk akpen.23Elija o udira nnwa nwọ k'ẹmaanggọ, utim-ẹ ọsạkha ẹnyạng ch'ọchọhm. Ọtạkh-ẹ ọnạng ọkka, oben bẹ́, “Kker ẹ, nnwa kwọ k'akpen ọbạra urukha e!”24Ma wọ ikwanạng nwọ obeni Elija bẹ́, “Napra wọ n'nsong bẹ́ ọma ade usi-ẹyaakha kw'Ubinọkpaayi, ọttạra bẹ́, ọtọhnga kw'Ọvaar Ubinọkpaabyi kw'uyini k'akhọ k'ẹmma ode udik ọkka.”The Seed Company