2 Samwẹl22
Ẹmọng ch'Devid ch'ẹtọhnga
1Ch'iwa Ọvaar Ibinọkpaabyi ọrọhbh Devid z'mbọhk s'Saul ọmaana awawunanọng pẹ, wa ọkkọhnọ ẹmọng nda ọnang Ọvaar Ibinọkpaabyi.2Oben bẹ́,“Ọvaar Ibinọkpaabyi wọ ode Ẹtakpa chaam,ọmaana ifabyi saam, ọttara Ọkkaan kwaam.3Ibinọkpaabyi kwaam wọ ode Ẹtakpa chaam, kẹ wọ kw'njen.Kẹ wọ ode ogbongtegba kwaam, ọmaana ẹfa ch'esi-m nnaanga.Kẹ wọ ode itubhabyi saam, ọmaana ifabyi saam, ọttara Ọkkaan kwaam.Kọ wọ asi-m nnaanga z'mbọhk s'akikọhra.4“Kaam nyerẹ Ọvaar Ibinọkpaabyi kw'ọbaan ẹtọhnga,ọkkaan-m nnaanga k'mbọhk s'awawunanọng paam.5Obo kk'aam amma ọnwọna ọkọbha,ebhobh ch'obo ẹna-m ẹfa.6Ndik s'epekwuk iyok ikọbh-m,obo ọnwọn-m amma.7Nning ny'damadama kwaam nyerẹ Ọvaar Ibinọkpaabyi;nyerẹ Ibinọkpaabyi kwaam.Oninga z'ikẹ k'ọsọhm, ọbhaanga ẹmọng chaam.Ẹmọng ch'mmomọ, ẹttẹ-ẹ k'itọhng.8“Iyagbin ifọnọ ibira inyengẹ.Ibyi s'ọrọngkpakpa ottim inyengẹokurọ ch'Ibinọkpaabyi ọdọk-ẹ.9Isisong iyin-ẹ k'asungma,akpondaak p'akọm-ọkọm ayin-ẹ z'ẹmma,akpongkkang p'ayaak-ọyaak ajerẹ k'ẹrọng.10Odwu ọrọngkpakpa, ọsaka.Ọbarẹ mmo k'ebonọ ch'ọrọngkpakpa ch'epyi bẹ́ kkang.11Ọnana k'cherubim okwur.Mbubaang s'ofum itim-ẹ ichọhnga.12Otima orungibanga obubha ifor sẹ,kw'ode ẹrọng ch'epyi-opyi z'ọrọngkpakpa.13Ọyaanttaana kw'ititika sẹ,osi akponkkang awọma.14Ọvaar Ibinọkpaabyi oninga z'ẹrọng ọtta ẹbhaangkpon.Ọgbaakadik kw'Ọvaar Ibinọkpaabyi kw'Ọyọhng ọchọhnga k'ẹrọng.15Kẹ ọtta ayuk pẹ otima ọraamẹ awawunanọng,otima akpongkkang p'ayak-ọyak, orima bẹ ábẹ̀.16Ẹmọng ch'Ọvaar Ibinọkpaabyi ọkwọhrọ,ọmaana iwọhng s'iyin-ẹ ny'asungma,isi adongiji p'ọraanga kwiden ayaakẹ k'ọyaankpa,ibira isi agbaarẹ p'ọraanga kwiden ajan k'iyaan.17“Oninga z'ẹrọng onemẹ ọbọhk ọbọk-m,ọrọhbh-m z'asi p'adong-odong.18Obir ọrọhbh-m z'mbọhk s'awawunanọng paam p'ayen ẹfa,ọmaana z'mbọhk s'attangẹ-ttangẹ-nọng p'ayọhng-m ẹfa.19Bẹ marim-m ábẹ̀ k'ogbe kw'idik ikebh-m,okenaka, Ọvaar Ibinọkpaabyi oke-m ẹfa.20Kẹ kk'aam otima ochina k'ibyi s'iwen ẹkpa,okurọ k'ottemdaam kw'oyen ọmaan-m.21“Ọvaar Ibinọkpaabyi kk'ọsa ọnang-m otor k'atoriji paam.Kk'aam ọtaama otor k'awuriji p'mbọhk saam.22Kaam kk'nden s'Ọvaar Ibinọkpaabyi ntora.Kaam Ọvaar Ibinọkpaabyi kimpinẹ, okurọ bẹ́, nnam kimkpa mbọr-ẹ.23Apaanga pẹ maphyir aning-m k'ettem,asana pẹ kimbhumọ.24Kaam epyima z'ikẹ k'ititika kinyen,kaam epyibha kinsi.25Ọvaar Ibinọkpaabyi kk'aam ọtaama otor k'atoriji paam,obir otor k'ose kw'nwurọ s'ikẹ k'ititika.26“Ayok p'ayen ichichera k'ikọ bọ p'ad-akọhka ichichera,akọhka anọng p'nna epyima ayen bẹ́, kọ epyima kayen.27Ayok p'awurọ ettem bọ p'ad-akọhka bẹ́, kọ awurọ ettem,okenaka, anọng p'atukọ anọng bọ p'ad-akọhka bẹ́, kọ adong-odongọ.28Kọ ad-akkaana anọng p'asak ifor.