1 Avaarnọng15
Abija otim ẹvaar ch'Juda
1Ny'icho ttong ichi kkanttaan s'ẹbaabha ch'Jẹroboam kw'ode nnwa kw'Nẹbat, nya kw'Abija otim ẹvaar ch'Juda.2Wa ọbaabh Jẹrusalẹm k'icho ittaan. Ọkka kwẹ okpen Maaka, kw'ode ominanwa kw'Abishalọm.3Wa kẹ osi mpyibha njo maphyir s'iwa oze otte ch'od-osi. Ettem chẹ maphyir kotim okpobha Ọvaar Ibinọkpaabyi k'ose kw'uwa Devid kw'ode ttatta kwẹ, osi.4Okenaka, Ọvaar Ibinọkpaabyi kw'ode Ibinọkpaabyi kwẹ, ozenga Devid ábẹ̀, ọnang-ẹ ojinọngnwa kw'im'ọtọka eninga chẹ, obir osi Jẹrusalẹm ọgaangẹ.5Wa osi minna okurọ bẹ́, wa Devid kk'idik s'itor-otor ọsa z'Ọvaar Ibinọkpaabyi k'ititika, obir okpobha asana p'Ọvaar Ibinọkpaabyi k'akpen pẹ maphyir, kw'ọkpanẹ odik kw'Uriya kw'ofon Het.6K'akpen p'Abija maphyir, wa kẹ ọmaana Jẹroboam marukọ egbong-egbong.7Ṉ́nòde idik njoza s'iyinẹ k'ogbe kw'Abija ọbaabh, makkẹrẹ z'anwẹr p'avaar p'Juda. Wa Abija ọmaana Jẹroboam marukọ egbong-egbong.8Abija okwu ope, matọk-ẹ anọhnga z'ebhondim ch'Devid, okebha ab'otte z'izek. Asa kw'ode ojinọngnwa kwẹ, okwu ọtọka ẹvaarninga ch'otte.Asa otim ẹvaar ch'Juda
9Ny'icho ttong ẹrọbh s'Jẹroboam ọbaabh Israẹl, nya wọ kw'manang Asa ẹvaar ch'Juda.10Ọbaabha Jẹrusalẹm k'icho arọbh afa okwuma mawanẹ. Wa ọkka kwẹ kwiden okpen Maaka, obir ode nnwa kw'Abishalọm.11Wa Asa osi idik s'itor-otor z'ititika s'Ọvaar Ibinọkpaabyi, k'ose kw'uwa Devid kw'ode otte, osi.12Wa odimẹ aka-pa p'azaza p'ejinọng ny'izek njo, obir odimẹ akpata maphyir p'uwa ab'ttatta pẹ nkk'asa.13Wa ọrọhbh ọkka kwẹ kwiden k'eninga ch'ọvaarkwanọng, okurọ bẹ́, osi ọkpata kw'Ashẹra kw'ọbọk-ọbọkọ bẹ́, anọng akpobha. Asa opekẹ ọkpata nwo, obir ọkwọmọ wẹ z'ilokodo s'Kidrọn.14Chibhẹ ch'iwa ina ọja-byi f'ọyaankpa odimẹ, wa ettem chẹ eyik k'Ọvaar Ibinọkpaabyi k'akpen pẹ maphyir.15Asa otima silva, ọmaana gol, ọttara ekpo mbyoza py'kẹ ọmaana otte nkk'ọbọhk atta anang Ibinọkpaabyi, okwu osok z'Ọsọhm kw'Ibinọkpaabyi.16Asa ọmaana Baasha wa marukọ egbong-egbong ny'ogbe nwo maphyir kw'mabaabh.17Ọvaar Baasha kw'Israẹl obina od-orima Juda ábẹ̀. Ọkpa nden s'Rama, ọfha ọnọng kpenamkpen oning k'iyaan oyinẹ, wanẹma, odim z'ẹkọma ch'ọvaar Asa kw'Juda.18Nya o, Asa ọtọka asilva, ọmaana gol p'arikẹ z'ẹkpa ch'Ọsọhm kw'Ọvaar Ibinọkpaabyi, ọmaana z'ẹkpa ch'odimpa kwẹ oyenẹ, ọnang adukwa pẹ. Pira ọtọhm bẹ z'Bẹn-Hadad kw'ode nnwa kw'Tabrimọn kw'ọvaar Eziyọn kw'Aram obhonọ, kw'uwa obir ọbaabha Damaskọs.19Oben-ẹ bẹ́, “Tte kaam ọmaana kọ mochekẹ ọnang ayok mach'iwa ab'atte pamina masi. Kaam m'ntọhm