1 Avaarnọng10
1K'ogbe kw'ọvaar kwanọng kw'Shẹba ọbhaang ose kw'Sọlọmọn okpobh, ọmaana ose kw'ozeng ẹkaan ọmaana Ọvaar Ibinọkpaabyi, otima ambuma p'agaang-ọgaangẹ okwu ọnang-ẹ eyoma.2Otima eyokinọngkaan ch'ẹsaabh-ọsaabh ọmaana akamẹl opyirẹ z'Jẹrusalẹm. Akamẹl mbo matọhka ekpo py'elebhẹ eruk, ọmaana agol k'akkin-k'akkin, ọttara ata p'ajibh-ojibh, p'ochen Sọlọmọn. Wa obira ọgbaak idik maphyir s'ining-ẹ z'ettem ọmaan-ẹ.3Sọlọmọn ọpọhna ambuma maphyir p'ọbọbh-ẹ. Mbuma kode kw'uwa ọkaar ọvaar Sọlọmọn ọkaara bẹ́, ọnang-ẹ ọyaanttaana.4Ch'ọvaar kwanọng nwo kw'Shẹba oze ezonga-kira ch'Sọlọmọn oyen, ọmaana odimpa kw'ikk'ọsa,5ọmaana ọchattọhk f'ọnan z'okpokkoro kwẹ, ọmaana ose kw'iwọrninga-byi s'adukwa pẹ ide, ọmaana atọhmnọng pẹ, ọmaana nnya s'mafọr, ọmaana anọng p'ad-anang-ẹ atuk, ọmaana nnanga s'ẹkwọmọ s'ọnangẹ z'ọsọhm kw'Ọvaar Ibinọkpaabyi, okkon-ẹ makpaar.6Oben ọvaarnọng bẹ́, “Odik kw'mmaang z'kaam k'ẹkọma kw'ozeng ọmaana idik s'ikk'asa, ọmaana ezonga chọ, ode odik ọkkọkka.7Kaam idik nja kincher maa, nkwu nze k'achen paam oyenẹ. K'odik ọkkọkka, kk'nza bẹ́, matek-m odik kwọ bẹ kẹrẹm. Ezonga chọ ọmaana oyena kwọ, ẹbarẹ ẹyọhnga k'ose kw'mmaang.8Anọng pọ m'aninga k'ottemdaam! Adukwa pọ p'aning amaan-ọ k'ogbe kpenamkpen, mabhaanga ezonga chọ, mm'abira aninga k'ottemdaam!9Ẹtọhnga ede ch'Ọvaar Ibinọkpaabyi kw'ode Ibinọkpaabyi kwọ. Ofon k'ottemlebh kw'oyen k'ikọ, ọtọk-ọ ọnana k'ẹvaarkkọhbhọ ch'Israẹl. Ọvaar Ibinọkpaabyi ozeng ọdaakẹ kw'ttattampe kw'oyen ọmaana anọng p'Israẹl ábubẹ̀, ọsọ-ọ ọvaarnọng bẹ́, ad-akpaara aponga k'eden ọkkọkka ọmaana k'eden ch'etor-otor.”10Wa ọvaar kwanọng nwo ọnangẹ ọvaar Sọlọmọn atalẹnt arọbh achadanẹ p'gol, ọmaana ekpo k'akkin-k'akkin py'elebhẹ eruk ọttara ata p'ajibh-ojibh. Ogbe kode kw'uwa ọnọng obir otima ekpo py'elebhẹ eruk py'ẹsaabhẹ mach'mbyo py'ọvaar kwanọng kw'Sheba, ochena ọvaar Sọlọmọn.11(Wa akkaara-kpaar p'Hiram matim gol z'Ophir akwu. Mabir atima ẹtọhka chiden ch'agbaaka p'ochi kw'almug, ọttara ata p'ajibh-ojibh.12Ọvaarnọng otima agbaaka p'ochi kw'almug otuma Ọsọhm kw'Ọvaar Ibinọkpaabyi, ọmaana ọvaardimpa. Wa obira otima agbaaka mbo osi agim-agim ọttara agaang ọnang akkọhn-ẹmọng. Tọma za maa pyirẹ ma, m'agbaaka p'ochi kw'almug k'ọsaabh minna ọdọk kadebhẹ, nkk'ichen kabir aze.)13Wa ọvaar Sọlọmọn ọnang ọvaar-kwanọng kw'Shẹba ọttọhk kpenamkpen f'ọdaakẹ, ọmaana mbyo py'ophyem-ẹ ophyem, ágbaarẹ mbyo py'ikk'ẹ ọnanga k'ọphyaam f'ikẹ Sọlọmọn. Nya o, ọvaarkwanọng nwo kw'Shẹba otima ẹnọngkaan chẹ, obina ọbhana z'ikẹ k'ẹkọma.
