1 Samwẹl5
Masokọ Ẹkkọhbhọ ch'Echekẹ z'ibhon s'Philistiya
1K'ogbese kw'anọng p'Philistiya nkk'Ẹkkọhbhọ ch'Echekẹ ch'Ibinọkpaabyi abọka, matinẹ ny'Ẹbẹneza atima achina z'Ashdọd.2Minna kw'matinẹ Ẹkkọhbhọ ndo z'ọkapa kw'masokọ ọka f'okpen Dagọn.3K'owusobha ch'anọng p'Ashdọd naphyabh ny'ekpebha, maze bẹ́, Dagọn kk'ọtta okwubha ititika ny'izek, ny'ititika s'Ẹkkọhbhọ ch'Echekẹ! Matinẹ Dagọn abir asok z'ibyi sẹ.4Okenaka, k'ose kw'ewu esobh nya, Dagọn kk'ọtta okwubha ititika ny'izek ny'ititika s'Ẹkkọhbhọ ch'Echekẹ! Eso chẹ ttara mbọhk kk'ekpira eyima ny'ẹsọhmma; ifor sẹ jẹ-jẹ jọ nirikẹ.5Nya wọ osi, tọma za maa, pyirẹ ma, afọhn-nja p'Dagọn, ọttara anọng p'mad-adim z'ọkapa kw'Dagọn z'Ashdọd, nny'ẹsọhmma kad-abarẹ.6Wa Ọvaar Ibinọkpaabyi ọnang anọng p'Ashdọd ọttara ayok-nkọma irem s'ibar-ọbar mawuriji; osi bẹ itama siden, obir ọtọhbh bẹ ebirakpo.7K'ogbe kw'anọng p'Ashdọd maze idik s'id-iyin nya, maben bẹ́, “Ẹkkọhbhọ ch'ọka f'anọng p'Israẹl kẹbaan bẹ́, eninga ma ẹmaana mina, okurọ bẹ́, kk'mina ọttara Dagọn kw'ode ọka famina irem siden ẹnanga.”8Minna kw'mayerẹ asogbọhkọnọng p'Philistiya mabọbh bẹ bẹ́, “Mm'osi yen ọmaana Ẹkkọhbhọ ch'Echekẹ ch'ọka f'Israẹl?”Mapọhna bẹ́, “Màtinẹ Ẹkkọhbhọ ch'Echekẹ ch'ọka f'Israẹl tima zeng z'obhon kw'Gat.” Minna kw'matinẹ Ẹkkọhbhọ ch'Echekẹ ch'Ọvaar Ibinọkpaabyi kw'Israẹl atima achina z'Gat.9Okenaka, ch'nkk'Ẹkkọhbhọ ndo atina, wa Ọvaar Ibinọkpaabyi ọtọhmọ itama ọnang anọng p'obhon nwo, oke bẹ k'ojora fiden. Osi anọng p'ebhondim ndo itama mawuriji, tọma ny'ivava pyirẹ z'ataminọng, ọjẹ bẹ ebubuka ch'ebirakpo.10Minna kw'matọk Ẹkkọhbhọ ndo ch'Ibinọkpaabyi mad-arik z'Ẹkrọn.
K'ose kw'mad-atima Ẹkkọhbhọ ndo adim ny'Ẹkrọn, anọng p'Ẹkrọn abina amọng k'ẹrọng, mabhom bẹ́, “Nkk'Ẹkkọhbhọ ch'ọka f'Israẹl atọka achena mina bẹ́, ọfhọ mina ọttara anọng pamina.”11Minna kw'mayerẹ asonọng p'Philistiya maphyir mattonga, maben bẹ́, “Màtima Ẹkkọhbhọ ch'ọka f'Israẹl bina ma, tte ẹkpa nnam z'ibyi sẹ; ini minna ode, m'ẹfhọ mina ọttara anọng pamina.” Ny'ogbe nwo, wa ojora f'obo kk'ebhondim ndo ọbọka mawuriji, Ibinọkpaabyi obir ọnang bẹ irem siden.12Ayok mbo p'nna ape, wa matọk irem s'ebirakpo. Ẹmọng-bhoma ch'ebhondim ndo, epyirẹ z'ẹrọng.
The Seed Company