silva ọmaana gol nnang-ọ mach'ẹnanga. Ofona nya, gbira mbọhk z'echekẹ ch'asi amaana ọvaar Baasha kw'Israẹl, ọfha ọrọhbh-m ichen.”20Bẹn-Hadad okwu ochera ọmaana ọvaar Asa. Ọtọhm agbongsonọng pẹ, mad-arima ibhon s'Israẹl ábẹ̀. Okema obhon kw'Ijọn, ọmaana kw'Dan, ọmaana kw'Abẹl-Bẹt Maaka, ọmaana kw'Kinẹrẹt maphyir, ọttara ẹkọma ch'Naptali.21Baasha ọbhaang odik nwa nya o, ọkpọka ọtọhm z'Rama osisi, ọrọbh ozeng z'Tirza.22Nya o, ọvaar Asa oke ẹfa bẹ́, ọnọng kpenamkpen kw'ofon Juda, ọd-ọtọhka ata, ọmaana agbaaka p'uwa Baasha od-otima osi obhon kw'Rama. Byẹ byọ py'uwa ọvaar Asa notim osi obhon kw'Gẹba, z'ẹbhaakẹ ch'Bẹnjamin, ọttara obhon kw'Mizpa.23Idik njoza maphyir s'iyinẹ k'ogbe kw'Asa ọbaabh, ọmaana nkema sẹ, ọmaana ibhondim maphyir s'osi, makkẹrẹ z'anwẹr p'avaar p'Juda. Okenaka, k'atam pẹ, wa nọmm-ẹ k'mmokpatọkọ.24Asa okwu ope, okebha ab'otte z'izek. Manọhng-ẹ z'ebhondim ch'Devid kw'ode otte. Jẹhoshafat kw'ode nnwa kwẹ, okwu ọtọka ẹvaarninga ch'otte.Nadab otim ẹvaar ch'Israẹl
25Wa Nadab kw'ode nnwa kw'Jẹroboam okwu ode ọvaarnọng kw'Israẹl k'icho ttong ifa s'ọvaar Asa ọbaabh Juda. Kẹ ọbaabh Israẹl k'icho ifa.26Kẹ wa osi itama z'ititika s'Ọvaar Ibinọkpaabyi. Otor ntọkọ s'otte, obira osi mpyibha njo s'iwa otte otim anọng p'Israẹl osi.27Wa Baasha kw'ode nnwa kw'Ahija kw'ofon k'efona ch'Isaka, ochi Nadab ikwu, ọfhẹ-ẹ z'Gibeton kw'ode obhon wanẹ kw'Philistiya. Ny'ogbe nwo, wa Nadab ọmaana anọng p'Israẹl maphyir mayim egbong ny'Gibeton.28K'icho ttong ittaan s'Asa ọbaabh Juda, nya kw'uwa Baasha ọfhọ Nadab, obir ọtọka ẹvaar chẹ.29K'ose kw'ọtọm ẹbaabha nya, ọfhọ ẹsọhmmọr ch'Jẹroboam kibungọ. Ọnọng mawanẹ kw'Jẹroboam kw'oruk akpen kode kw'uwa ina ọfhọ ny'ọsọhm. Wa ọfhọ bẹ maphyir, otor k'ose kw'uwa Ọvaar Ibinọkpaabyi otim Ahija kw'ode ọtọhmnọng kwẹ kw'ofon Shilon, ọgbaak.30Wa idik njoma iyinẹ okurọ mpyibha s'Jẹroboam ikk'ọsa, ọmaana s'ikk'ọwọhka anọng p'Israẹl masi. Ọttara bẹ́, wa osi Ọvaar Ibinọkpaabyi, kw'ode Ibinọkpaabyi kw'Israẹl ọdọk-ẹ.31Idik njoza maphyir s'iyinẹ k'ogbe kw'Nadab ọbaabh, makkẹrẹ z'anwẹr p'avaar p'Israẹl.32Wa ọvaar Asa ọmaana ọvaar Baasha kw'Israẹl, marukọ egbong-egbong k'ẹbaabha chabẹ maphyir.Baasha otim ẹvaar ch'Israẹl
33Ny'icho ttong ittaan s'ọvaar Asa ọbaabh Juda, nya kw'Baasha kw'ode nnwa kw'Ahija oning z'Tirza, ọbaabha Israẹl maphyir. Wa otim ẹvaar k'icho ẹrọbh okwuma nna.34Wa Asa osi itama z'ititika s'Ọvaar Ibinọkpaabyi mach'Jẹroboam kw'ọwọhkọ anọng p'Israẹl abira asi mpyibha.The Seed Company