Oyena kw'Sọlọmọn
14K'icho kpenamkpen, adọhbhiji p'gol kw'uwa Sọlọmọn ọd-ọtọka made atalẹnt ẹnọhna okwuma arọbh ijobh kkanttaan okwuma achadanẹ.15Ikpuka s'ifon z'ayaam-mphya, ọmaana z'avaar p'Arabiya, ọttara abaabh-nkọma, wa nnya kattar.16Ọvaar Sọlọmọn otima gol kw'maduk-oduk osi agbongtergba piden arọbh ijobh. Ogbongtergba kpenamkpen ọtọk ashẹkẹl ẹnọhna okwuma arọbh ijobh p'gol.17Wa obir otima gol kw'maduk-oduk osi agbongtergba p'karẹ arọbh ichi. Wa ogbongtergba kpenamkpen otim amina attaan p'gol. Ọtọka ekpo mbyo osok z'odimpa kw'Ẹtam ch'Lebanọn.18Ọvaarnọng okwu otima enyisa osi ẹvaarkkọhbhọ chiden, obir otima gol ọkkọkka ọbhọrọ dẹ.19Ẹvaarkkọhbhọ ndo eyen abhukakpa achadanẹ. Z'nnam kwẹ z'ẹrọng, ede izizing. Wa ẹvaarkkọhbhọ ndo eyen agbera-bọhk k'okwubha-k'okwubha. Masi ndoka s'nche ny'okikaan kw'ogbera-bọhk kpenamkpen.20Nche ijobh kkamfa ibe ny'abhukakpa mbo achadanẹ, madanẹ ebe k'ebhukakpaso kpenamkpen. Ẹkọma ọdọk-ọdọk za kede ch'iwa ikk'ọttọhk f'ode minna ẹsa.21Wa matim gol asi akkọbh p'atuk p'ọvaar Sọlọmọn maphyir. Mabir atima gol ọkkọkka asi ekpo maphyir py'ening z'odimpa kw'Ẹtam ch'Lebanọn. Ọttọhk mavanẹ-vanẹ kode f'uwa matim silva asi, okurọ bẹ́, z'ogbe kw'Sọlọmọn, wa silva odik kọbarẹ.22Ọvaarnọng oyena akkaara-kpaar k'ọsaabh, p'ẹphya oyiyaama z'ọraanga kwiden, mach'akkaara-kpaar p'Hiram. Akkaara-kpaar mbo mad-akwuna ozenga ogbe mawanẹ k'icho ittaan. K'ogbe kw'makwun, mad-atọhka gol, ọmaana silva, ọmaana nnyisa, ọmaana oyobha, ọttara nzizangkkọng.23Wa ọvaar Sọlọmọn ọyọhng avaarnọng mboza maphyir p'iyagbin k'ojibhada ọmaana k'ezonga.24Ọyagbinnọng kode kw'uwa ina ororọ bẹ́, oninga ọmaana Sọlọmọn, mfha ọbhaanga ezonga ndo ch'Ibinọkpaabyi kk'ẹ ọnanga.25K'icho k'icho, ọnọng kpenamkpen kw'okwu ọzẹ-ẹ, od-otima ẹnanga ch'silva, ọmaana ch'gol, ọmaana ch'anọhma-baba, ọmaana ch'egbongkpo, ọmaana ch'ekpo py'elebhẹ eruk, ọmaana ch'nnyanya, ọttara nnyanya s'id-itọhka ekpo.26Wa Sọlọmọn oyen ijaar s'nnyanya id-itọr, ọttara nnyanya k'ọsaabh. Wa ijaar s'nnyanya id-itọr ide nnọhna nttaan okwuma arọbh ijobh, ọmaana nnyanya nnọhna ẹrọbh okwuma ijobh. Wa osokọ jẹ z'ebhondim ch'ijaar s'nnyanya id-itọr, osok mbyoza eninga ẹmaan-ẹ z'Jẹrusalẹm.27Ọvaar Sọlọmọn osi silva ọsaabh z'Jẹrusalẹm mach'ata. Obira osi sidar ọsaabh mach'ochi kw'sikamọ z'agbe-rin p'Juda.28Z'Ijip, ọmaana z'Kuwe, za wọ kw'uwa Sọlọmọn od-odebh nnyanya sẹ. Ayaam-mphya p'ọvaarnọng bọ uwa mad-adebh jẹ z'Kuwe k'ẹphya ch'ogbe nwo.29Wa madebhẹ ọkpaar kw'ẹnyanya ẹd-ẹtọr z'Ijip k'ashẹkẹl p'silva ẹnọhna okwuma arọbh ijobh. Makwu adebh ẹnyanya k'ashẹkẹl p'silva arọbh achenọmfa okwuma ijobh. Mabir akpe jẹ anang avaarnọng maphyir p'ẹkọma ch'Het ọmaana ch'Aram.The Seed Company