Ṉ́nòdè anọng p'age ifor, akkerẹ bẹ ichen, ọfha asak bẹ eninga.29O Ọvaar Ibinọkpaabyi, kọ wọ ade ottoringkkang kwaam.Ọvaar Ibinọkpaabyi ọbhakẹ orungibanga kwaam ozeng ọyaanttaana.30Ẹkkaana chọ ch'im'ntima mkpo nrima agbongnọng ábẹ̀,mbira nna bẹ mkpang, okurọ bẹ́, Ibinọkpaabyi kwaam obe ọmaan-m.31“Osisi kw'Ibinọkpaabyi otor-otor,ọgbaakadik kw'Ọvaar Ibinọkpaabyi ode bẹ́ gbẹẹng.Kẹ ọd-ọkaam anọng maphyir p'arọbhọ ajen-ẹ.32Anyi wọ ode Ibinọkpaabyi, kw'ọkpanẹ Ọvaar Ibinọkpaabyi?Anyi wọ obira ode Ẹtakpa, kw'ọkpanẹ Ibinọkpaabyi?33Kẹ Ibinọkpaabyi wọ ọnang-m ẹfa,obira okkerẹ ozengabho kwaam.34Kẹ osi mmokpatọkọ saam ide mach'mmokpatọkọ s'ochimẹ,osi-m mbe k'obyi f'ogor-ogorọ.35Kẹ ọchọhm-m mbọhk s'egbong oririma,ọfha mkpo oyuk kw'ode opo nnyọhngọ.36Kọ anang-m ogbongtegba kwọ kw'ẹnaanga.Ẹkkaana chọ kk'aam ẹsa nyena eche.37Kọ asi eden ch'nzeng ewen ẹkpa,ọfha mmodọngọ ining-m ikwok.38“Kaam nkwubhọ awawunanọng paam maa, mfhọ bẹ.Nnam kimbhakẹ maa, mfhọ bẹ.39Mfhọ bẹ, mbarẹ bẹ ntọkọ,ọnọng kw'oge eso kode.40Kọ anang-m ẹfa ch'egbong oririma,abir asi anọng p'arim-m ábẹ̀, maraka nso anang-m.41Kọ asi awawunanọng paam marọbh-m,mbir mfhọ ayok p'attaang-m ọttaangẹ.42Mabhom ẹkkaana, okenaka, ọnọng kw'ọkkaan bẹ kode.Mabhom ayerẹ Ọvaar Ibinọkpaabyi, okenaka, bẹ ẹmọng kosi.43Nkok bẹ maa, mazeng oyiyeng,mbir mbarẹ bẹ ntọkọ mach'alilọhbhọ p'adenkpaarẹ.44“Kk'aam arọhbha k'mbọhk s'anọng p'arim-m ábẹ̀,abir asok-m mach'oso kw'nkọma.Anọng p'uwa kaam ina nzong, bẹ bọ nnade atọhmnọng paam menda.45Akkikkennọng nnarak eso anang-m.Mabhubhaanga ọgbaakadik kwaam, manang-m ikpukpobha.46Nttem ibhaaka bẹ maphyir, bẹ́ waaamafọnọ-ọfọnọ z'ọfabyi fabẹ.47“Ọvaar Ibinọkpaabyi orukọ akpen! Ẹtọhnga ede ch'Ẹtakpa chaam!Etina k'ẹrọng ede ch'Ibinọkpaabyi, kw'ode Ẹtakpa ọmaana Ọkkaan kwaam!48Kẹ wọ ode Ibinọkpaabyi kw'od-otuka idik saam.Ke wọ obir ọtọka nkọma osok izek-izek kwaam.49Kẹ wọ osi-m nnaanga z'mbọhk s'awawunanọng paam.Atọka anọng p'attaang-m, asok izek-izek kwaam,abir arọbh-m z'mbọhk s'okikọhra.50Ofona nya, O Ọvaar Ibinọkpaabyi, kaam m'ntọhng-ọ k'ikpakaana s'nkọma.M'mbira nkkọhn amọng ntima ntọhnga eche chọ.51“Kẹ ọnang ọvaarnọng kwẹ nkema siden,ọkọhka ọnọng kw'ikk'ana obyenga k'eso ọdaakẹ kwẹ kw'ina etuna oyen,kw'ode Devid ọttara iva p'iva pẹ, ttattampe.”The Seed Company