2 Avaarnọng16
Ahaz otim ẹvaar ch'Juda
1Ny'icho ttong ichi kkamfa s'Pẹka kw'ode nnwa kw'Remaliya ọbaabh Israẹl, nya wọ kw'Ahaz kw'ode nnwa kw'Jotam ọtọm Juda obubaabha.2Wa Ahaz ode icho ẹrọbh k'atam, k'ogbe kw'otim ẹvaar. Oninga z'Jẹrusalẹm ọbaabha k'icho ichi kawanẹ. Wa idik s'itor-otor kosi k'ititika s'Ọvaar Ibinọkpaabyi, kw'ode Ibinọkpaabyi kwẹ, mach'uwa Devid kw'ode otte, osi.3Wa otorọ ntọkọ s'avaar p'Israẹl maa, ọkwọmọ nnwa kwẹ k'ekpon otima ọfọhnọ ẹja, obir osi ibọkiji-dikse s'iwa Ọvaar Ibinọkpaabyi ozeng ábẹ̀, okwubh nkọma saabhada, pira anọng p'Israẹl napyirẹ.4Ọfọhnọ nja, obir ọkwọmọ insẹns k'ọja-byi f'ọyaankpa, ọmaana k'agbeso, ọttara k'ofokodo kw'echi kpenamkpen.5Nya o, Rezin kw'ode ọvaarnọng kw'Aram, ọmaana ọvaar Pẹka kw'Israẹl kw'ode nnwa kw'Remaliya, mabina, mad-arima anọng p'Jẹrusalẹm ábẹ̀. Makọbha Ahaz ake k'ettem. Okenaka, m'kẹ kakpo akema.6Ny'ogbe nwo, Rezin kw'ode ọvaarnọng kw'Aram, okwubh anọng p'Juda. Anọng p'Edom atọka obhon kw'Ẹlat aruk maa, pyirẹ menda nwa.7Ahaz okwu ọtọhm azeng-eden pẹ z'Tiglat-Pilẹsa kw'ode ọvaarnọng kw'Asiriya bẹ́, matek-ẹ bẹ́, “Kaam nde ọtọhmnọng kwọ, mbir nninga k'ẹfa chọ. Kwu, ọfha akkaana, arọbh-m k'mbọhk s'ọvaarnọng kw'Aram, ọmaana ọvaarnọng kw'Israẹl p'ad-arim-m ábẹ̀.”8Nya o, Ahaz ọtọka silva, ọmaana gol p'oze z'Ọsọhm kw'Ọvaar Ibinọkpaabyi, ọmaana mbo p'aning z'ekwurukpa ch'ọvaardimpa, ọtọhm mach'ẹnanga, ochena ọvaarnọng kw'Asiriya.9Ọvaarnọng kw'Asiriya ochera ọmaana nttọhna njo s'Ahaz, od-orima anọng p'Damaskọs ábẹ̀. Ọbọka anọng p'obhon nwo otima ochina z'Kir, obir ọfhọ Rezin.10Ọvaar Ahaz obina ozeng z'Damaskus, od-okebha Tiglat-Pilẹsa kw'ode ọvaarnọng kw'Asiriya. Oze ija-byi z'Damaskus, ọkkẹr sẹ, ọtọhm ọnang Uriya kw'ode ọfọhn-ẹja bẹ́, osi ise njo.11Minna kw'Uriya kw'ode ọfọhn-ẹja, ottim ija-byi otor k'ose kw'Ahaz ikk'oninga z'Damaskus, ọtọhm ọnang-ẹ. Wa ottim ija-byi njo maphyir pira Ahaz nokwun.12K'ogbe kw'ọvaar Ahaz obin z'Damaskus okwuna, okwu oze ija-byi njo, ozenga ọnyọma jẹ, ọd-ọnang nnanga za.13Ọnang nnanga s'ẹkwọmọ, ọmaana s'achimọma. Obir obyenga atuk, ọmaana izẹ s'eforgbaka ny'ija-byi njo.14Otinẹ ija-byi s'matim brons asi s'ining ny'ititika s'Ọvaar Ibinọkpaabyi, otima obina ny'ititika s'Ọsọhm kw'Ọvaar Ibinọkpaabyi, ny'njeka kw'ija-byi ibhasẹ ọmaana Ọsọhm kw'Ọvaar Ibinọkpaabyi. Ọtọka jẹ osok z'ebir-ebir kw'ija-byi ibhasẹ.15Wa ọvaar Ahaz okwu ọnang Uriya kw'ode ọfọhn-ẹja ẹfa bẹ́, “Ny'ija-byi ibhasẹ siden, fọhnọ ẹja ch'nnanga s'ẹkwọmọ k'ekpebha. K'ẹsọhka, afọhnọ ẹja ch'ẹnanga ch'akpomọma, ẹnanga ch'ọvaarnọng ch'ẹkwọmọ, ọmaana akpomọma pẹ, ọmaana nnanga maphyir s'ẹkwọmọ s'anọng p'ẹkọma ndo, ọmaana ẹnanga ch'akpomọma pabẹ ọttara ẹnanga ch'atuk. Tọka izẹ s'nnanga s'ẹkwọmọ maphyir, pyaakẹ ny'ija-byi nja, abir afọhnọ nja, abharẹ nya. Okenaka, kaam m'ntima ija-byi s'matim bronz asi, mbọbh Ibinọkpaabyi ose kw'm'nsi.”16Wa Uriya kw'ode ọfọhn-ẹja, osi mbengana k'ose kw'ọvaar Ahaz ikk'ẹ obena.17Ọvaar Ahaz ọkpaara mmakwubhchi s'nnana njo, pira ọrọhbha agbangbang nya. Ọsaka ẹgbangbangjọ z'abhaamdim p'matim bronz asi, py'ening izek-izek kw'nnana njo, pira nọtọk ọnana k'ẹta.18Wa otinẹ ikkira s'ẹwọhngkwoka s'iwa nkk'attima ny'Ọsọhm kw'Ọvaar Ibinọkpaabyi, obir ọrọhbha ebhumma ch'avaar ad-azenga adim z'Ọsọhm kw'Ọvaar Ibinọkpaabyi, ch'ede nkọmẹ za ndo ch'ọvaarnọng kw'Asiriya.19Idik njoza maphyir s'iyinẹ k'ogbe kw'Ahaz ọbaabh, ọmaana idik maphyir s'osi, makkẹrẹ z'anwẹr p'avaar p'Juda.20Wa Ahaz ope otor ab'otte za, manọhng-ẹ z'ebhondim ch'Devid. Hezekiya kw'ode nnwa kwẹ, okwu ọtọka ẹvaarninga chẹ.The Seed Company