2 SISIGA7meu_png

1Solomon ese ena ḡuriḡuri e ha-orea, bena lahi na guba amo e diho, ḡole-oho bouboudia bona boubou gaudia idau-idau e hagoledia oho; bona Iehova hairaina ese dubu e hahonua.2Bena hahelaḡa taudia na asi edia dala Iehova ena dubu ai bae raka vareai, badina be Iehova hairaina ese Iehova ena dubu e hahonua.3Bena Israel taudia ese lahi e diho bona Iehova hairaina dubu latanai e itadia negana ai, idia na e igo diho, tano ai e goru parapara ariara ai; bena idia ese Iehova e toma henia diho bona e hanamoa, eto,Badina be ia na namo,badina be ena hebogahisi na e hesiriu hanaihanaimu.4Bena hanua pavapavana bona taunimanima iboudiai ese boubou ḡaudia e hahelaḡadia, Iehova vairanai.5King Solomon ese boromakau mamaruanedia gerebu-rua daha-ruabona mamoe domaga-ta gerebu-rua e hahelaḡadia, ena boubou gaudia. Unu amo hanua pavapavana bona taunimanima iboudiai ese Dirava ena dubu e hahelaḡaia.6Hahelaḡa taudia na edia ḡaukara gabudia ai e gini; bona Levi taudia danu, mai edia hatai-hatai ḡaudia bona edia botabota auridia idau-idau ida, Iehova ena; unu na King David ese Iehova ihanamolaina totona e kara ḡaudia (badina be ena hebogahisi na e hesiriu hanaihanaimu), bena David ena hahenamo negadia iboudiai e hataidia bona e botadia. Hahelaga taudia ese e hevaira henidia, bona kibi e hiriri; bona Israel taudia iboudiai na e gini noho.7Solomon ese danu dubu maḡuna lalona bogaraginai, Iehova ena dubu vairanai e miava ḡauna, na e hahelaḡaia; badina be unuseni ai ia ese ḡole-oho bouboudia bona digara seadia herohemaino boubouna ḡaudia e hahelaḡadia; badina be auri labora-labora ihaboulaina patana, Solomon ese e karaia ḡauna, na dia bada, ḡole-oho boubouna bona flaoa boubouna bona digara boubouna ḡaudia na ia latanai bae ato.8Una negana ai Solomon ese aria e karaia, dina hitu lalodiai, bona Israel idoinai ia ida, hegogo bada-hereana, Hamat e raka vareai gabuna amo ela bona Aigupto Dokana.9Bena dina ihataurahanina ai idia ese hebou helaḡana e karaia; badina be ihaboulaina patana na dina hitu lalodiai vada e hahelaḡaia, bona aria na dina hitu lalodiai vada e karaia.10Bena hua ihahituna dinana iharuahui-toina ai ia ese taunimanima e siaidia karoho, edia ruma baela; idia na mai moaledia bona mai lalo-namodia, badina be Iehova ese ena hahenamo na David bona Solomon bona ena bese Israel vada e hahedinarai henidia dainai.

Dirava ese Solomon ma e hahedinarai henia

11Solomon ese Iehova ena dubu bona pavapava ena ruma na unu e ha-oredia toma; Solomon ese e lalo hatalai ḡaukaradia iboudiai, Iehova ena dubu ai bona ia sibona ena ruma ai, e ha-oredia vaitani.12Bena hanuaboi ai Iehova ese Solomon e hahedinarai henia, bona e hereva henia. eto, Emu ḡuriḡuri vada na kamonai, bona ina gabu vada na abia hidi egu, boubou dubuna ai bainela.13Guba baina koua bena medu basine diho, eiava kwadi baina haḡanidia, tano anidia bae ani ore, eiava dai-hanai gorerena baina siaia egu orea taudia bogaragidiai,14unu negadia ai, egu orea taudia, lau ladagu e henemailai taudia, na sibodia bema hahemanau, bena bema ḡuriḡuri, lau vairagu bema tahua, bona edia dala dikadia bema rakatanidia, bena lau na guba amo baina kamonai, bona edia dika baina gwaudia tao, bona edia tano baina hanamoa lou.15Harihari matagu baina hapapa bona taiagu baina hakirara, ina gabu ai bae gwaurai ḡuriḡuridia ediai.16Badina be harihari ina dubu vada na abia hidi bona vada na hahelaḡaia, lau ladagu ese baine noholaia hanaihanai totona; matagu bona lalogu na unuseni ai, nega idoinai.17Bona oi danu lau vairagu ai boma raka, tamamu David e rakava heḡereḡerena, bona na haḡanilaimu ḡaudia iboudiai heḡereḡeredia ai boma kara, bona egu taravatu bona egu hahedua boma badinadia,18bena lau ese emu pavapava teronona baina haginia, tamamu David na gwau henia hamata heḡereḡerena, nato “Oi garamu ta basine moru, Israel ireḡuna ai”.19A boma raka siri, egu taravatu bona egu haheḡani, oi vairamu ai vada na ato ḡaudia, na boma rakatanidia, bona boma lao, dirava idaudia isiaidia boma lao heni bona boma toma henidia diho,20bena lau ese vada na henimu tanona amo baina butumu oho, bona ina dubu, vada na hahelaḡaia lau ladagu ena, na lau vairagu amo baina negea, bona hereva lada-isina bona udu gwaurai-gwaurai herevana ai baina halaoa, bese iboudiai bogaragidiai.21Ina dubu danu, harihari e imodaiamu ḡauna, na raka-hanai taudia iboudiai ese bae hoalaia, baeto, Badina be dahaka Iehova ese ina tano bona ina dubu na ini vada e karadia toma?22Ma baeto, Badina be Iehova, senedia edia Dirava, Aigupto amo e hakaudia lasi Diravana, idia ese e rakatania, bena dirava idaudia e abidia, e toma henidia dihova bona isiaidia e lao heniva; taunabunai ia ese ina dika idoinai na idia latadiai vada e kara.
expand_more
Search