1 Samwẹl18
1Ch'Devid kk'odik ọgbaaka ọmaana Saul maphyir, Jonatan okwu ode eyokdikkobh-ttem ch'Devid, Devid obir ọdaak-ẹ mach'ifor sẹ.2Tọma ny'ewu ndo, Devid oninga ọmaana Saul, ọdọk kocher bẹ́, Devid ọbhana z'otte k'ọsọhm.3Jonatan osi echekẹ ọmaana Devid okurọ ch'Devid ọdaak-ẹ mach'ifor sẹ.4Jonatan ọwọra ọnọhma-baba kw'ọfọr ny'ifor, ọnang Devid, ọmaana ọnọhma kw'ọkpaar mbọhk opyirẹ ny'ndudungọ, ọmaana ọkkangkkang, ọmaana oyuk, ọttara odikpa kwẹ.5Ọtọhm kpenamkpen f'Saul ọtọhm-ẹ, Devid od-osi mawuriji. Ofona nya o, Saul ọnang-ẹ ediden ch'agbongnọng. Odik nwa ọdaam anọng maphyir, ọttara atọhmnọng p'Saul ettem.6K'ogbe kw'agbongnọng mbo mad-akwuna-okwuna, ch'Devid ikk'oPhilistiyanọng nwo ọfha, panọng mabina ny'ibhon s'Israẹl maphyir, matima ọkkọhna, ọmaana otubha, ọmaana amọng p'odidaama, ọmaana mbin, ọttara agim-ogim, matima akebha ọvaar Saul.7K'ose kw'matubhọ, makkọhn bẹ́,“Saul kk'anọng ọfha k'nnọhna k'nnọhna,Devid ọfhọ anọng k'nnọhna s'ina obhika ide.”8Wa Saul ọdọk-ẹ mawuriji, okurọ ẹmọng nda. Ochibhẹ bẹ́, “Nkk'Devid atọhnga ọmaana nnọhna s'ina obhika ide, okenaka, matọhnga kaam bẹ́, mfhọ k'nnọhna jẹ-jẹ. Mbọng vọ ina orik-ẹ bẹ́, ọtọka, ina ẹvaar ode?”9Tọma ny'ogbe nwo china ororo, Saul noyena ottemma ọmaana Devid.10Ewu esobh nya, egwugwumatama ch'efon z'Ibinọkpaabyi, ẹnwa Saul ẹfa-ẹfa, ẹyẹ-ẹ, ọtọma idik oyiyaakẹ ny'ọsọhm kwẹ. Ch'Devid od-okir ogim-ogim mach'od-okkikken osi, Saul otima ọkọhn ny'ọbọhk ọbharẹ,11oben z'ettem bẹ́, “M'nkwum Devid mmaana ny'etumọ.” Okenaka, Devid ọnaang-ẹ k'igbedim minna, ifa.12Wa Saul oning k'ojora f'Devid okurọ bẹ́, wa Ọvaar Ibinọkpaabyi kk'Saul ọbọhk ọtta, noninga ọmaana Devid.13Ofona nya o, Saul okwubh Devid z'ikẹ k'ọsọhm, ọsẹ-ẹ oso kw'agbongnọng nnọhna mfa okwuma arọbh ijobh. Devid od-ochi agbongnọng eden, otima bẹ oyin egbong, obir otima bẹ okwuna.14Ọttọhk kpenamkpen f'uwa Devid osi, od-ojibh ọnang-ẹ, okurọ ch'iwa Ọvaar Ibinọkpaabyi oning ọmaan-ẹ.15Ch'Saul oze ose kw'idik id-ijibh inang-ẹ, okwu oyena ojora f'Devid.16Okenaka, wa anọng p'Israẹl ọmaana anọng p'Juda maphyir mayen ọdaakẹ amaana Devid, okurọ ch'iwa od-ochi bẹ eden k'mgbong sabẹ.17Saul obenẹ Devid bẹ́, “Kirẹ Mẹrab kw'ode ominanwa kwaam kwiden ma. Kaam m'nttẹ-ẹ ọbọhk nnang-ọ k'ọbada. Kọ m'akenaka ade orim-egbong kwaam kw'ọbar ettem, arima mgbong s'Ọvaar Ibinọkpaabyi.” Ode ch'Saul kk'ochibha bẹ́, “Kaam kẹ ọbọhk mìntwu. Tte aPhilistiya azeng mmo asẹ-ẹ itama!”18Minna kw'Devid oben Saul bẹ́, “Kaam nde anyi? Ẹsọhmmọr chaam ọmaana efona ch'atte kwaam ẹbang k'ambọng m'ẹkọma ch'Israẹl, kw'kaam m'nkwu nde ọnyẹ kw'ọvaarnọng o?”19Okenaka, nokwu opyirẹ k'ogbe kw'uwura Saul nọtọk ominanwa kwẹ Mẹrab ọnang Devid, nọtọk-ẹ ọnang Adriyẹl kw'ofon Mẹhola k'ọbada.20M'ogbe nwa, wa Mikal kw'obir ode ominanwa kw'Saul oyen ọdaakẹ ọmaana Devid. Matek Saul odik nwo nya o, ettem elebh-ẹ.21Oben z'ettem bẹ́, “Kaam m'nttẹ-ẹ ọbọhk nnang-ẹ k'ọbada, ọfha ntim-ẹ nwọna Devid ọmma k'ose kw'im'otto aPhilistiya k'mbọhk.” Ofona nya, Saul oben Devid bẹ́, “Menda kk'obhokọ ttong afa ayena bẹ́, ade ọnyẹ kwaam.”22Nya o, Saul oben atọhmnọng pẹ bẹ́, “Màzenga nnam-nnam zọhng gbaak Devid bẹ́, ‘Kirẹ e, ettem ẹdaam ọvaar Saul ẹmaan-ọ, abir adaak atọhmnọng pẹ maphyir idik; chera bẹ́, m'ade ọnyẹ kwẹ.’ ”23Minna kw'atọhmnọng p'Saul magbaak Devid idik njo. Okenaka, Devid ọpọhna bẹ bẹ́, “Ọmọm-ọmọm bẹ́, ọnọng ode ọnyẹ kw'ọvaarnọng o? Kaam nde ogbugbora, kw'ina ọttọhk áfẹ̀ mbang.”24Ch'atọhmnọng p'Saul matek-ẹ ose kw'Devid ọgbaakẹ bẹ,25Saul ọpọhna bẹ́, “Màben Devid bẹ́, ‘Ọvaarnọng ẹba-phya ọdọk-ọdọk kororọ ch'ẹkpanẹ mkpatọr arọbh achen s'aPhilistiya, ọfha otima otuka idik s'awawunanọng pẹ.’ ” Wa achibhẹ p'Saul ade bẹ́, osi Devid otto k'mbọhk s'aPhilistiya.26K'ogbe kw'atọhmnọng mbo matek Devid idik nja, ettem ẹdaam-ẹ bẹ́, m'ode ọnyẹ kw'ọvaarnọng. Pira ogbe kw'make okwu ọkpan,27Devid ọmaana ajinọng pẹ mafona mad-afhọ aPhilistiya arọbh ijobh. Ọtọka mkpatọr sabẹ s'ittong obhik, ochena ọvaarnọng, ọfha ode ọnyẹ kw'ọvaarnọng. Nya o, Saul ọtọka ominanwa kwẹ Mikal, ọnang Devid k'ọbada.28Okwu ọttaanẹ Saul bẹ́, Ọvaar Ibinọkpaabyi oning ọmaana Devid, ọttara bẹ́, Mikal kw'ode ominanwa kwẹ, obir oyena ọdaakẹ ọmaana Devid.29Devid odo Saul ojor-ojora. Saul ochina ororo osok Devid iwawuna k'akpen pẹ maphyir.30Nya o, aso p'agbongnọng p'Philistiya machina ororo arima mgbong. Okenaka, k'ose kw'marim achina ororo, minna kw'idik ijibhẹ ọtam inang Devid iyọhnga atọhmnọng mboza p'Saul, eche chẹ ebir ekpobha mawuriji.
The Seed Company