UNGGUTINGA3met_wbt
Lup Haing Diyamu Urana Haruanganoa
1Moxa kubolung murakkama dali asaxa abunging longgalo Toxoratamona Urana tongtongiadi. Ma rangua hainga saing xusunga ba, “Maxuna Urana biliangtang ba, ‘Labu axang xai marang longga duwa umangiau tai’?”2Baing hainga harua na moxua ba, “Tam sanga ba tam gaxang xai marandi umangia,3ning Urana harua ba, ‘Labu axang xai marandi mana xaiya li liwe umangiau tai, saing labu aringgu tai, nam tang gamati.’ ”4“Ne moxua harua na hainga ba, “Tegu. Bagula amati te.5Urana harua bila ba namua na xabia ba bungina axang maranoa bagula tang maxaimdi daxaxa ding, saing bagula axabia xai xaung diana, bila Urana xabia.”6Hainga bagu xaiya ba marandi (da)xai mana xangingua xaung gumanging sibuna, saing muruna mana xabiangua bagula sina na. Baing ina naga, xap saing xang. Saking sina (hataina) na ayuana, saing xang.7Baing tang maxading daxaxa ding, saing tang dibagu daxabia ba duwa mulang. Binabu dahatu xaiya pik londi, saing dahaxam mana kaukau dingtang sibuding.8Bungbung, longa xaringa, baing luba haininoa tang dilungu Toxoratamona Urana haxa umangia, baing dihisa mana Toxoratamona Urana liwe mana xai umangamdi.9Ne Toxoratamona Urana wagi mana luba ba, “Uwa bi?”10Baing haxuya ba, “Ngalungung uhaxa umangia, saing ngamaxuwa namua na ngawa mulang. Binabu ngahisa.”11Baing xusunga ba, “Gaxarea balaung ba uwa mulang? Oxong xai marana mana xaiya ngabiliung mana ba?”12Luba harua ba, “Haingga ba usina ba wa rangua nga—ina sina xai marana nanga, saing ngaxang.”13Saking Toxoratamona Urana xusunga hainga ba, “Uraxata ulibu bila ba?” Hainga harua ba, “Moxua tuxu murak manga, saing ngaxang.”14Binabu Toxoratamona Urana harua na moxua ba, “Ulibu bila ba, binabu“Mauxanganoa xapkung ganim liwe mana moru longgaloxaung asaxa abunging longgalo!Bagula uhaxa gamomiasaing bagula oxong gagap mana xaidap longgalo walingamia.15Baing bagula ngata bixua wa lia mana haing xaung ung,xaung wa lia mana bakbaginoa xaung bakbagima,bagula bakbaginoa taha toxoma,saing bagula utaha king tambonga.”16Harua na hainga ba,
“Bagula ngalibu salak hayauxingama xapkung sok sabanga sibuna,saing bagula uxunumia salak sabanga bungina uhayau garadi.Murungama bagula sabanga mana ayuam,ne bagula wa etua maung.”17Baing harua na lupka ba, “Ulungu hainima saing oxong xai marana ngabiliung mana ba, ‘Labu oxonggu tai.’
“Mana namua ulibu bila ba, mauxanganoa xap titia,bagula umakasa sibuna mana oxop angingua mana bu oxong,mana xaidap longgalo walingamia.18Waxu ruxunamdi xaung tatubang diandi bagula disok umangama,saing bagula oxong anginga abungindi.19Bagula salaksalaga xap ramramoma,bungina oxop oxong angingua,laing umati ugoxoya muli titiangatongtongiaung mana ba,namua na uwa titi gagabinoa,saing bagula ugoxoya mala mana titi gagabinoa muli.”20Luba Adam uxu haininoa Ip,namua na sok lipu walingam longgalo bauding.21Baing Toxoratamona Urana tongtongia imang asaxa sangganamdi na Adam haininoa tang saing sausaudi.22Baing Toxoratamona Urana harua ba, “Bagu luba sok bila kiria tela, namua na xabia xai xaung diana. Ne xai te nabu raria rimana saing kiri xai marandi mana xaiya sina walinga. Nam xang bu wa bungingbunginalo.”23Binabu Toxoratamona Urana suka luba tang mala sangua Umanga Iden, ba ki titia Urana tongtongia mana ba.24Suka luba mala masup, baing ta kerubimdiUmanga Iden sanga karagia, xaung ta waxang sabanga yap manandi bilikbiliga mana ba xukxugia sanga long longgalo bu soxauti daxangua ila mana xaiya sina walingua.